തമിഴില്‍ പയറ്റി വിജയിച്ച രാഷ്ട്രീയം മലയാളത്തിലും; പടവെട്ട് ഏറ്റെടുത്ത് പ്രേക്ഷകര്‍

തമിഴില്‍ രാഷ്ട്രീയം കൃത്യമായി പറഞ്ഞ ചിത്രങ്ങളാണ് പരിയേറും പെരുമാള്‍, അസുരന്‍, കര്‍ണന്‍, നച്ചത്തിരം നഗര്‍ഗിരത് തുടങ്ങിയവ. രാഷ്ട്രീയം പറയുമ്പോഴും കര്‍ഷകരുടേയും ഗ്രാമീണരുടേയും സാധാരണക്കാരുടേയും ജീവിതവും ചിത്രം വരച്ച് കാട്ടുന്നുണ്ട്. ഇൗ ഒരു ഗണത്തില്‍ ഇപ്പോള്‍ ചര്‍ച്ച ചെയ്യപ്പെടുകയാണ് നിവിന്‍ പോളി നായകനായി എത്തിയ പടവെട്ട്. കൃത്യമായ രാഷ്ട്രീയവും സാധാരണക്കാരുടെ ജീവിതവുമെല്ലാം അടയാളപ്പെടുത്തുന്നുണ്ട് പടവെട്ട്.

കൃത്യമായ ലക്ഷ്യമോ ചിന്തകളോ ഒന്നുമില്ലാത്ത സാധാരണക്കാരനായ രവിയില്‍ നിന്നാണ് ചിത്രത്തിന്റെ തുടക്കം. പശുവിനെ വളര്‍ത്തി കിട്ടുന്ന തുച്ഛമായ വരുമാനത്തില്‍ ജീവിക്കുന്ന ഇളയമ്മ പുഷ്പയുടെ തണലിലാണ് അവന്റെ ജീവിതം. അവഹേളനവും അവജ്ഞയും ഏറ്റുവാങ്ങി ചോര്‍ന്നൊലില്‍ക്കുന്ന വീട്ടില്‍ അയാള്‍ ജീവിതം തള്ളിനീക്കുകയാണ്. ശരീരത്തേക്കാളേറെ മനസിനെ ബാധിച്ച വിരസതയാണ് അയാളെ മടിയനാക്കിയത്. രവി എന്ന വ്യക്തിയുടെ സാന്നിധ്യമോ അഭിപ്രായമോ ആര്‍ക്കും എങ്ങും പരിഗണനയിലില്ല. സ്വന്തമായി പദ്ധതിയില്ലാത്ത രവി മറ്റുള്ളവരുടെ പദ്ധതിയുടെ ഭാഗമാകുമ്പോഴാണ് സ്വയം തിരിച്ചറിയുന്നത്. സമീപകാലത്ത് നടന്ന കര്‍ഷക സമരവും അതിന്റെ കാര്യങ്ങളും സിനിമയില്‍ വന്നു പോകുന്നുണ്ട്. എന്നാല്‍ രാഷ്ട്രീയം കടുപ്പമാക്കാതെ ജനത്തിന് മനസിലാകുന്ന ഭാഷയില്‍ അവതരിപ്പിക്കാന്‍ ലിജു കൃഷ്ണന്‍ എന്ന എഴുത്തുകാരന് കഴിഞ്ഞിട്ടുണ്ട്. വേലിക്കകത്തു കയറുന്ന കാട്ടുപന്നിയെ പോലും കൃത്യമായ രാഷ്ട്രീയ ബിംബംമായി ഇവിടെ ഉപയോഗിച്ചിരിക്കുന്നു.

കോറോത്ത് രവിയായി നിവിനും നേതാവ് കുയ്യാലിയായി ഷമ്മി തിലകനും പുഷ്പയായി രമ്യ സുരേഷും തിളങ്ങി. ഷൈന്‍ ടോം ചാക്കോ, നിര്‍മ്മാതാവ് കൂടിയായ സണ്ണി വെയ്ന്‍, ഇന്ദ്രന്‍സ്, വിജയരാഘവന്‍, ജാഫര്‍ ഇടുക്കി എന്നിവരും മികച്ചു നിന്നു. അകാലത്തില്‍ വിടപറഞ്ഞ കൈനകരി തങ്കരാജ്, അനില്‍ നെടുമങ്ങാട് എന്നിവരും അവരുടെ സ്‌ക്രീന്‍ പ്രസന്‍സ് എടുത്തുകാട്ടുന്ന പ്രകടനങ്ങള്‍ നടത്തിയിട്ടുണ്ട്.