തന്റെ ഗാനങ്ങൾ ആലപിക്കുവാൻ വ്യാജ അവസരം നൽകുന്ന തട്ടിപ്പുകാരെ തുറന്നുകാട്ടി ഷാൻ റഹ്മാൻ; തട്ടിപ്പിന് ഇരയാകുന്നത് പ്രധാനമായും ഗായികമാർ..!

പല തരത്തിലുള്ള തട്ടിപ്പുകൾക്കാണ് നാം ഓരോ ദിവസവും കാതോർക്കുന്നത്. തട്ടിപ്പുകൾക്ക് ഇരയാകുവാൻ പലപ്പോഴും കാരണമാകുന്നത് നിഷ്‌കളങ്കതയും ഓരോരോ ആവശ്യകതകളുമാണ്. ഇത്തരത്തിൽ ഉള്ളൊരു വൻ തട്ടിപ്പ് വെളിപ്പെടുത്തിയിരിക്കുകയാണ് സംഗീത സംവിധായകൻ ഷാൻ റഹ്മാൻ. താൻ കംപോസ് ചെയ്‌ത ഗാനങ്ങൾ ആലപിക്കുവാൻ ക്ഷണിക്കുന്ന തട്ടിപ്പുകാരെ ഫേസ്ബുക്കിലൂടെ തുറന്നു കാട്ടിയിരിക്കുകയാണ് പ്രേക്ഷകരുടെ പ്രിയ സംഗീത സംവിധായകൻ.

പ്രിയ സുഹൃത്തുകളെ.. കുറച്ചുകാലമായി നടന്നു കൊണ്ടിരിക്കുന്ന ഒരു വലിയ തട്ടിപ്പിലേക്ക് ഞാൻ നിങ്ങളുടെ ശ്രദ്ധ ക്ഷണിക്കുകയാണ്. ഇതിനെക്കുറിച്ച് ഇതിനുമുൻപും കേട്ടിട്ടുണ്ടെങ്കിലും വ്യക്തിപരമായി നേരിടേണ്ടി വന്നത് ഇപ്പോഴാണ്. ‘എന്റെ’ ഗാനങ്ങൾ ആലപിക്കുവാൻ എന്ന വ്യാജേന ചില ക്രിമിനലുകൾ വളർന്നുവരുന്ന പുതുഗായകരെ വിളിക്കുകയും അവരുടെ നിഷ്‌കളങ്കതയേയും ആലാപനരംഗത്ത് ഒരു കരിയറെന്ന അവരുടെ ആവശ്യകതയേയും ചൂഷണം ചെയ്യുന്നു. ഇവിടെയെങ്ങും ഞാൻ ഇല്ലതാനും. AR അസ്സോസിയേറ്റ്സ് എന്ന കമ്പനിയിൽ നിന്നും അനൂപ് കൃഷ്‌ണൻ [ഫോൺ നമ്പർ – 73063 77043] എന്ന വ്യക്തി എന്റെ രണ്ടു പാട്ടുകൾ പാടുവാൻ അവസരം നൽകാമെന്ന് പറഞ്ഞ് എന്റെ സുഹൃത്തിന് അയച്ച വാട്സാപ്പ് മെസേജുകളുടെ സ്ക്രീൻഷോട്ടാണ് താഴെ പങ്ക് വെച്ചിരിക്കുന്നത്. ഒന്ന് ഹരിശങ്കറിനൊപ്പവും ഒന്ന് വിനീതിനൊപ്പവും. ഈ തട്ടിപ്പുക്കാർ ഗായകരെ സ്റ്റുഡിയോയിലേക്ക് വിളിക്കുകയും ഞാൻ കംപോസ് ചെയ്‌ത ഗാനമാണെന്ന് പറഞ്ഞ് ഏതെങ്കിലും ഒക്കെ ഗാനങ്ങൾ ആലപിപ്പിക്കുകയും ചെയ്യുന്നു. ഗായികമാരാണ് പ്രധാനമായും ഇവരുടെ ലക്ഷ്യം. മറ്റുള്ള രീതികളിലും ഈ തട്ടിപ്പുകാർ നേട്ടം കൊയ്യുവാൻ ശ്രമിക്കുന്നു. എന്റെ സ്റ്റുഡിയോയിൽ മാത്രമേ ഞാൻ എന്റെ ഗാനങ്ങൾ റെക്കോർഡ് ചെയ്യാറുള്ളൂ എന്ന് അറിഞ്ഞിരിക്കുക. ഞാൻ സ്ഥലത്തില്ലായെങ്കിൽ മാത്രം മിഥുൻ ജയരാജ്, ബിജു ജെയിംസ് അല്ലെങ്കിൽ ഹരിശങ്കർ ഇവർ ആരെങ്കിലുമായിരിക്കും റെക്കോർഡിങ് നടത്തുക. എങ്കിൽ പോലും ഭൂരിഭാഗം ഗാനങ്ങളും ഞാൻ തന്നെയാണ് റെക്കോർഡ് ചെയ്യുന്നത്. ദയവായി ഇത് പങ്ക് വെക്കുക. ശ്രദ്ധാലുവായിരിക്കുക.