‘തേര്’ പുതിയ പോസ്റ്റർ പുറത്തുവിട്ട് അണിയറപ്രവർത്തകർ

അമിത് ചക്കാലക്കൽ, കലാഭവൻ ഷാജോൺ, ബാബുരാജ്, എന്നിവർ കേന്ദ്ര കഥാപാത്രങ്ങളാകുന്ന  ‘തേര്’ എന്ന ചിത്രത്തിന്റെ പുതിയ പോസ്റ്റർ പുറത്ത്. ജിബൂട്ടിക്ക് ശേഷം ബ്ലൂ ഹിൽ നെയ്ൽ കമ്മ്യൂണിക്കേഷന്റെ ബാനറിൽ എസ് ജെ സിനു ആണ് ചിത്രം സംവിധാനം ചെയ്യുന്നത്. ‘തേര്, ദ വൺ ഇൻ ദ കോർണർ’ എന്ന ടാഗ് ലൈനോടു കൂടി പുറത്തിറങ്ങുന്ന ചിത്രത്തിന്റെ റിലീസ് ഉടൻ ഉണ്ടാകുമെന്നാണ് അണിയറപ്രവർത്തകർ അറിയിച്ചത്.

കുടുംബ പശ്ചാത്തലത്തിൽ ആക്ഷൻ ത്രില്ലറായാണ് ചിത്രം ഒരുങ്ങുന്നത്. ജോബി. പി. സാം ആണ്  ചിത്രം നിർമ്മിക്കുന്നത്. നേരത്തെ പുറത്തുവിട്ട ചിത്രത്തിന്റെ ടൈറ്റിൽ പോസ്റ്ററിനും, മോഷൻ പോസ്റ്ററിനും മികച്ച പ്രതികരണമാണ് ലഭിച്ചത്. വിജയരാഘവൻ, ശ്രീജിത്ത് രവി, പ്രശാന്ത് അലക്സാണ്ടർ, പ്രമോദ്‌ വെളിയനാട്‌, സഞ്ജു ശിവറാം, അസീസ് നെടുമങ്ങാട്, സ്മിനു സിജോ, നിൽജ കെ. ബേബി, വീണ നായർ, റിയ സൈറ, സുരേഷ്‌ ബാബു തുടങ്ങിയവരാണ് ചിത്രത്തിൽ മറ്റു പ്രധാന വേഷങ്ങളിലെത്തുന്നത്.

ടി ഡി ശ്രീനിവാസാണ് ‘തേരി’ന് വേണ്ടി ക്യാമറ ചലിപ്പിച്ചത്. ഡിനിൽ പി കെ കഥയും തിരക്കഥയും സംഭാഷണവും നിർവഹിച്ച ചിത്രത്തിൽ യക്സനും നേഹയും ചേർന്ന് സംഗീതം ഒരുക്കിയിരിക്കുന്നു.