തുടക്കം ഗംഭീരമാക്കി ബ്രിന്ദ മാസ്റ്റർ; തകർപ്പൻ പെർഫോമൻസുമായി ദുൽഖറും നായികമാരും; ‘ഹേയ് സിനാമിക’ സൂപ്പറെന്ന് പ്രിവ്യൂ റിപ്പോർട്ട്

കാത്തിരിപ്പുകൾക്ക് ഒടുവിൽ ദുൽഖൽ സൽമാൻ നായകനായി എത്തുന്ന തമിഴ് ചിത്രം ‘ഹേയ് സിനാമിക’ ഇന്ന് റിലീസ് ആകുന്നു. കഴിഞ്ഞ ദിവസം ചിത്രത്തിന്റെ പ്രിവ്യൂ ഷോ നടന്നിരുന്നു. സംവിധായക എന്ന നിലയിൽ ബ്രിന്ദ മാസ്റ്ററുടെ ഗംഭീര അരങ്ങേറ്റമാണ് ‘ഹേയ് സിനാമിക’ എന്ന ചിത്രമെന്ന് സിനിമ കണ്ടവർ ഒരേ സ്വരത്തിൽ വ്യക്തമാക്കുന്നു. ദുൽഖർ സൽമാന് ഒപ്പം നായികമാരായ അദിതി റാവുവും കാജല്‍ അഗര്‍വാളും മികച്ച പ്രകടനമാണ് ചിത്രത്തിൽ കാഴ്ച വെച്ചിരിക്കുന്നത്.

ചെന്നൈയിൽ നടന്ന പ്രിവ്യൂ ഷോയിൽ നിരവധി പ്രമുഖർ പങ്കെടുത്തു. വളരെ മികച്ച ഒരു പ്രണയകഥയും ദുൽഖർ – അദിതി, ദുൽഖർ – കാജൾ കെമിസ്ട്രിയും ചിത്രത്തിൽ വളരെ മനോഹരമാണെന്ന് ചിത്രം കണ്ടവർ വ്യക്തമാക്കുന്നു. സംവിധായക എന്ന നിലയിൽ ബ്രിന്ദ മാസ്റ്ററുടെ ഗംഭീര അരങ്ങേറ്റമാണ് ചിത്രമെന്നും കോമഡി സീനുകൾ പ്രത്യേകിച്ച് യോഗി ബാബുവിന്റെ രംഗങ്ങൾ ചിരി പടർത്തുന്നതുമാണെന്നുമാണ് വിലയിരുത്തൽ. ശുഭപര്യവസായിയായ നല്ല ഒരു ഫീൽ ഗുഡ് മൂവിയാണ് ‘ഹേയ് സിനാമിക’ എന്നും നിരൂപകർ വിലയിരുത്തി.

ഏതായാലും അച്ഛന്റെയും മകന്റെയും ചിത്രങ്ങൾ ഒരേദിവസം തിയറ്ററുകളിലേക്ക് എത്തുന്നതിന്റെ ആവേശത്തിലാണ് ആരാധകർ. ദുൽഖർ സൽമാൻ നായകനായ തമിഴ് ചിത്രം ‘ഹേയ് സിനാമിക’ ഇന്ന് തിയറ്ററുകളിലേക്ക് എത്തുമ്പോൾ മമ്മൂട്ടി നായകനായി എത്തുന്ന അമൽ നീരദ് ചിത്രം ‘ഭീഷ്മ പർവ’വും ഇന്ന് തിയറ്ററുകളിലേക്ക് എത്തും. ഹേയ് സിനാമികയുടെ ഛായാഗ്രഹണം പ്രീത ജയരാമനാണ്. ജിയോ സ്റ്റുഡിയോസ്, ഗ്ലോബല്‍ വണ്‍ സ്റ്റുഡിയോസ്, വയാകോം 18 സ്റ്റുഡിയോസ് എന്നീ ബാനറുകളിലാണ് നിര്‍മ്മാണം. ചിത്രത്തിലെ ഗാനങ്ങൾക്ക് സംഗീതം പകർന്നിരിക്കുന്നത് ഗോവിന്ദ് വസന്തയാണ്.