പന്ത്രണ്ടാം വയസ്സിൽ അച്ഛന്റെ മരണം, ശേഷം മുഴുവൻ ഉത്തരവാദിത്വവും ഏറ്റെടുത്ത് അമ്മ; മനസ്സ് തുറന്ന് നൈല ഉഷ

നടി, അവതാരിക, ആർജെ എന്ന നിലകളിൽ പ്രശസ്തയായ താരമാണ് നൈല ഉഷ. പൊറിഞ്ചുമറിയംജോസ് എന്ന ചിത്രത്തിലൂടെ ഏറെ പ്രേക്ഷകപ്രീതി താരം നേടിയെടുത്തു. തന്റെ വിശേഷങ്ങൾ എല്ലാം സോഷ്യൽ മീഡിയയിലൂടെ ആരാധകരുമായി പങ്കുവയ്ക്കുവാൻ താരം എപ്പോഴും ശ്രമിക്കാറുണ്ട്. റേഡിയോ ജോക്കിയായി ദുബായിൽ 12 വർഷം ജോലി ചെയ്തതിനു ശേഷമാണ് താരം അഭിനയരംഗത്തേക്ക് എത്തിയത്. ആർ.ജെ ആയത് എങ്ങനെയാണെന്ന് കേരളകൗമദിക്ക് നൽകിയ അഭിമുഖത്തിൽ വെളിപ്പെടുത്തിയിരിക്കുകയാണ് താരമിപ്പോൾ.

നൈല ഉഷയുടെ വാക്കുകൾ:

‘കുട്ടികാലം മുതലേ വിദേശത്തായിരുന്നു. എല്ലാ അവധിക്കാലത്തും നാട്ടിലെ അപ്പൂപ്പന്റെ വീട്ടിൽ എത്തും. വെളളായണിയിലായിരുന്നു നാട്. നാലാം ക്ലാസ് മുതൽ നാട്ടിലാണ് പഠിച്ചത്. എനിക്ക് 12 വയസ്സുള്ളൾ ആയിരുന്നു അച്ഛൻ ഹൃദയാഘാതത്തെ തുടർന്ന് മരിക്കുന്നത്. ഗോപകുമാർ എന്നായിരുന്നു അച്ഛന്റെ പേര്. പിന്നീട് അമ്മയാണ് വീട്ടിലെ ഉത്തരവാദിത്വം ഏറ്റെടുത്തത്.

തനി നാട്ടിൻപുറത്തുകാരിയായ അമ്മ അച്ഛന്റെ വേർപാടിന് ശേഷം ഞാൻ കണ്ടത് വളരെ ശക്തയായ അമ്മയെയാണ്. അതിപ്പോഴും അമ്മയ്ക്ക് നഷ്ടപ്പെട്ടില്ല. എന്റെ പേരിനോടൊപ്പം ഇപ്പോഴുമുണ്ട്. ഡിഗ്രി കഴിഞ്ഞപ്പോൾ ടെക്നോപാർക്കിലെ ഒരു കമ്പനിയിൽ എച്ച്.ആർ വിഭാഗത്തിൽ ജോലി ലഭിച്ചു. അതും ഇരുപത്തിയൊന്നാം വയസ്സിൽ.

അങ്ങനെ ഇരിക്കുമ്പോൾ ദുബായിൽ നിന്ന് എനിക്കൊരു കോൾ വന്നു. ദുബായ് ഷോപ്പിങ് ഫെസ്റ്റിവൽ ഷോ ചെയ്യാനായിരുന്നു അത്. ഒരു ചാനലിൽ ഞാൻ ആ സമയത്ത് ഒരു ഷോ ചെയ്യുന്നുണ്ടായിരുന്നു. വർഷങ്ങൾക്ക് ശേഷം ഞാൻ വീണ്ടും ദുബൈയിലേക്ക് പറന്നു. 45 ദിവസത്തിന് ശേഷം ഞാൻ തിരിച്ചുവന്നു. രണ്ടാഴ്ച കഴിഞ്ഞപ്പോൾ വീണ്ടും വേറെയൊരു കോൾ വന്നു.

അ​റേ​ബ്യ​ൻ​ ​റേ​ഡി​യോ​ ​നെ​റ്റ് ​വ​ർ​ക്ക് ​സ്റ്റേ​ഷ​ൻ​ ​പ്രോ​ഗ്രാം​ ​ഹെഡ് ​അ​ജി​ത് ​മേ​നോ​ൻ സാറിന്റെ കോൾ ആയിരുന്നു അത്. അവിടെ തുടങ്ങുന്ന മലയാളം റേഡിയോ സ്‌റ്റേഷൻ റേഡിയോ ജോക്കി ആവാൻ അവസരം. ഇന്റർവ്യൂ അറ്റൻഡ് ചെയ്തു. ഇരുപത്തിരണ്ടാം വയസ്സിൽ രണ്ടാമത്തെ ജോലി. ഇപ്പോൾ 15 വർഷമായി ദുബൈയിലാണ്. ദുബായ് ഒരിക്കൽ കണ്ടാൽ പിന്നീട് ഇതൊന്നുമല്ല ലോകമെന്ന് തിരിച്ചറിയും.