വീണ്ടും ‘തുറമുഖം’ റിലീസ് മാറ്റി; അവിചാരിതമായി ഉയര്‍ന്നുവന്ന നിയമകാരണങ്ങളാലെന്ന് അണിയറപ്രവര്‍ത്തകര്‍

രാജീവ് രവി ചിത്രം തുറമുഖത്തിന്റെ റിലീസ് വീണ്ടും മാറ്റി. കൊവിഡ് പ്രതിസന്ധിയും മറ്റും കാരണം മുന്‍പ് നിരവധി തവണ ചിത്രത്തിന്റെ റിലീസ് മാറ്റിയിരുന്നു. ഒടുവില്‍ ജൂണ്‍ മൂന്നിന് ചിത്രം റിലീസ് ചെയ്യുമെന്നായിരുന്നു അണിയറപ്രവര്‍ത്തകര്‍ അറിയിച്ചത്. ഇതാണ് വീണ്ടും മാറ്റിയത് ജൂണ്‍ പത്താണ് പുതിയ റിലീസ് തീയതി.

കൊവിഡും സാമ്പത്തിക പ്രശ്‌നങ്ങളും തീയറ്റര്‍ അടച്ചിടലും മൂലമായിരുന്നു മുന്‍പ് ചിത്രത്തിന്റെ റിലീസ് പല തലണ മാറ്റിവച്ചത്. ഇത് അണിയറപ്രവര്‍ത്തകരേയും പ്രേക്ഷകരേയും ഒരുപോലെ നിരാശരാക്കിയിട്ടുണ്ടെന്ന് തുറമുഖം ടീം ഫേസ്ബുക്കില്‍ കുറിച്ചു. വര്‍ഷങ്ങളുടെ പ്രയത്‌നത്തിലൂടെ സൃഷ്ടിച്ചെടുത്ത ഈ ചരിത്ര സിനിമ എന്തു ത്യാഗം സഹിച്ചും ജനങ്ങളുടെ മുന്നില്‍ എത്തിക്കാനാകുമെന്നാണ് പ്രതീക്ഷ. ജൂണ്‍ പത്തിന് ചിത്രം പ്രേക്ഷകരിലെത്തുമെന്നും അണിയറപ്രവര്‍ത്തകര്‍ പറഞ്ഞു.

ഫേസ്ബുക്ക് പോസ്റ്റിന്റെ പൂര്‍ണരൂപം

അവിചാരിതമായി ഉയര്‍ന്നുവന്ന നിയമപരമായ കാരണങ്ങളാല്‍ ‘തുറമുഖ’ത്തിന്റെ റിലീസ് വീണ്ടും ഒരാഴ്ചത്തേക്ക് മാറ്റിവെയ്‌ക്കേണ്ടി വന്നിരിക്കുന്നു. കോവിഡും സാമ്പത്തിക കുടുക്കുകളും തീയറ്റര്‍ അടച്ചിടലും ചലച്ചിത്ര വ്യവസായത്തില്‍ വന്ന മാറ്റങ്ങളും ഒക്കെ കാരണം കഴിഞ്ഞ മൂന്നു കൊല്ലത്തിനുള്ളില്‍ പലതവണ ഉണ്ടായ ഈ മാറ്റിവെയ്ക്കലുകള്‍, സഹൃദയരായ ആസ്വാദകരെയും തീയേറ്റര്‍ പ്രവര്‍ത്തകരെയും അണിയറയില്‍ പ്രവര്‍ത്തിച്ച നൂറുകണക്കിന് ആളുകളെയും ഓരോ പ്രാവശ്യവും നിരാശരാക്കുന്നുണ്ട്. എങ്കിലും വര്‍ഷങ്ങളുടെ പ്രയത്‌നത്തിലൂടെ സൃഷ്ടിച്ചെടുത്ത ഈ ചരിത്ര സിനിമ എന്തു ത്യാഗം സഹിച്ചും ജനങ്ങളുടെ മുന്നില്‍ തിരശ്ശീലയില്‍ എത്തിക്കും എന്ന ദൃഢ നിശ്ചയം ഓരോ തിരിച്ചടിയിലും ഒന്നിനൊന്നു കൂടുന്നതേ ഉള്ളൂ. ജൂണ്‍ പത്തിന് വെള്ളിത്തിരയില്‍ ഈ ചിത്രത്തിന്റെ അനുഭവം നിങ്ങള്‍ക്കു മുന്നില്‍ അവതരിപ്പിക്കാനാകും. അതിനു ഞങ്ങള്‍ സജ്ജരാണ്, പ്രതിജ്ഞാബദ്ധരാണ്!

ശുഭാപ്തി വിശ്വാസത്തോടെ, തുറമുഖത്തിന്റെ അണിയറ പ്രവര്‍ത്തകര്‍.

നിവിന്‍ പോളിയാണ് ചിത്രത്തിലെ നായകന്‍. അര്‍ജുന്‍ അശോകന്‍, ഇന്ദ്രജിത്ത് സുകുമാരന്‍, സുദേവ് നായര്‍, നിമിഷ സജയന്‍, പൂര്‍ണിമ, ദര്‍ശന രാജേന്ദ്രന്‍ തുടങ്ങി വന്‍ താരനിരയാണ് ചിത്രത്തില്‍ അണിനിരക്കുന്നത്.