വിധിയെ എതിർത്ത് പ്രേമത്തിന് ജയിക്കാനാകുമോ? ഹോളിവുഡ് മേക്കിങ്ങ് ശൈലിയുമായി രാധേ ശ്യാം ട്രെയ്‌ലർ; വീഡിയോ

പ്രഭാസും പൂജ ഹെഗ്‌ഡെയും അഭിനയിച്ച് രാധാകൃഷ്ണ കുമാർ രചനയും സംവിധാനവും നിർവ്വഹിക്കുന്ന ഒരു ഇന്ത്യൻ റൊമാന്റിക് ഡ്രാമ ചിത്രമായ രാധേ ശ്യാമിന്റെ ട്രെയ്‌ലർ പുറത്തിറങ്ങി. യുവി ക്രിയേഷൻസും ടി-സീരീസും ചേർന്നാണ് ചിത്രം നിർമ്മിക്കുന്നത്. നേരത്തെ തന്നെ രാധേ ശ്യാം എന്ന ചിത്രത്തിലെ ഫോട്ടോകളും പാട്ടുകളും ഓൺലൈനിൽ തരംഗമായിരുന്നു.

1970-കളിലെ യൂറോപ്പ് പശ്ചാത്തലമാക്കി, ചിത്രത്തിന്റെ സംഗീതം ജസ്റ്റിൻ പ്രഭാകരനും മനോജ് പരമഹംസ ഛായാഗ്രഹണവും കോത്തഗിരി വെങ്കിടേശ്വര റാവു എഡിറ്റിംഗും നിർവ്വഹിച്ചിരിക്കുന്നു. ഭുഷൻ കുമാര്‍ നിർമിക്കുന്ന ചിത്രത്തിന്റെ ആക്ഷന്‍ നിക്ക് പവൽ ആണ്. ശബ്‌ദ രൂപകല്‍പന റസൂല്‍ പൂക്കുട്ടിയും നൃത്തം വൈഭവിയും കോസ്റ്റ്യൂം ഡിസൈനര്‍ തോട്ട വിജയഭാസ്‌കർ, ഇഖ ലഖാനി എന്നിവരുമാണ്.

പ്രധാന കഥാപാത്രങ്ങളായി സച്ചിൻ ഖറേഡേക്കര്‍, പ്രിയദര്‍ശിനി, മുരളി ശര്‍മ, സാഷ ഛേത്രി, കുനാല്‍ റോയ് കപൂര്‍ തുടങ്ങിയവർ എത്തുന്നു. പ്രഭാസ് ചിത്രത്തിൽ വിക്രമാദിത്യ എന്ന കഥാപാത്രമായാണ് എത്തുന്നത്. പ്രേരണ എന്ന കഥാപാത്രമായാണ് ‘പൂജ ഹെഗ്ഡെ’ എത്തുന്നത്. രാധാ കൃഷ്ണ കുമാർ ആണ് ചിത്രത്തിന്റെ സംവിധാനം. തെലുങ്ക്, ഹിന്ദി, തമിഴ്, മലയാളം ഭാഷകളിലാണ് ചിത്രം എത്തുക.

ചിത്രം 2021 ജൂലൈ 30-ന് റിലീസ് ചെയ്യാനായിരുന്നു ആദ്യം തീരുമാനിച്ചിരുന്നത്. എന്നാൽ ഇന്ത്യയിലെ കോവിഡ്-19 പകർച്ചവ്യാധി കാരണം അത് മാറ്റിവച്ചു. പിന്നീട് ചിത്രം തെലുങ്ക്, ഹിന്ദി, തമിഴ്, കന്നഡ, മലയാളം എന്നീ ഭാഷകളിൽ സംക്രാന്തി ഉത്സവത്തോടനുബന്ധിച്ച് 2022 ജനുവരി 14-ന് റിലീസ് ചെയ്യുവാൻ തീരുമാനിക്കുകയായിരുന്നു.