‘കണ്ണന്റെ ഈ വിരിഞ്ഞ നെഞ്ചും ഉണ്ടക്കണ്ണും വെളുത്ത മനസും കണ്ട് ഒരുത്തി വരും’; ചിരിപ്പിച്ച് രസിപ്പിച്ച് ‘നദികളിൽ സുന്ദരി യമുന’ ടീസർ

യുവനടൻ ധ്യാൻ ശ്രീനിവാസൻ നായകനായി എത്തുന്ന ചിത്രം ‘നദികളിൽ സുന്ദരി യമുന’യുടെ ടീസർ റിലീസ് ചെയ്തു. സരീഗമ മലയാളത്തിന്റെ യുട്യൂബ് ചാനലിലൂടെ റിലീസ് ചെയ്ത ടീസർ ഇതിനകം നിരവധി പേരാണ് കണ്ടത്. വാട്ടർമാൻ മുരളിയാണ് ചിത്രം അവതരിപ്പിക്കുന്നത്. സെപ്തംബർ പതിനഞ്ചിന് ചിത്രം റിലീസ് ചെയ്യും. വളരെ രസകരമായാണ് ടീസർ ഒരുക്കിയിരിക്കുന്നത്. തിയറ്ററുകളിൽ സിനിമ പൊട്ടിച്ചിരി ഉണ്ടാക്കുമെന്നാണ് ടീസർ നൽകുന്ന സൂചന.

അതേസമയം, സിനിമാപ്രേമികൾ വളരെ ആകാംക്ഷയോടെ കാത്തിരിക്കുന്നത് സുന്ദരിയായ യമുനയെ കാണാനാണ്. സിനിമാറ്റിക്ക ഫിലിംസ് എൽ എൽ പിയുടെ ബാനറില്‍ വിലാസ് കുമാര്‍, സിമി മുരളി കുന്നുംപുറത്ത് എന്നിവര്‍ ചേര്‍ന്നു നിര്‍മ്മിക്കുന്ന ചിത്രം തിരക്കഥയെഴുതി സംവിധാനം ചെയ്യുന്നത് നവാഗതരായ വിജേഷ് പാണത്തൂര്‍, ഉണ്ണി വെള്ളാറ എന്നിവര്‍ ചേര്‍ന്നാണ്. ക്രെസന്റ് റിലീസ് ത്രൂ സിനിമാറ്റിക്ക ഫിലിംസാണ് ചിത്രത്തിന്റെ വിതരണം.

കണ്ണൂരിലെ നാട്ടിൻപുറങ്ങളെ പശ്ചാത്തലമാക്കിയാണ് സിനിമ ഒരുങ്ങുന്നത്. ഇവിടുത്തെ സാധാരണക്കാരായ മനുഷ്യരുടെ ജീവിതം അടിസ്ഥാനമാക്കിയാണ് സിനിമ. ധ്യാൻ ശ്രീനിവാസൻ, അജു വർഗീസ് എന്നിവരാണ് പ്രധാന കഥാപാത്രങ്ങളായി എത്തുന്നത്. സുധീഷ്, നിര്‍മ്മല്‍ പാലാഴി, കലാഭവന്‍ ഷാജോണ്‍, നവാസ് വള്ളിക്കുന്ന്, അനീഷ്, പാര്‍വ്വണ, ആമി, ഉണ്ണിരാജ, ഭാനു പയ്യന്നൂര്‍, ദേവരാജ് കോഴിക്കോട്, രാജേഷ് അഴിക്കോടന്‍, സോഹന്‍ സിനുലാല്‍, ശരത് ലാല്‍, കിരണ്‍ രമേശ്, വിസ്മയ ശശികുമാർ എന്നിവരും നിരവധി പുതുമുഖങ്ങളും ഈ ചിത്രത്തില്‍ അണിനിരക്കുന്നു. മനു മഞ്ജിത്തിന്റെയും ഹരിനാരായണന്റെയും വരികള്‍ക്ക് അരുണ്‍ മുരളീധരന്‍ ഈണം പകര്‍ന്നിരിക്കുന്നു. ശങ്കര്‍ ശര്‍മയാണ് ബി ജി എം. ‘സരിഗമ’യാണ് ചിത്രത്തിന്റെ ഗാനങ്ങളുടെ റൈറ്റ്സ് സ്വന്തമാക്കിയിരിക്കുന്നത്.