ഹിമാചലിൽ നിന്നുള്ള പടങ്ങളുമായി പ്രണവ് മോഹൻലാൽ; അങ്ങനെ ഒരു സ്വന്തം പടം ഇട്ടല്ലോയെന്ന് ആരാധകർ

അഭിനയിച്ച സിനിമകളേക്കാൾ പ്രണവ് മോഹൻലാൽ ചർച്ച ചെയ്യപ്പെടുന്നത് അദ്ദേഹം നടത്തുന്ന യാത്രകൾ കൊണ്ടാണ്. പലപ്പോഴും പല യാത്രികരും പ്രണവിനെ പല സ്ഥലങ്ങളിൽ വെച്ചും കണ്ടുമുട്ടിയിട്ടുണ്ട്. ആ കാര്യങ്ങൾ അവരെല്ലാം സോഷ്യൽമീഡിയകളിലൂടെ പങ്കു വെച്ചിട്ടുമുണ്ട്. എന്നാൽ, പ്രണവ് ഇതുവരെ തന്റെ യാത്രകളുടെ ചിത്രങ്ങളോ വിശേഷങ്ങളോ ആരാധകരുമായി പങ്കുവെച്ചിട്ടില്ല. ഇപ്പോൾ തന്റെ ചില ഹിമാചൽ യാത്രകളുടെ ചിത്രങ്ങൾ ഇൻസ്റ്റഗ്രാമിൽ പങ്കുവെച്ചിരിക്കുകയാണ് പ്രണവ്.

ഏതായാലും പ്രണവ് ആദ്യമായി പങ്കുവെച്ച ചിത്രങ്ങൾക്ക് വൻ വരവേൽപ്പ് ആണ് ആരാധകർ നൽകിയിരിക്കുന്നത്. ‘തലമുറകളുടെ ചാർളി’ എന്നാണ് ഒരാൾ കമന്റ് ബോക്സിൽ കുറിച്ചത്. ‘വിളിക്കണം എന്നുള്ള ഡയറക്ടർക്ക് ഇപ്പോ വിളിക്കാം, ആള് റേഞ്ച് ഉള്ള സ്ഥലത്താ’, ‘അവിടെ റേഞ്ച് ഉണ്ടോ?’, ‘ഒത്തിരി ഇഷ്ടം, ഒന്ന് കാണണം എന്നുണ്ട്, പറ്റുവോ ആവോ’ എന്നിങ്ങനെ പോകുന്നു കമന്റുകൾ. പ്രണവ് മോഹൻലാലിന്റെ ഇൻസ്റ്റഗ്രാമിൽ ആകെ 18 പോസ്റ്റ് ആണ് ഉള്ളത്. ഇതിൽ ആദ്യമായാണ് ഇപ്പോൾ യാത്രാചിത്രങ്ങൾ പങ്കുവെക്കുന്നത്. ബാക്ക്പാക്കുമായി നിൽക്കുന്ന പ്രണവിന്റെ ചിത്രവും കൂടാതെ പ്രണവ് പകർത്തിയ ചിത്രങ്ങളുമാണ് ഇൻസ്റ്റഗ്രാമിൽ പങ്കുവെച്ചിരിക്കുന്നത്. ഹൃദയം സിനിമയുടെ നിർമാതാവ് വിശാഖ് സുബ്രഹ്മണ്യവും കമന്റുമായി എത്തിയിട്ടുണ്ട്. ഇതിനിടയിൽ അക്കൗണ്ട് ഹാക്ക് ആയതാണോ എന്ന് ചിലർ സംശയം പ്രകടിപ്പിച്ചിട്ടുണ്ട്.

പ്രണവ് മോഹൻലാലിനെ നായകനാക്കി വിനീത് ശ്രീനിവാസൻ സംവിധാനം ചെയ്ത സിനിമ ഇപ്പോഴും തിയറ്ററുകളിൽ വിജയകരമായി പ്രദർശനം തുടരുകയാണ്. ഒടിടി പ്ലാറ്റ്ഫോമായ ഹോട്ട്സ്റ്റാറിലും ഹൃദയം സ്ട്രീമിംഗ് ആരംഭിച്ചു. ചാച്ചാച ചാച്ചി ധാബ, മുധ് വില്ലേജ് ഫോട്ടോകള്‍ ആണ് പ്രണവ് മോഹൻലാൽ സോഷ്യൽമീഡിയയിൽ പങ്കുവെച്ചത്. തുടർച്ചയായ അഞ്ചാം വാരത്തിലും മികച്ച പ്രതികരണം നേടിയാണ് ഹൃദയം പ്രദർശനം തുടരുന്നത്.