‘വഴിയിൽ കുഴിയുണ്ട് എന്നാലും വന്നേക്കണേ’; ട്രോളായി ‘ന്നാ താൻ കേസ് കൊട്’ പോസ്റ്റർ, റിലീസ് ദിനത്തിൽ തന്നെ കനത്ത സൈബർ ആക്രമണം നേരിട്ട് ചിത്രം

കുഞ്ചാക്കോ ബോബൻ നായകനായി എത്തുന്ന ചിത്രം ‘ന്നാ താൻ കേസ് കൊട്’ ഇന്ന് തിയറ്ററുകളിൽ റിലീസ് ആയിരിക്കുകയാണ്. റിലീസിനോട് അനുബന്ധിച്ച് വാർത്താമാധ്യമങ്ങളിൽ പ്രസിദ്ധീകരിച്ച ചിത്രത്തിന്റെ പോസ്റ്റർ ഇപ്പോൾ വിവാദത്തിലായിരിക്കുകയാണ്. ‘തിയറ്ററുകളിലേക്കുള്ള വഴിയിൽ കുഴിയുണ്ട് എന്നാലും വന്നേക്കണേ’ എന്നാണ് പോസ്റ്റിലെ വാചകം. രതീഷ് ബാലകൃഷ്ണ പൊതുവാൾ സംവിധാനം ചെയ്യുന്ന ചിത്രത്തിന് എതിരെ സോഷ്യൽമീഡിയയിൽ സൈബർ ആക്രമണം ശക്തമാണ്.

‘റോഡിൽ കുഴിയുണ്ടെന്നും എന്നാലും തിയറ്ററിലേക്ക് വന്നേക്കണേ’ എന്നുമുള്ള പരസ്യവാചകമാണ് ചിലരെ ചൊടിപ്പിച്ചത്. റോഡിലെ കുഴി ദേശീയ കുഴിയാണോ സംസ്ഥാനകുഴിയാണോ എന്ന തരത്തിലുള്ള തർക്കം ഒരു ഭാഗത്ത് നടക്കുമ്പോൾ ചിത്രം ബഹിഷ്കരിക്കണമെന്ന ആഹ്വാനവുമായി വേറെ കുറേപേർ സോഷ്യൽ മീഡിയയിൽ നിറയുകയാണ്. അനുകൂലവും പ്രതികൂലവുമായ നിരവധി പ്രതികരണങ്ങൾ ആണ് പോസ്റ്ററിന് ലഭിക്കുന്നത്.

സിനിമയുടെ പ്രമേയവുമായി ബന്ധമുള്ളതു കൊണ്ടാണ് ഈ വാചകം ചേർത്തിരിക്കുന്നെന്ന വിശദീകരണങ്ങൾക്ക് ഒന്നും ചെവി കൊടുക്കാതെ സമകാലിക രാഷ്ട്രീയ സാഹചര്യവുമായി ചേർത്തുവെച്ച് ചിത്ര ബഹിഷ്കരിക്കാനുള്ള ആഹ്വാനവുമായി നിരവധിപേരാണ് രംഗത്തെത്തിയിരിക്കുന്നത്. പോസ്റ്ററിൽ ഈ വാചകം ചേർത്തിരിക്കുന്നത് ചിത്രത്തിന്റെ സംവിധായകൻ തന്നെയാണ്. ആന്റണി സ്റ്റീഫനാണ് പോസ്റ്റർ ഡിസൈൻ ചെയ്തിരിക്കുന്നത്. കുഞ്ചാക്കോ ബോബനും ഈ പോസ്റ്റർ തന്റെ സോഷ്യൽ മീഡിയ പേജിൽ പങ്കുവെച്ചിട്ടുണ്ട്. പോസ്റ്ററിനെ അനുകൂലിച്ചും പ്രതികൂലിച്ചും നിരവധി പേരാണ് രംഗത്തെത്തിയിരിക്കുന്നത്.