‘സിനിമയിലെ വനിതാ സംഘടനയായ ഡബ്ല്യുസിസി അധികാരം ദുരുപയോഗം ചെയ്യുന്നു’; പടവെട്ട് സംവിധായകൻ ലിജു കൃഷ്ണ

മലയാള സിനിമാരംഗത്തെ വനിതാ താരങ്ങളുടെ സംഘടനയായ ഡബ്യു സി സിക്ക് എതിരെ പടവെട്ട് സംവിധായകൻ ലിജു കൃഷ്ണ. ഡബ്ല്യു സി സി രൂപം കൊണ്ട സമയത്ത് ആ സംഘടനയും സംഘടനയുടെ ആവശ്യകതയും വളരെ സ്വാഗതാർഹമായി ചിന്തിച്ചയാളാണ് താനെന്ന് ലിജു പറഞ്ഞു. പോപ്പർ സ്റ്റോപ്പ് മലയാളം ചാനലിന് നൽകിയ അഭിമുഖത്തിലാണ് ലിജു ഇങ്ങനെ പറഞ്ഞത്. ഏതൊരു മേഖലയിലും അത്തരത്തിലുള്ള സംഘടനകളും അവരുടെ പ്രവർത്തനങ്ങളും ആവശ്യമാണെന്നും അതിനെ ഒന്നിനും എതിർക്കുന്ന ആളല്ല താനെന്നും ലിജു വ്യക്തമാക്കി.

പക്ഷേ, വ്യക്തികൾ സംഘടനയേക്കാൾ വളർന്ന് കഴിയുമ്പോൾ അവരുടെ വ്യക്തിപരമായ ആവശ്യങ്ങൾക്ക് വേണ്ടി സംഘടനയെ വശത്താക്കി കൊണ്ട് അതിനെ ഒരു ടൂൾ ആയി ഉപയോഗിക്കാൻ പറ്റുമയായിരിക്കാം. ഈ അടുത്ത കാലത്ത് താൻ തുറന്നു പറഞ്ഞുവെന്ന കാര്യങ്ങളിലൊന്നും സംഘടനയോട് എതിർപ്പില്ല. തനിക്കെതിരെ ഒരു പ്രശ്നം വന്നപ്പോൾ തന്നോട് ഡബ്ല്യു സി സി അതിനെക്കുറിച്ച് ചോദിച്ചിട്ടില്ലെന്നും അതിൽ തനിക്ക് പരാതിയില്ലെന്നും ലിജു പറഞ്ഞു. നിയമപരമായ വഴിയിലേക്ക് കാര്യങ്ങൾ നീങ്ങിയപ്പോൾ അതിനോട് പരിപൂർണമായി നീതി പുലർത്തി അച്ചടക്കത്തോടെ മുന്നോട്ട് പോകാനാണ് താൻ ആഗ്രഹിക്കുന്നതെന്നും അദ്ദേഹം പറഞ്ഞു.

നിയമപരമായ ഘട്ടത്തിലേക്ക് കടന്നു കഴിഞ്ഞ ഒരു കാര്യം അവരെ ബോധ്യപ്പെടുത്തേണ്ട ബാധ്യത തനിക്കില്ലെന്നും താനിനി കാര്യങ്ങൾ ബോധ്യപ്പെടുത്തേണ്ടത് മറ്റൊരു സ്പേസിലാണെന്നും ലിജു പറഞ്ഞു. അതിനെ ആ മര്യാദയോടെയാണ് താൻ സമീപിച്ചതെന്നും അത് അവർ മനസിലാക്കണമെന്നും ഇവിടെ കാര്യങ്ങളെ ഇഴകീറി പരിശോധിക്കുന്ന ഒരു കോടതി സിസ്റ്റം ഉണ്ടെന്നും ലിജു പറഞ്ഞു. ആ ഒരു തലത്തിലേക്ക് കാര്യങ്ങൾ എത്തിക്കഴിയുമ്പോൾ പാരലൽ കോടതിയുടെ ആവശ്യം ഇല്ലെന്നും ലിജു പറഞ്ഞു. തന്നോട് പല രീതിയിൽ ഒളിഞ്ഞും തെളിഞ്ഞും ഗീതു മോഹൻദാസ് യുദ്ധം ചെയ്തിട്ടുണ്ടെന്നും താൻ പറയുന്നതു പോലെ തിരക്കഥയിൽ മാറ്റം വരുത്തിയില്ലെങ്കിൽ നിവിൻ പോളി സിനിമ ചെയ്യില്ലെന്ന് വരെ തന്നോട് ഗീതു മോഹൻദാസ് പറഞ്ഞിട്ടുണ്ടെന്നും ലിജു നേരത്തെ ചില മാധ്യമങ്ങൾക്ക് നൽകിയ അഭിമുഖത്തിൽ വ്യക്തമാക്കിയിരുന്നു.