ബിഗ് ബോസ് താരങ്ങളായ രജിത് കുമാറും പവനും നായകന്മാർ ! ‘അഞ്ജലി’ ഒരുങ്ങുന്നു

ആറ്റിങ്ങൽകാരുടെ പുതിയ ചിത്രമായ അഞ്ജലിയിൽ ബിഗ് ബോസ് താരം രജിത് കുമാർ പ്രധാന കഥാപാത്രമായി എത്തുന്നു. അഞ്ജലി പ്രൊഡക്ഷൻസിന്റെ ഏറ്റവും പുതിയ ചിത്രമാണ് അഞ്ജലി എന്ന് പേരിട്ടിരിക്കുന്ന ചിത്രം. മെയ് ആദ്യവാരം ആയിരിക്കും അഞ്ജലിയുടെ ചിത്രീകരണം ആരംഭിക്കുക. ഇന്ത്യയിലും അമേരിക്കയിലും ആയി ചിത്രീകരിക്കുന്ന ഈ ചിത്രത്തിൽ രജിത് കുമാറിനൊപ്പം ബിഗ് ബോസ് താരമായ പവനും എത്തുന്നുണ്ട്.

ഇവരോടൊപ്പം മലയാളത്തിലെ മുൻനിര നടീനടന്മാരും വേഷമിടുന്നു. ആറ്റിങ്ങല്‍ സ്വദേശികളായ രഞ്ജിത്ത് പിള്ള , മുഹമ്മദ് ഷാ എന്നിവർ സംവിധാനം ചെയ്യുന്ന ചിത്രത്തിൽ രജിത് കുമാർ ഒരു വ്യത്യസ്തമാർന്ന വേഷമാണ് അവതരിപ്പിക്കുന്നത്. ഇതിനോടകം രണ്ട് ചിത്രങ്ങളാണ് അഞ്ജലി പ്രൊഡക്ഷൻ നിർമിച്ചിരിക്കുന്നത്. അതിൽ ഒന്നായ താമര അടുത്തമാസം റിലീസിങ്ങിന് എത്തുകയാണ്.

ആരാധകർ നെഞ്ചിലേറ്റിയ ടെലിവിഷൻ റിയാലിറ്റി ഷോ ആയ ബിഗ് ബോസ് സീസൺ ടു വിൽ നിന്നും അപ്രതീക്ഷിതമായി പുറത്താക്കപ്പെട്ട ഡോ. രജിത് കുമാറിനെ സ്വീകരിക്കാനായി നെടുമ്പാശ്ശേരി എയർപോർട്ടിൽ തടിച്ചുകൂടിയ ജനങ്ങൾക്കെതിരെ എറണാകുളം ജില്ലാ കളക്ടർ കേസെടുത്ത വാർത്ത സോഷ്യൽ മീഡിയയിൽ പ്രചരിച്ചു കൊണ്ടിരിക്കുകയാണ്. സംഭവത്തിൽ ഏഴു പേർ കൂടി അറസ്റ്റിൽ ആയിരിക്കുകയാണ്. സംഭവവുമായി ബന്ധപ്പെട്ട് നെടുമ്പാശ്ശേരി പോലീസ് ഇതിനോടകം 13 പേരെയാണ് അറസ്റ്റ് ചെയ്തിരിക്കുന്നത്. കോവിഡ്‌ 19 പടരുന്ന സാഹചര്യത്തിൽ നിരവധി വിലക്കുകളായിരുന്നു സർക്കാർ ഏർപ്പെടുത്തിയിരുന്നത്. ആളുകൾ ഒരുമിച്ചുകൂടുന്ന സ്ഥലങ്ങളായ വിദ്യാഭ്യാസ സ്ഥാപനങ്ങൾ, ആരാധനാലയങ്ങൾ എന്നിവയെല്ലാം വിലക്കിയിരുന്ന ഈ സാഹചര്യത്തിലായിരുന്നു രജിത് കുമാറിനെ സ്വീകരിക്കുവാൻ നിരവധി ആളുകൾ എയർപോർട്ടിൽ എത്തിയത്. 34 പ്രതികളെക്കൂടി തിരിച്ചറിഞ്ഞതായും പോലീസ് രേഖപ്പെടുത്തുന്നുണ്ട്. സി സി ടി വി ദൃശ്യങ്ങളുടെ അടിസ്ഥാനത്തിൽ ആണ് ആദ്യം രണ്ടുപേരെയും പിന്നീട് ഏഴ് പേരെയും അറസ്റ്റ് ചെയ്തത്. രജിത് കുമാർ അടക്കം 75 പേർക്കെതിരെയാണ് കേസെടുത്തിരിക്കുന്നത്.