‘ജയറാം പല സംവിധായകരെയും തേച്ചു; അതിന്റെ ഫലമാണ് ഇപ്പോൾ അനുഭവിക്കുന്നത്’ – പ്രൊഡക്ഷൻ കൺട്രോളർ പറയുന്നു

നടൻ ജയറാം പല സംവിധായകരെയും ഡേറ്റ് കൊടുക്കാതെ പറ്റിച്ചിട്ടുണ്ടെന്ന് പ്രൊഡക്ഷൻ കൺട്രോളർ മണക്കാട് രാമചന്ദ്രൻ. സംവിധായകൻ രാജസേനനും നടൻ ജയറാമും തമ്മിൽ പിരിയാൻ ഉണ്ടായ കാരണത്തെക്കുറിച്ച് തുറന്നു പറഞ്ഞിരിക്കുകയാണ് രാമചന്ദ്രൻ. കടിഞ്ഞൂല്‍ കല്യാണം, മേലേപ്പറമ്പില്‍ ആണ്‍വീട്, ഞങ്ങള്‍ സന്തുഷ്ടരാണ്, കൊട്ടാരം വീട്ടിലെ അപ്പൂട്ടന്‍ തുടങ്ങി ജയറാമിന് മലയാള സിനിമയില്‍ സ്ഥാനം ഉറപ്പിച്ച ചിത്രങ്ങളുടെ സംവിധായകനാണ് രാജസേനന്‍.

ജയറാം – രാജസേനൻ കൂട്ടുകെട്ടിൽ പതിനാറോളം സിനിമകൾ എത്തിയിട്ടുണ്ട്. എന്നാൽ, പിന്നീട് ഈ ജോഡി പിരിയുകയായിരുന്നു. മാസ്റ്റർ ബിൻ ചാനലിന് നൽകിയ അഭിമുഖത്തിലാണ് പ്രൊഡക്ഷൻ കൺട്രോളർ ജയറാമിം രാജസേനനും തമ്മിൽ പിരിയാനുള്ള കാരണത്തെക്കുറിച്ച് പറയുന്നത്. പുതിയ സംവിധായകർക്ക് ഡേറ്റ് കൊടുക്കാതെ ഒരുപാട് പേരെ ജയറാം കറക്കിയിട്ടുണ്ട്. ചെറിയ സംവിധായകര്‍ക്ക് ഡേറ്റ് കൊടുക്കാതെ പറ്റിച്ചിട്ടുണ്ട്. ലാല്‍ജോസ് കഥ പറയാന്‍ പോയപ്പോള്‍ ഡേറ്റ് കൊടുത്തില്ല. ഒരുപാട് പേരെ ചുമ്മാ നടത്തിയിട്ടുണ്ട്. ഈ ദിവസം തുടങ്ങാമെന്ന് പറയും. അയാള് വിശ്വസിച്ച് പോകും. എന്നാല്‍ അവസാനം ഈ സമയത്ത് മറ്റൊരാള്‍ക്ക് കൊടുത്തെന്ന് അറിയുമെന്നും രാമചന്ദ്രൻ പറഞ്ഞു.

ഒരു സമയത്ത് ജയറാമിനെ രക്ഷിച്ച് നിർത്തിയത് രാജസേനൻ ആയിരുന്നു. എല്ലാ പടങ്ങളും ഹിറ്റ് ആയിരുന്നു. രാജസേനന്റെ അടുത്ത് നിന്നും പോയാല്‍ വേറെ പടം ചെയ്യാമെന്ന് ജയറാമിന് തോന്നിയിരിക്കും. ആ പടം വേണ്ട, ഈ പടം കുറച്ചു കൂടെ നല്ലതാണ് എന്ന് പറഞ്ഞ് ജയറാമിനെ തെറ്റിക്കാനും ആളുകൾ ഉണ്ടായിരുന്നു. ജയറാമിനെ പിടിച്ച് അങ്ങനെ തന്നെ നിന്നത് രാജസേനന് സംഭവിച്ച അബദ്ധമായിരുന്നെന്നും രാമചന്ദ്രൻ പറഞ്ഞു. ജയറാം ഇട്ടിട്ട് പോയപ്പോൾ രാജസേനന് വേറെ പിടിയില്ലാതെ പോയെന്നും വെറെ പടങ്ങൾ ചെയ്ത് നിന്നില്ലെന്നും അദ്ദേഹം പറഞ്ഞു.