‘ഇല്ലാത്ത ജാതിവാൽ മുറിക്കാൻ എന്നെക്കൊണ്ട് പറ്റില്ല, ഞാൻ ധന്യ വീണയാണ്’ – നവ്യ നായർ

മലയാളികളുടെ പ്രിയപ്പെട്ട താരമാണ് നവ്യ നായർ. നന്ദനം എന്ന ഒറ്റ ചിത്രത്തിലൂടെ മലയാളികളുടെ മനസിൽ ചിരപ്രതിഷ്ഠ നേടിയ താരമാണ് നവ്യ. ഒരുത്തീ എന്ന ചിത്രത്തിലൂടെ മലയാള സിനിമയിലേക്കുള്ള തന്റെ രണ്ടാം വരവും നവ്യ ഗംഭീരമാക്കി. ഇപ്പോൾ നവ്യ നായർ എന്ന പേരിലെ നായർ ആണ് വിവാദമായിരിക്കുന്നത്. സോഷ്യൽ മീഡിയയിലും മറ്റും നവ്യ ജാതിവാൽ മുറിക്കണമെന്ന ആവശ്യം ഉയരുകയാണ്. എന്നാൽ തനിക്ക് മുറിക്കാൻ ജാതിവാൽ ഇല്ലെന്നും തന്റെ പേര് ഇപ്പോഴും ധന്യ വീണ എന്നാണെന്നും വ്യക്തമാക്കിയിരിക്കുകയാണ് നവ്യ.

നവ്യ നായർ എന്ന പേര് താൻ തിരഞ്ഞെടുത്ത പേരല്ലെന്നും സിനിമയിൽ എത്തിയപ്പോൾ തനിക്ക് നൽകപ്പെട്ട പേരാണെന്നും താരം പറഞ്ഞു. ‘പത്താം ക്ലാസ്സിൽ പഠിക്കുന്ന സമയത്താണ് ഞാൻ സിനിമയിലെത്തുന്നത്. അന്ന് സംവിധായകരും എഴുത്തുകാരും പ്രൊ‍ഡ്യൂസേഴ്സും എല്ലാം ഇട്ട പേരാണ് നവ്യ നായർ’ – ഒരു അഭിമുഖത്തിൽ സംസാരിക്കവെ പറഞ്ഞു.

സ്കൂൾ കലോത്സവവേദിയിൽ നിന്നാണ് നവ്യ സിനിമയിലേക്ക് എത്തിയത്. നിരവധി ഹിറ്റ് ചിത്രങ്ങളിൽ നായികയായ നവ്യ വിവാഹത്തോടെ സിനിമയിൽ നിന്ന് ഒരു ഇടവേള എടുക്കുകയായിരുന്നു. എന്നാൽ ഒരുത്തീ എന്ന ചിത്രത്തിലൂടെ മികച്ച രണ്ടാം വരവ് ആയിരുന്നു താരം നടത്തിയത്. ‘നവ്യ നായർ എന്നു വിളിക്കുന്നത് തന്റെ ജാതി മനസ്സിലാക്കിയിട്ടല്ല. അത് എന്റെ പേര് ആയിപ്പോയി. ഇനി ഇത് മുറിച്ചു മാറ്റാം എന്നു വച്ചാൽ തന്നെ എന്റെ ഒരു ഔദ്യോഗിക രേഖകളിലും ഞാൻ നവ്യ അല്ല, ധന്യ വീണ ആണ്. ഗസറ്റിലെ എന്റെ പേര് അതാണ്’- നവ്യ പറയുന്നു. സൈജു കുറുപ്പ് നായകനായി എത്തുന്ന ജാനകീ ജാനേ ആണ് നവ്യ നായരുടെ പുതിയ സിനിമ.