പുനീത് രാജ്‌കുമാറിന്റെ കണ്ണുകൾ നാരായണ നേത്രാലയക്ക് ദാനം ചെയ്‌തു

കന്നഡ സൂപ്പർസ്റ്റാർ പുനീത് രാജ്‌കുമാർ ഹൃദയാഘാതത്തെ തുടർന്ന് അന്തരിച്ചുവെന്ന വാർത്ത ഞെട്ടലോടെയാണ് ഇന്ത്യൻ സിനിമാലോകം ഉൾക്കൊണ്ടത്. ഇന്ന് രാവിലെയാണ് ഹൃദയാഘാതത്തെ തുടർന്ന് പുനീത് രാജ്കുമാറിനെ ബംഗളൂരുവിലെ വിക്രം ആശുപത്രിയിൽ പ്രവേശിപ്പിച്ചത്. വിവരം അറിഞ്ഞ് നിരവധി ആരാധകരാണ് ആശുപത്രിയിലേക്ക് ഇരച്ചെത്തിയത്.

മരണശേഷം തന്റെ കണ്ണുകൾ ദാനം ചെയ്യുമെന്ന് സമ്മതം ഒപ്പിട്ടുനൽകിയിരുന്ന അദ്ദേഹത്തിന്റെ മരണശേഷം പുനീതിന്റെ അച്ഛൻ രാജ്‌കുമാറിന്റെ പേരിലുള്ള നാരായണ നേത്രാലയയിലെ ഡൊണേഷൻ സെന്ററിലേക്ക് ഇപ്പോൾ ദാനം ചെയ്‌തിരിക്കുകയാണ്. രാവിലെ 11.40ഓടെ കടുത്ത നെഞ്ച് വേദനയോടെയാണ് അത്യാഹിത വിഭാഗത്തിലേക്ക് സൂപ്പർസ്റ്റാറിനെ കൊണ്ടുവന്നുവെന്നാണ് ആശുപത്രി പുറത്തിറക്കിയ കുറിപ്പിൽ പറയുന്നത്. ഒട്ടും തന്നെ അദ്ദേഹം പ്രതികരിക്കുന്നില്ലായിരുന്നുവെന്നും കുറിപ്പിൽ പറയുന്നു. അപ്പുവെന്നാണ് ആരാധകർക്കിടയിൽ പുനീത് രാജ്‌കുമാർ അറിയപ്പെടുന്നത്.

ഇതിഹാസ നടൻ രാജ്‍കുമാറിന്റെ മകനാണ് പുനീത് രാജ്‍കുമാര്‍. കന്നഡ ചലച്ചിത്ര ലോകത്ത് എന്ന് ഏറ്റവും തിരക്കുള്ള നായകനായിരുന്നു പുനീത്. 1975ലാണ് പുനീത് ജനിച്ചത്. ബെട്ടാഡ ഹൂവുവിലെ അപ്പു എന്ന കഥാപാത്രം പുനീതിന് മികച്ച ബാലതാരത്തിനുള്ള ദേശീയ അവാർഡിന് അർഹനാക്കി. 2002 ലെ അപ്പു (2002) എന്ന ചിത്രത്തിലാണ് പുനീത് ആദ്യമായി പ്രധാന കഥാപാത്രമായി അഭിനയിക്കുന്നത്. അഭി (2003), വീര കന്നഡിഗ (2004), മൌര്യ (2004), ആകാശ് (2005), ആരസു (2007), മിലാന (2007), വംശി (2008), റാം (2009), ജാക്കീ (2010), ഹുഡുഗരു (2011), രാജകുമാര (2017) തുടങ്ങിയ വാണിജ്യാടിസ്ഥാനത്തിൽ വിജയകരമായ നിരവധി ചിത്രങ്ങളിൽ അഭിനയിക്കുകയുണ്ടായി. കന്നഡ സിനിമയിലെ ഏറ്റവും ജനപ്രീതിയുള്ള താരവും ഏറ്റവും പ്രതിഫലം വാങ്ങുന്നയാളുമാണ് അദ്ദേഹം.