‘മലയാളത്തിൽ എനിക്ക് സുഹൃത്തുക്കളുണ്ട്. നല്ല പ്രൊജക്ട് വന്നാൽ ചെയ്യും, പക്ഷേ ഒരു സഹായം ആവശ്യമാണ്’ – വെളിപ്പെടുത്തി പ്രിയങ്ക ചോപ്ര

തെന്നിന്ത്യൻ സിനിമകളോടുള്ള ഇഷ്ടത്തെക്കുറിച്ചും താൽപര്യത്തെക്കുറിച്ചും തുറന്നു പറഞ്ഞ് ഹോളിവുഡ് താരം പ്രിയങ്ക ചോപ്ര. വളരെ ബഹുമാനത്തോടെയാണ് തെന്നിന്ത്യൻ സിനിമ ഇൻഡസ്ട്രിയെ കാണുന്നതെന്ന് വ്യക്തമാക്കിയ പ്രിയങ്ക തമിഴിലും തെലുങ്കിലും മലയാളത്തിലും തനിക്ക് നിരവധി സുഹൃത്തുക്കളുണ്ടെന്നും തുറന്നു പറഞ്ഞു.

തെന്നിന്ത്യയിലെ ഈ ഭാഷകളിൽ ഏതെങ്കിലും ഒരു നല്ല പ്രൊജക്ട് വന്നാൽ അഭിനയിക്കാൻ തയ്യാറാണെന്നും പ്രിയങ്ക ചോപ്ര വ്യക്തമാക്കി. ഭാഷയുടെ കാര്യത്തിൽ അൽപം സഹായം വേണ്ടി വരുമെന്നും പ്രിയങ്ക വ്യക്തമാക്കി. മലയാള മനോരമയ്ക്ക് നൽകിയ അഭിമുഖത്തിലാണ് ഇക്കാര്യങ്ങളെക്കുറിച്ച് താരം വെളിപ്പെടുത്തിയത്. സിനിമ മേഖലയിൽ താൻ അഭിമുഖീകരിച്ച പ്രതിസന്ധികളെക്കുറിച്ചും ബുദ്ധിമുട്ടുകളെക്കുറിച്ചും നടി തുറന്നു പറഞ്ഞു.

ജീവിതത്തില്‍ പ്രതിസന്ധികളുണ്ടാകും. താഴെ വീണു കിടക്കുന്നവരെ ചവിട്ടാനാണ് ആളുണ്ടാകുക. സ്വയം സ്‌നേഹിക്കുകയും ബഹുമാനിക്കുകയും ചെയുമ്പോഴാണ് പ്രതിസന്ധികളെ അതിജീവിക്കാൻ കഴിയുക. ഈ പാഠം വളരെ ചെറുപ്പത്തില്‍ തന്നെ മാതാപിതാക്കള്‍ തനിക്ക് പകര്‍ന്നു തന്നതാണെന്നും നടി പറഞ്ഞു. പ്രിയങ്ക ചോപ്ര പ്രധാന വേഷത്തില്‍ എത്തുന്ന ‘സിറ്റഡല്‍’ എന്ന ആമസോണ്‍ വെബ് സീരീസ് ഈ മാസം 28ന് റിലീസ് ചെയ്യും.