ബ്രേക്ക് എടുത്തതല്ല.. സിനിമ ഇല്ലാതെ ഒന്നര വർഷം വീട്ടിലിരുന്നു; ഇനി എന്തു ചെയ്യുമെന്ന തോന്നലുണ്ടായി: പാർവതി

ഔട്ട് ഓഫ് സിലബസിൽ നിന്ന് നോട്ട്ബുക്കിലെ പൂജയായി എത്തിയ മലയാള സിനിമാ പ്രേക്ഷകരുടെ മനസിൽ ഇടം പിടിച്ച നടിയാണ് പാർവതി തിരുവോത്ത്. അഞ്ജലി മേനോൻ സംവിധാനം ചെയ്ത ബാംഗ്ലൂർ ഡേയ്സ് എന്ന സിനിമയിലെ ആർ ജെ സാറ എന്ന കഥാപാത്രം പാർവതി നിരവധി ആരാധകരെ നേടിക്കൊടുത്തു. എന്നു നിന്റെ മൊയ്തീൻ, ചാർലി, ടേക്ക് ഓഫ്, ഉയരെ എന്നു തുടങ്ങി പാർവതിയുടെ അഭിനയമികവ് വെളിപ്പെടുത്തിയ നിരവധി ചിത്രങ്ങൾ മലയാള സിനിമാലോകത്തിന് ലഭിച്ചു.

പാർവതിയുടെ റിലീസ് ആകാനിരിക്കുന്ന അടുത്ത ചിത്രം പുഴു ആണ്. മമ്മൂട്ടിയും പാർവതിയും ആദ്യമായി ഒരുമിക്കുന്നു എന്ന പ്രത്യേകതയോടെയാണ് പുഴു റിലീസിന് ഒരുങ്ങുന്നത്. വലിയ പ്രതീക്ഷയിലെത്തുന്ന ചിത്രം രത്തീനയാണ് സംവിധാനം ചെയ്തിരിക്കുന്നത്. ഏപ്രില്‍ 13 ന് ചിത്രം സോണി ലിവില്‍ റിലീസ് ചെയ്യും. ചിത്രത്തിന്റെ പ്രൊമോഷന്റെ ഭാഗമായി നടന്ന പ്രസ്സ് മീറ്റിൽ തനിക്ക് വന്ന ബ്രേക്കിനെ കുറിച്ച് പാർവതി വെളിപ്പെടുത്തിയിരിക്കുകയാണ്.

കഥാപാത്രങ്ങള്‍ കിട്ടാതെ പോയ ഒന്നൊന്നര വര്‍ഷം ഉണ്ട്. അത് വളരെ ബുദ്ധിമുട്ടുള്ള സമയമായിരുന്നു. ആദ്യസിനിമ കഴിഞ്ഞുള്ള അഞ്ചാറ് വര്‍ഷം എന്നെ ആരും അങ്ങനെ കണ്ടിട്ടില്ല. എന്നാല്‍ ഇപ്പോള്‍, വിവാദങ്ങള്‍ക്കൊക്കെ ശേഷമുള്ള, ഞാനും മാധ്യമങ്ങളും തമ്മിലുള്ള ബന്ധം, പ്രേക്ഷകരും ഞാനും തമ്മിലുള്ള ബന്ധം അതിനൊക്കെ ഒരു പക്വത വന്നിട്ടുണ്ട്. സിനിമകള്‍ ലഭിക്കാത്ത സമയമായിരുന്നു അത്. ആദ്യം ക്യാരക്റ്റര്‍ റോളുകള്‍ കിട്ടി. പിന്നെ ലീഡ് റോളുകളിലേക്ക് വന്നു. ഇപ്പോഴും ക്യാരക്റ്റര്‍ റോളുകളും ചെയ്യുന്നുണ്ട്. ആര്‍ക്കറിയാം എന്ന സിനിമയില്‍ ഞാനല്ല ലീഡ്. കൂടെ ആണെങ്കിലും പൃഥ്വിയുടെയും നസ്രിയയുടെയും സിനിമയാണത്. സോഫി എന്ന കഥാപാത്രത്തിന് പ്രാധാന്യമുണ്ടോ എന്നതാണ് ഞാന്‍ നോക്കുന്നത്.

അതേസമയം, താരത്തിന്റെ പുതിയ ചിത്രത്തിന്റെ ഷൂട്ടിംഗ് ആരംഭിച്ചു. ജീവിതത്തിന്റെ വ്യത്യസ്ത മേഖലകളിലുള്ള അഞ്ച് സ്ത്രീകളുടെ കഥകൾ ഉൾക്കൊള്ളുന്ന ‘ഹേർ’ എന്ന ചിത്രം സംവിധാനം ചെയ്യുന്നത് ലിജിൻ ജോസ് ആണ്. അർച്ചന വാസുദേവ് ആണ് ചിത്രത്തിന്റെ തിരക്കഥ. ചിത്രത്തിന്റെ പൂജ ചടങ്ങുകൾ കഴിഞ്ഞ ദിവസം തിരുവനന്തപുരത്ത് വെച്ച് നടന്നിരുന്നു. അൽപം ഗ്ലാമറസ് ആയാണ് പൂജ ചടങ്ങിൽ പങ്കെടുക്കാൻ പാർവതി എത്തിയത്. ഈ ചിത്രങ്ങൾ ഇപ്പോൾ സോഷ്യൽ മീഡിയയിൽ വൈറലാണ്.