നിഗൂഢതകളുടെ സൗന്ദര്യവുമായി പേടിപ്പെടുത്തി നീലി| റീവ്യൂ വായിക്കാം

‘കള്ളിയങ്കാട്ട് നീലി’യെ പോലെ മലയാളികളുടെ പ്രേതസങ്കല്പങ്ങൾക്ക് രൂപം പകർന്ന മറ്റാരുമില്ല. വർഷങ്ങളോളം സംവിധായകൻ കമലിന്റെ ശിഷ്യൻ ആയിരുന്ന അൽത്താഫ് റഹ്മാൻ ആദ്യമായി സംവിധാനം നിർവഹിക്കുന്ന ‘നീലി’യിലൂടെ കള്ളിയങ്കാട്ട് നീലി വീണ്ടുമെത്തിയിരിക്കുകയാണ്. മലയാളികൾ ഒരിക്കലും മറക്കാത്ത തോർത്ത് എന്ന ഷോർട്ട് ഫിലിമിന്റെ സംവിധായകൻ കൂടിയാണ് അൽത്താഫ്. ഭയത്തിനൊപ്പം ആകാംക്ഷയും നർമ്മവും കൂട്ടിച്ചേർത്ത് പ്രേക്ഷകന് മനോഹരമായ ഒരു ദൃശ്യാനുഭവം തന്നെയാണ് നീലിയിൽ ഒരുക്കിയിരിക്കുന്നത്. ഹൊറർ ചിത്രങ്ങൾ ഏറെ കണ്ടിട്ടുള്ള മലയാളികൾക്ക് ഉള്ള ഏറ്റവും പുതിയ സമ്മാനമാണ് ഈ ചിത്രം.

പേടിപ്പെടുത്തുന്ന ഒരു മോർച്ചറിയുടെ പശ്ചാത്തലത്തിൽ തുടങ്ങുന്ന ചിത്രം പിന്നീട് ഓരോ കഥാപാത്രങ്ങളെ പരിചയപ്പെടുത്തി മുന്നേറുന്നു. ലക്ഷ്മി ഒരു സ്പീച്ച് തെറാപ്പിസ്റ്റാണ്. അതോടൊപ്പം ഒരു സിംഗിൾ മദറും. മകളോടൊപ്പം കള്ളിയങ്കാട്ടുള്ള തറവാട്ടിലെത്തുന്ന ലക്ഷ്മിക്ക് അവിചാരിതമായ ചില ഏറ്റുമുട്ടലുകൾ നേരിടേണ്ടി വരുന്നു. കൂടാതെ മകളെ കാണാതാവുകയും ചെയ്യുന്നു. മകളെ കണ്ടുപിടിക്കുവാനുള്ള ലക്ഷ്മിയുടെ യാത്രയിലേക്ക് അമാനുഷികതയുടെ ഒരു ശക്തിയും ചേരുന്നു. ലക്ഷ്മിയായി മംമ്ത മോഹൻദാസിന് പകരം മറ്റൊരാളെ ചിന്തിക്കാൻ സാധിക്കാത്ത വിധത്തിലുള്ളൊരു അഭിനയമാണ് കാഴ്‌ച വെച്ചിരിക്കുന്നത്. സ്വതസിദ്ധമായ ലളിതമായ സംഭാഷണങ്ങളിലൂടെയും അഭിനയത്തിലൂടെയും പാരാനോർമൽ ഇൻവെസ്റ്റിഗേറ്റർ റെനിയായി അനൂപ് മേനോനും തന്റെ ഭാഗം മനോഹരമാക്കി. ഭയത്തിന്റെ അലയൊലികൾക്കിടയിൽ ചിരിയുടെ രസകരമായ കാഴ്ചയൊരുക്കി ബാബുരാജ്, ശ്രീകുമാർ, സിനിൽ സൈനുദ്ധീൻ എന്നിവരും പ്രേക്ഷകരെ കൈയിലെടുത്തു.

ഒരു നവാഗത സംവിധായകന് ഉണ്ടാകാവുന്ന പല പാളിച്ചകളും ചിത്രത്തിൽ ഉണ്ടെങ്കിലും ചിത്രത്തിന്റെ അതിന്റെ പൂർണതയിൽ ദർശിക്കുമ്പോൾ അതൊരു കുറവായി തോന്നുകയില്ല. റിയാസ് മാരാത്ത്, മുനീർ മുഹമ്മദുണ്ണി എന്നിവർ ചേർന്നെഴുതിയ തിരക്കഥയിൽ അല്പം കൂടി ശ്രദ്ധ ചെലുത്തിയിരുന്നെങ്കിൽ നീലി മറ്റൊരു തലത്തിൽ എത്തുമായിരുന്നുവെന്ന കാര്യത്തിൽ ലവലേശം സംശയമില്ല. മനോജ് പിള്ളയുടെ കാമറ കണ്ണുകളും പ്രേക്ഷകന്റെ ഭീതിയെ ഏറെ വർദ്ധിപ്പിക്കുന്നുണ്ട്. ശരത്ത് ഈണമിട്ട ഗാനങ്ങളും സാജൻ തീർത്ത എഡിറ്റിംഗും ചിത്രത്തെ കൂടുതൽ മനോഹരമാക്കി. ഈ അടുത്ത കാലത്ത് പുറത്തിറങ്ങിയ ഹൊറർ ചിത്രങ്ങളിൽ പ്രേക്ഷകർക്ക് മികച്ചൊരു അനുഭവം പ്രദാനം ചെയ്യുന്ന ചിത്രമാണ് നീലി. ഭയത്തിനും ഒരു സൗന്ദര്യമുണ്ടെന്ന് തെളിയിക്കുന്ന ഈ നീലി പേടിപ്പിക്കും…!