റംസാൻ ആടി, പെർഫോമൻസിൽ ഷൈനിന്റെ ആറാട്ട്; യുട്യൂബിൽ ട്രെൻഡിങ്ങിൽ നമ്പർ 1 ആയി രതിപുഷ്പം വീഡിയോ

തിയറ്ററുകളിൽ നിറഞ്ഞ കൈയടികൾ നേടി ജൈത്രയാത്ര തുടരുകയാണ് മമ്മൂട്ടി നായകനായി എത്തിയ ഭീഷ്മപർവം. അമൽ നീരദ് സംവിധാനം ചെയ്ത ചിത്രം മമ്മൂട്ടിയുടെ കരിയറിലെ തന്നെ ഏറ്റവും വലിയ വിജയമായി മാറിയിരിക്കുകയാണ്. അമൽ നീരദിന് ഒപ്പം ദേവദത്ത് ഷാജിയും ചേർന്നാണ് ചിത്രത്തിന്റെ രചന. ചിത്രത്തിലെ ചില ഗാനങ്ങൾ സിനിമ ഇറങ്ങുന്നതിന് മുമ്പ് തന്നെ വൈറൽ ആയിരുന്നു. ഭീഷ്മപർവത്തിലെ ഏറെ വൈറലായ ഗാനം ‘രതിപുഷ്പം’ ത്തിന്റെ വീഡിയോ ആണ് ഇപ്പോൾ യുട്യൂബിൽ റിലീസ് ചെയ്തിരിക്കുന്നത്. 123 മ്യൂസിക്സിന്റെ യുട്യൂബ് ചാനൽ വഴിയാണ് വീഡിയോ സോംഗ് റിലീസ് ചെയ്തത്. റിലീസ് ചെയ്ത് 12 മണിക്കൂർ മാത്രം കഴിയുമ്പോഴേക്കും ഒരു മില്യണിന് അടുത്ത് ആളുകളാണ് വീഡിയോ സോംഗ് കണ്ടിരിക്കുന്നത്. യുട്യൂബ് ട്രെൻഡിംഗിൽ ഒന്നാമതാണ് ഈ ഗാനം ഇപ്പോൾ.

വിനായക് ശശികുമാറിന്റെ വരികൾക്ക് സുഷിൻ ശ്യാം സംഗീതം നൽകി ഉണ്ണി മേനോൻ ആണ് ഈ ഗാനം ആലപിച്ചിരിക്കുന്നത്. റംസാൻ ഈ ഗാനരംഗത്തിൽ ആടി തിമിർത്തപ്പോൾ പ്രകടനം കൊണ്ട് ഷൈൻ ടോം ചാക്കോ ആറാടിയിരിക്കുകയാണ്. നൃത്തരംഗങ്ങൾ കൊണ്ട് റംസാൻ ഈ ഗാനരംഗത്ത് തകർത്തപ്പോൾ നോട്ടം കൊണ്ടും ഭാവം കൊണ്ടുമാണ് ഷൈൻ പ്രേക്ഷകഹൃദയങ്ങൾ കീഴടക്കിയിരിക്കുന്നത്. ‘ഈ ഗാനം തിയേറ്ററിൽ കേട്ടപ്പോൾ വേറെ ഫീൽ ആയിരുന്നു’, ‘കുറെ വർഷങ്ങൾക്ക് ശേഷം മലയാളത്തില്‍ ഇത്രയും മനോഹരമായ പാട്ടുകളും ഡാൻസ് കോറിയോഗ്രഫിയും ഒന്നിച്ച് വന്ന സിനിമ ഭീഷ്മ പര്‍വ്വം മാത്രമായിരിക്കും’ അങ്ങനെ പോകുന്നു കമന്റുകൾ.

ശ്രീനാഥ് ഭാസി, സൗബിൻ ഷാഹിർ, സുദേവ് നായർ, ഹരിഷ് ഉത്തമൻ, അബു സലിം, നദിയ മൊയ്തു, ലെന, മാല പാർവതി, കെ പി എ സി ലളിത, അനഘ, വീണ നന്ദകുമാർ, ശ്രിന്ദ, ദിലീഷ് പോത്തൻ എന്നു തുടങ്ങി ഒരു വലിയ താരനിരയാണ് മമ്മൂട്ടിക്ക് ഒപ്പം ഈ ചിത്രത്തിൽ അണിനിരന്നത്. ആനന്ദ് സി ചന്ദ്രൻ ആണ് ക്യാമറ. എഡിറ്റിംഗ് – വിവേക് ഹർഷൻ.