‘പുഴു’വിൽ മമ്മൂട്ടി കഥാപാത്രം പ്രേക്ഷകരെ ഞെട്ടിക്കും; വെളിപ്പെടുത്തി നായിക പാർവതി തിരുവോത്ത്

മമ്മൂട്ടി നായകനായി എത്തുന്ന പുതിയ ചിത്രം ‘പുഴു’വിന്റെ ടീസർ കഴിഞ്ഞദിവസം ആയിരുന്നു റിലീസ് ചെയ്തത്. തികച്ചു വ്യത്യസ്തമായ ലുക്കിലാണ് ടീസറിൽ മമ്മൂട്ടി പ്രത്യക്ഷപ്പെട്ടത്. അതുകൊണ്ടു തന്നെ മികച്ച പ്രേക്ഷകപ്രതികരണമാണ് ടീസറിന് ലഭിച്ചത്. ചിത്രത്തിലെ മമ്മൂട്ടിയുടെ കഥാപാത്രത്തെക്കുറിച്ച് തുറന്നു പറയുകയാണ് നായികയായ പാർവതി തിരുവോത്ത്. പാർവതി പറഞ്ഞ വാക്കുകൾ ഇതിനകം തന്നെ സോഷ്യൽ മീഡിയയിൽ വൈറലായി കഴിഞ്ഞു.

‘ദ ക്യു’ എന്ന ഓൺലൈൻ മാധ്യമത്തിന് നൽകിയ അഭിമുഖത്തിലാണ് പാർവതി മനസു തുറന്നത്. ‘പുഴു’ സിനിമയിലെ മമ്മൂട്ടിയുടെ കഥാപാത്രം പ്രേക്ഷകരെ ഞെട്ടിക്കുമെന്ന് പാർവതി പറയുന്നു. കരിയറിൽ ഇതുവരെ ചെയ്തിട്ടില്ലാത്ത ഒരു റോൾ ആണ് ഈ ചിത്രത്തിൽ മമ്മൂട്ടിയുടേതെന്ന് പാർവതി വ്യക്തമാക്കി. ശക്തമായ പ്രമേയം ആണ് ഈ സിനിമയുടെ ശക്തിയെന്നും അവർ പറഞ്ഞു. ഒരു പരിധി വരെ തന്റെ രാഷ്ട്രീയ ചിന്തകളെയും സ്ത്രീ – പുരുഷ സമത്വ ചിന്തകളെയും പിന്തുണയ്ക്കുന്ന ചിത്രമാണ് പുഴുവെന്നും അതുകൊണ്ട് കൂടിയാണ് താനിത് ചെയ്തതെന്നും പാർവതി പറയുന്നു.

ഇതൊരു പുരോഗമനപരമായ ചിത്രം ആണ്. ഈ ഗംഭീര ചിത്രം പ്രേക്ഷകരുടെ മുന്നിലെത്തുന്നത് കാത്തിരിക്കാന്‍ വയ്യെന്നും മമ്മൂട്ടി ഇതിന്റെ ഷൂട്ടിംഗ് കഴിഞ്ഞപ്പോള്‍ തന്റെ ഫേസ്ബുക്ക് പേജില്‍ കുറിച്ചിരുന്നു. നവാഗതയായ രതീനയാണ് ചിത്രത്തിന്റെ സംവിധാനം. ജോര്‍ജ് ആണ് നിർമ്മാണം. ക്യാമറ – തേനി ഈശ്വര്‍, സംഗീതം – ജെക്‌സ് ബിജോയ്, എഡിറ്റർ – ദീപു ജോസഫ്. ഹര്‍ഷാദ്, സുഹാസ്, ഷറഫു എന്നിവര്‍ ചേര്‍ന്ന് തിരക്കഥ രചിച്ചിരിക്കുന്ന ഈ ചിത്രത്തില്‍ മാളവിക, ഇന്ദ്രന്‍സ്, അന്തരിച്ചു പോയ നടന്‍ നെടുമുടി വേണു എന്നിവരും അഭിനയിച്ചിട്ടുണ്ട്.