500 കോടിയും കടന്ന് RRR; ചിത്രത്തിൽ പ്രാധാന്യം ലഭിച്ചില്ല, പോസ്റ്ററുകൾ ഡിലീറ്റ് ചെയ്ത് ആലിയ ഭട്ട്

തിയറ്ററുകളിൽ വമ്പൻ വിജയം സ്വന്തമാക്കി ആർ ആർ ആർ കുതിച്ചു പായുകയാണ്. പ്രേക്ഷകപ്രശംസയും നിരൂപകപ്രശംസയും ഏറ്റുവാങ്ങിയ ചിത്രം 500 കോടി നേട്ടവും സ്വന്തമാക്കിയാണ് തിയറ്ററുകളിൽ പ്രദർശനം തുടരുന്നത്. രാജ്യമൊട്ടാകെ ചിത്രത്തെക്കുറിച്ച് മികച്ച അഭിപ്രായമാണ്. എന്നാൽ, ഇതിനിടയിലാണ് ചിത്രത്തിലെ ഒരു കഥാപാത്രത്തെ അവതരിപ്പിച്ച ആലിയ ഭട്ടിനെ ചുറ്റിപ്പറ്റി വിവാദങ്ങൾ കൊഴുക്കുന്നത്. ചിത്രത്തിൽ സീത എന്ന കഥാപാത്രത്തെയാണ് ആലിയ ഭട്ട് അവതരിപ്പിച്ചത്. എന്നാൽ, ആലിയ ഭട്ടിന്റെ കഥാപാത്രത്തിന് സിനിമയിൽ പ്രാധാന്യം നൽകിയില്ല എന്നാണ് നിരൂപകർ ആരോപണം ഉന്നയിച്ചത്. റാസി, ഹൈവേ, ഉഡ്താ പഞ്ചാബ്, ഡിയർ സിന്ദഗി പോലുള്ള സിനിമകളിൽ ആലിയ ചെയ്ത കഥാപാത്രങ്ങൾ നിരൂപകപ്രശംസ നേടിയിരുന്നു. ആലിയയ്ക്ക് ആർ ആർ ആർ ചിത്രത്തിൽ ചെറിയ വേഷമാണ് നൽകിയതെന്ന് ആയിരുന്നു ആരോപണം.

ചിത്രത്തിൽ ജൂനിയര്‍ എന്‍ ടി ആര് കൊമരം ഭീമായും രാം ചരണ്‍ അല്ലൂരി സീതരാമ രാജുവായുമാണ് എത്തുന്നത്. സീതരാമ രാജുവിന്റെ ബാല്യകാല പ്രണയിനിയായ സീതയായാണ് ആലിയ ഭട്ട് അഭിനയിക്കുന്നത്. ആലിയയ്ക്ക് ആർ ആർ ആർ ചിത്രത്തിൽ വളരെ ചെറിയ വേഷമാണ് നൽകിയതെന്നായിരുന്നു ആരോപണം. വിമർശനങ്ങൾ ഉയർന്ന പശ്ചാത്തലത്തിൽ ആലിയ ചിത്രവുമായി ബന്ധപ്പെട്ട പോസ്റ്റുകൾ തന്റെ ഇൻസ്റ്റഗ്രാം അക്കൗണ്ടിൽ നിന്ന് ഡിലീറ്റ് ചെയ്തു. ആലിയ ഭട്ട് സംവിധായകൻ എസ് എസ് രാജമൗലിയെ ഇൻസ്റ്റഗ്രാമിൽ അണഫോളോ ചെയ്തതായി വാർത്തകൾ പ്രചരിച്ചെങ്കിലും ആലിയ ഭട്ട് ഇതുവരെ രാജമൗലിയെ ഇൻസ്റ്റഗ്രാമിൽ അൺഫോളോ ചെയ്തിട്ടില്ല.

തെന്നിന്ത്യൻ സിനിമയിലേക്കുള്ള ആലിയ ഭട്ടിന്റെ അരങ്ങേറ്റമായിരുന്നു ആർ ആർ ആർ. എന്നാൽ, തന്റെ ആദ്യ തെന്നിന്ത്യൻ ചിത്രത്തിൽ താരം അത്ര തൃപ്തയല്ലെന്നാണ് റിപ്പോർട്ടുകൾ. തെന്നിന്ത്യൻ സിനിമയിലേക്കുള്ള ഏറ്റവും വലിയ ഒരു പ്രവേശനം ആയിരുന്നെങ്കിലും കാര്യങ്ങൾ അത്ര എളുപ്പമല്ലെന്നാണ് റിപ്പോർട്ടുകൾ. അതേസമയം, രാജമൗലിയെ ഇൻസ്റ്റഗ്രാമിൽ ഫോളോ ചെയ്യുന്നത് നിർത്തിയ ആലിയ ഭട്ട് വിവാദങ്ങൾ കനത്തതിനെ തുടർന്ന് വീണ്ടും ഫോളോ ചെയ്യുകയായിരുന്നു. അതേസമയം, എസ് എസ് രാജമൗലി ഇൻസ്റ്റഗ്രാമിൽ ആകെ മൂന്നു പേരെയേ ഫോളോ ചെയ്യുന്നുള്ളൂ. ആർ ആർ ആർ പേജ്, മകൻ എസ് എസ് കാർത്തികേയ, ബാഹുബലി പ്രൊഡ്യൂസർ ഷോബു യാർലാഗഡ്ഡ എന്നിവരെ മാത്രമാണ് രാജമൗലി ഫോളോ ചെയ്യുന്നത്. അതേസമയം, റിപ്പോർട്ടുകൾ പ്രചരിച്ചതിനെ തുടർന്ന് ആലിയ ഭട്ട് തന്റെ മുഖമില്ലാത്ത ഒരു ആർ ആർ ആർ പോസ്റ്റർ ഇൻസ്റ്റഗ്രാമിൽ സ്റ്റോറിയാക്കി. ഇൻസ്റ്റഗ്രാമിൽ 61 മില്യൺ ഫോളോവേഴ്സ് ആണ് ആലിയ ഭട്ടിന് ഉള്ളത്.