‘പുതിയ മുഖം’ ഇനി മറന്നേക്കൂ; പുതിയ പാട്ട് പാടി പൃഥ്വിരാജ് എത്തി

പൃഥ്വിരാജ് പാടിയ പാട്ട് എന്ന് കേൾക്കുമ്പോൾ നമ്മുടെ മനസിലേക്ക് ഓടിയെത്തുന്നത് ‘പുതിയ മുഖം’ എന്ന പാട്ടാണ്. ‘പുതിയ മുഖം’ എന്ന സിനിമയിൽ പൃഥ്വിരാജ് പാടിയ ഈ പാട്ട് അമർ അക്ബർ അന്തോണിയിൽ ഇന്ദ്രജിത്ത് തൊണ്ട കീറി പാടിയത് കണ്ട് നമ്മൾ ചിരിച്ചതാണ്. എന്നാൽ, ഈ പാട്ട് തൽക്കാലത്തേക്ക് മറന്നേക്കൂ എന്നാണ് പൃഥ്വിയുടെ ആരാധകരോട് പറയാനുള്ളത്. പൃഥ്വിരാജ് നായകനായി എത്തുന്ന പുതിയ ചിത്രം ഭ്രമത്തിൽ ഒരു ഗാനം പാടുന്നുണ്ട് പൃഥ്വിരാജ്. ‘ലോകം ചേറടിഞ്ഞ ഗോളം’ എന്ന് തുടങ്ങുന്ന ഗാനമാണ് പൃഥ്വി പാടിയിരിക്കുന്നത്. ചിത്രത്തിന്റെ ലിറിക്കൽ വീഡിയോ പുറത്തിറങ്ങി. ജോ പോളിന്റെ വരികൾക്ക് ഈണം നൽകി കമ്പോസ് ചെയ്തിരിക്കുന്നത് ജേക്ക്സ് ബിജോയ് ആണ്.

ഏതായാലും പൃഥ്വിരാജിന്റെ പുതിയ പാട്ട് ആരാധകർ രണ്ടു കൈയും നീട്ടി സ്വീകരിച്ചു. പാട്ട് പൊളിച്ചെന്നാണ് ഒരാൾ കമന്റ് ബോക്സിൽ കുറിച്ചത്. ‘പാടണം, അഭിനയിക്കണം, സംവിധാനം ചെയ്യണം, സ്ക്രിപ്റ്റ് കേൾക്കണം, പ്രൊഡ്യൂസർ ആകണം … അല്ല രാജുവേട്ട നിങ്ങൾക് ഒരു ഡേ 24hrs തന്നെ അല്ലെ’ – എപിഐ മലയാളത്തിന്റെ യു ട്യൂബ് ചാനലിൽ പങ്കുവെച്ച വീഡിയോയ്ക്ക് താഴെ ഇത്തരത്തിൽ നിരവധി കമന്റുകളാണ് ഉള്ളത്.

അന്ധനാണെന്ന് നടിക്കുന്ന ഒരു പിയാനിസ്റ്റിന്റെ ജീവിതമാണ് ഭ്രമം സിനിമയിൽ പറയുന്നത്. ഒരു കൊലപാതകരഹസ്യത്തിൽ ഇയാൾ കുടുങ്ങിക്കിടക്കുന്നതിനാൽ ഇയാളുടെ സസ്പെൻസും പ്രചോദനവും ആശയക്കുഴപ്പവും നിറഞ്ഞ കഥയാണ് ചിത്രം പറയുന്നത്. ജേക്സ് ബിജോയ് ആണ് ചിത്രത്തിന്റെ പശ്ചാത്തലസംഗീതം. ചിത്രത്തിന്റെ സംവിധായകൻ ആയ രവി കെ ചന്ദ്രൻ ആണ് ചിത്രത്തിന്റെ ഛായാഗ്രഹണവും. എപി ഇന്റർനാഷണലിന്റെയും വയാകോം 18 സ്റ്റുഡിയോസിന്റെയും ബാനറിലാണ് ചിത്രം നിർമ്മിച്ചിരിക്കുന്നത്. ആമസോൺ പ്രൈം വീഡിയോയിൽ ഒക്ടോബർ ഏഴിനാണ് ഭ്രമം റിലീസ് ചെയ്യുന്നത്.