“മിട്ടു പൂച്ചേ… തങ്കു പൂച്ചേ”;ആദ്യ ദിനം തന്നെ സോഷ്യൽ മീഡിയയിൽ വൈറലായി ഓൺലൈൻ ടീച്ചർ

ജൂൺ 1 ആയ ഇന്ന് പുതിയ ഒരു അധ്യായന വർഷം ആരംഭിച്ചിരിക്കുകയാണ്. എല്ലാ വർഷങ്ങളിൽ നിന്നും വ്യത്യസ്തമായി അമ്മമാരെ കാത്തു കരഞ്ഞുകൊണ്ടിരിക്കുന്ന കുഞ്ഞുങ്ങളും കുഞ്ഞുങ്ങളെ നോക്കി മരച്ചുവട്ടിലിരിക്കുന്ന അമ്മമാരും ഇന്ന് സ്ക്രീനിൽ ഉണ്ടായിരുന്നില്ല. ഓൺലൈൻ ക്ലാസുകൾ ആയിരുന്നു ഇന്ന് കുട്ടികളെ വരവേറ്റത്. ഒന്നാം ക്ലാസ്സിലെ കുട്ടികൾക്കായി ക്ലാസെടുത്ത സായി ടീച്ചർ ഇപ്പോൾ ലോകമെമ്പാടും വൈറലായിരിക്കുകയാണ്. ആരെയും ആകർഷിക്കുന്ന തരത്തിലായിരുന്നു ടീച്ചറുടെ അവതരണം. പൂച്ചകളുമായി എത്തിയ സായി ടീച്ചർ കുഞ്ഞുങ്ങളെ തൊടാതെ തൊട്ട് ക്ലാസ് വളരെ ഭംഗിയായി പൂർത്തിയാക്കി. എന്നാൽ ടീച്ചറുടെ ക്ലാസ്സ് ടിവിയിലൂടെ കേട്ടിരുന്നത് കുഞ്ഞുങ്ങൾ മാത്രമായിരുന്നില്ല. ഈയൊരു അനുഭവത്തെക്കുറിച്ച് മനോരമ ഡോട്ട് കോമിനോട് സായി ടീച്ചർ മനസ്സ് തുറക്കുകയാണ്.

‘അയ്യോ.. ഇത്രമാത്രം വൈറലായോ..? കുട്ടികളുടെ ഇഷ്ടം നേടേണ്ടേ.., ഒന്നാം ക്ലാസ് അല്ലേ.. അവരുടെ ഇഷ്ടത്തിന് പഠിപ്പിക്കണമല്ലോ അതുകൊണ്ടാണ് അങ്ങനെ ചെയ്തത്. എന്റെ പേര് സായി ശ്വേത. കോഴിക്കോടാണ് സ്വദേശം. ഭർത്താവ് ദിലീപ്. അദ്ദേഹം ഗൾഫിലാണ്. ഇപ്പോൾ ചോമ്പാല ഉപജില്ലയിലെ എൽ.പി സ്കൂൾ അധ്യാപികയാണ്. കഴിഞ്ഞ വർഷമാണ് അധ്യാപികയായി ജീവിതം തുടങ്ങുന്നത്. കഴിഞ്ഞ തവണ രണ്ടാം ക്ലാസ് കുട്ടികളെയായിരുന്നു പഠിപ്പിച്ചിരുന്നത്. ഇത്തവണ ഒന്നാം ക്ലാസിന് ഓൺലൈനായി ക്ലാസെടുക്കാൻ അവസരം കിട്ടി. അങ്ങനെയാണ് എത്തുന്നത്. നാളെ 10.30 മുതൽ എന്റെ ക്ലാസുണ്ട്. ആഴ്ചയിൽ രണ്ടു ദിവസമാണ് ഉള്ളത്.

ടിക്ടോക് വിഡിയോകളൊക്കെ ചെയ്യാറുണ്ട്. പിന്നെ അത്യാവശ്യം ഡാൻസൊക്കെ ചെയ്യും. കുട്ടികൾക്ക് ഇഷ്ടപ്പെടുന്ന രീതിയിൽ അങ്ങനെ ക്ലാസ് എടുക്കാൻ ടിക്ടോക് വിഡിയോകൾ സഹായിച്ചെന്നാണ് എന്റെ വിശ്വാസം. അതു എല്ലാവർക്കും ഇഷ്ടമായെന്ന് അറിഞ്ഞതിൽ ഒരുപാട് സന്തോഷം. നിമിഷനേരം കൊണ്ട് ക്ലാസ് വൈറലാക്കിയ ട്രോളൻമാർക്ക് നന്ദി..സ്നേഹം..’ ടീച്ചർ പറയുന്നു.