രവിവർമ്മ ചിത്രങ്ങളിലെ അഴകേറും സുന്ദരിയായി രചന നാരായണൻകുട്ടി; ശ്രദ്ധ നേടി ഫോട്ടോയും വീഡിയോയും

മറിമായം എന്ന ഹാസ്യ പരമ്പരയിലൂടെ പ്രേക്ഷക ഹൃദയം കീഴടക്കിയ താരമാണ് രചന നാരായണൻകുട്ടി. ഈയൊരു സീരിയലിലൂടെ താരം സിനിമയിലേക്കും എത്തി. റേഡിയോ മാംഗോയിൽ ആർജെ ആയി ജോലി നോക്കുന്നതിനിടെ കുട്ടികളെ പഠിപ്പിക്കണം എന്ന് ആഗ്രഹത്തിലുടെ താരം സ്കൂൾ അധ്യാപികയായി. ഇതേ തുടർന്ന് ബിഎഡ് പഠിച്ചു. അങ്ങനെ ദേവമാത സിഎംഐ സ്കൂളിൽ ഇംഗ്ലീഷ് അധ്യാപികയായി ജോലി നോക്കുന്നതിനിടെയായിരുന്നു രചനയുടെ വിവാഹം. ‘ലക്കി സ്റ്റാർ’ എന്ന ചിത്രത്തിലെ അഭിനയത്തിലൂടെയാണ് രചന സിനിമ പ്രേമികൾക്ക് സുപരിചിതയായത്. ചിത്രത്തിൽ ജയറാമിന്റെ നായികയായാണ് താരം വേഷമിട്ടത്. പിന്നീട് ആമേൻ, പുണ്യാളൻ അഗർബത്തീസ്, തിങ്കൾ മുതൽ വെള്ളിവരെ, ലൈഫ് ഓഫ് ജോസുകുട്ടി, പുതിയ നിയമം തുടങ്ങി നിരവധി ചിത്രങ്ങളിൽ താരം ചെറുതും വലുതുമായ വേഷങ്ങളെ കൈകാര്യം ചെയ്തിട്ടുണ്ട്.

മികച്ചൊരു നർത്തകിയും അവതാരകയും കൂടിയായ രചനയുടെ പുതിയ ഫോട്ടോഷൂട്ടാണ് ഇപ്പോൾ ശ്രദ്ധ നേടുന്നത്. രാജാരവിവർമ്മ ചിത്രങ്ങളെ പുനഃരാവിഷ്കരിച്ചുകൊണ്ടുള്ള ചിത്രങ്ങളാണ് രചന പങ്കുവെച്ചിരിക്കുന്നത്. രവിവർമ്മയുടെ ‘വീണമീട്ടുന്ന സ്ത്രീ’ എന്ന പെയിന്റിങ്ങാണ് രചന പുനഃരാവിഷ്കരിച്ചിരിക്കുന്നത്. നിതിൻ നാരായണനാണ് മനോഹരമായ ഈ ചിത്രങ്ങൾ ഒരുക്കിയിരിക്കുന്നത്.