കടലിൽ അകപ്പെട്ട തെരുവുനായയെ രക്ഷപ്പെടുത്തി പ്രണവ്; റിയൽ ലൈഫ് ‘നരൻ’ എന്ന് പ്രേക്ഷകർ; വീഡിയോ

ആദി എന്ന ചിത്രത്തിലൂടെ മലയാള സിനിമയുടെ ഹൃദയം കീഴടക്കിയ താരമാണ് പ്രണവ് മോഹന്‍ലാല്‍. താരപുത്രന്മാരുടെ പോലെ സെലിബ്രിറ്റി ലേബല്‍ തനിക്ക് ആവശ്യമില്ല എന്ന് തുറന്നു പറഞ്ഞു കൊണ്ടാണ് വ്യത്യസ്തമായ ജീവിതം നയിച്ച് പ്രണവ് ശ്രദ്ധേയമാകുന്നത്. ലളിതമായ ജീവിതരീതിയും സ്വന്തമായി സോഷ്യല്‍ മീഡിയ പേജുകള്‍ ഒന്നുമില്ലാത്ത പ്രണവിന്റെ ചിത്രങ്ങള്‍ വളരെ വിരളമായെ സോഷ്യൽ മീഡിയയിൽ ലഭ്യമാകുകയുള്ളു. യാത്രകളെ ഏറെ ഇഷ്ടപ്പെടുന്ന യുവതാരങ്ങളിൽ ഒരാൾ കൂടിയാണ് എല്ലാവരും സ്നേഹത്തോടെ അപ്പു എന്നു വിളിക്കുന്ന പ്രണവ്. പലപ്പോഴും പ്രണവിന്റെ യാത്രാ വീഡിയോകളും ചിത്രങ്ങളും സമൂഹമാധ്യമങ്ങളിൽ വൈറലാകാറുണ്ട്. ഇപ്പോഴിതാ താരത്തിന്റെ പുതിയൊരു വീഡിയോയാണ് ശ്രദ്ധനേടുന്നത്. കടലിൽ അകപ്പെട്ട തെരുവുനായയെ രക്ഷിക്കുന്ന പ്രണവിന്റെ വീഡിയോയാണിത്.

രണ്ടു മിനിറ്റോളം ദൈർഘ്യമുള്ള വീഡിയോയിൽ കടലിൽ നിന്ന് നീന്തിവരുന്ന പ്രണവിനെ കാണാം. കരയോട് അടുക്കുമ്പോഴാണ് കയ്യിലൊരു നായയുണ്ടെന്ന് മനസിലാകുന്നത്. തീരത്ത് നിന്നവരുടെ അടുത്തേക്ക് നീന്തിക്കയറിയ പ്രണവ് നായയെ കരയിലെത്തിച്ചു. രക്ഷപ്പടുത്തിയ തെരുവുനായയെ മറ്റു നായ്ക്കൾക്കൊപ്പം വിട്ടതിനു ശേഷം ഒന്നും സംഭവിക്കാത്ത മട്ടിൽ നടന്നു പോകുന്ന പ്രണവിനെയും കാണാം. വീഡിയോ പുറത്തുവന്നതിന് പിന്നാലെ നിരവധി പേരാണ് താരത്തെ അഭിനന്ദിച്ചു കൊണ്ട് രംഗത്തെത്തിയിരിന്നത്. ‘ചാർളി’, റിയൽ ലൈഫ് ‘നരൻ’ എന്നൊക്കെയാണ് വീഡിയോയ്ക്ക് താഴെ വന്നിരിക്കുന്ന കമന്റുകൾ. മോഹൻലാലിന്റെ ഫാൻ പേജുകളിൽ ഒന്നായ ‘ദ കംപ്ലീറ്റ് ആക്ടർ’ എന്ന അക്കൗണ്ടിലാണ് വീഡിയോ വന്നത്.

മണാലിയില്‍ നിന്നുള്ള പ്രണവിന്‍റെ വീഡിയോയും കഴിഞ്ഞ ദിവസം സമൂഹമാധ്യമങ്ങളില്‍ വൈറലായിരുന്നു. സഞ്ചാരിയായ ആത്മയാനാണ് മണാലിയില്‍ വെച്ച് പ്രണവ് മോഹൻലാലിനെ കണ്ടുമുട്ടിയ കാര്യം ആരാധകരെ അറിയിച്ചത്. വിനീത് ശ്രിനിവാസന്റെ ഹൃദയമെന്ന ചിത്രമാണ് പ്രണവ് മോഹൻലാലിന്റേതായി ഉടൻ പ്രദര്‍ശനത്തിന് എത്താനുള്ളത്. വിനീതിന്‍റെ തിരക്കഥയിലുള്ള ചിത്രത്തില്‍ കല്യാണി പ്രിയദര്‍ശനാണ് നായിക.