നിവിൻ പോളി – റോഷൻ ആൻഡ്രൂസ് ചിത്രത്തിന് മൈസൂരിൽ പാക്കപ്പ്; ഒരു അത്ഭുതകരമായ യാത്ര അവസാനിക്കുന്നെന്ന് നിവിൻ

നിവിൻ പോളിയെ നായകനാക്കി റോഷൻ ആൻഡ്രൂസ് സംവിധാനം ചെയ്യുന്ന ചിത്രത്തിന്റെ ഷൂട്ടിംഗ് പൂർത്തിയായി. മൈസൂരിൽ വെച്ചാണ് ചിത്രീകരണം പൂർത്തിയായത്. ചിത്രം പാക്ക് അപ്പ് ആയതിന്റെ സന്തോഷം സംവിധായകനും താരങ്ങളും സോഷ്യൽ മീഡിയയിലൂടെ പങ്കുവെച്ചു. രണ്ടു മാസത്തോളം നീണ്ടു നിന്ന ഷൂട്ടിംഗ് യാത്രയാണ് അവസാനിച്ചത്. സല്യൂട്ടിന് ശേഷം റോഷൻ ആൻഡ്രൂസ് സംവിധാനം ചെയ്യുന്ന ചിത്രമാണിത്.

‘ഒരു അത്ഭുതകരമായ യാത്ര അവസാനിക്കുന്നു’ എന്നാണ് പാക്ക് അപ്പ് ചിത്രം പങ്കുവെച്ചു കൊണ്ട് നിവിൻ പോളി കുറിച്ചത്. എല്ലാ സാങ്കേതിക വിദഗ്ദർക്കും കലാകാരൻമാർക്കും നന്ദി പറഞ്ഞുകൊണ്ട് ആയിരുന്നു റോഷൻ ആൻഡ്രൂസിന്റെ കുറിപ്പ്. ‘പാക്ക് അപ്പ് ദിവസം. എന്റെ എല്ലാ സാങ്കേതികവിദഗ്ദർക്കും ആർട്ടിസ്റ്റുകൾക്കും നന്ദി. നിർമാതാക്കാളായ അജിത് വിനായകയ്ക്കും സരത്തിനും ഒരു വലിയ ഹഗ്. പ്രിയപ്പെട്ട നവീൻ, അത്ഭുതകരമായ നിന്റെ തിരക്കഥയ്ക്ക് നന്ദി. എല്ലാവർക്കും സ്നേഹം.’ – പാക്ക് അപ്പ് ചിത്രം പങ്കുവെച്ചു കൊണ്ട് സംവിധായകൻ റോഷൻ ആൻഡ്രൂസ് കുറിച്ചു. ചിത്രം പാക്ക് അപ്പ് ആയതിൽ സന്തോഷം അറിയിച്ച് കൊണ്ട് സൈജു കുറുപ്പും കുറിപ്പ് പങ്കുവെച്ചു. മൈസൂര്‍, ബാംഗ്ലൂര്‍, ചിത്രദുര്‍ഗ, സുന്ദര്‍, ഹോസ്‌പേട്ട് എന്നിവിടങ്ങളിൽ ആയിരുന്നു സിനിമയുടെ ചിത്രീകരണം.

അജു വര്‍ഗീസ്, സൈജു കുറുപ്പ്, സാനിയ ഇയ്യപ്പന്‍, സിജു വില്‍സന്‍ എന്നിവരും സിനിമയില്‍ പ്രധാന വേഷങ്ങളില്‍ എത്തുന്നുണ്ട്. ജേക്ക്‌സ് ബിജോയുടേതാണ് സംഗീതം. ഛായാഗ്രഹണം – ആര്‍ ദിവാകര്‍. ‘നമുക്ക് പാര്‍ക്കാം മുന്തിരിതോപ്പുകള്‍’ എന്ന ചിത്രത്തലൂടെ മലയാളികള്‍ക്ക് പ്രിയങ്കരിയായ ശാരിയും ചിത്രത്തില്‍ ഒരു പ്രധാന വേഷത്തില്‍ എത്തുന്നുണ്ട്. മഹാവീര്യറാണ് നിവിന്‍ പോളിയുടെ ഏറ്റവും പുതുതായി പുറത്തിറങ്ങാന്‍ ഇരിക്കുന്ന ചിത്രം. ജൂലൈ 22നാണ് ചിത്രം തിയറ്ററുകളില്‍ എത്തുന്നത്.