ഫോർബ്സ് മാസികയുടെ 30 അണ്ടർ 30ൽ ഇടം നേടി സായ് പല്ലവി; കൈയടിച്ച് സോഷ്യൽ മീഡിയ

സിനിമ പശ്ചാത്തലം ഇല്ലാതെ അൽഫോൺസ് പുത്രൻ സംവിധാനം ചെയ്ത പ്രേമം എന്ന ഒറ്റ ചിത്രത്തിലൂടെ മലയാളി പ്രേക്ഷകരുടെ മനസ്സിൽ ഇടം നേടി ഇപ്പോൾ തെന്നിന്ത്യൻ സിനിമയുടെ സ്ഥിര മുഖമായി മാറുകയും ചെയ്ത നടിയാണ് സായി പല്ലവി. ഒരു നടി ഇങ്ങനെ ആയിരിക്കണം എന്ന പ്രേക്ഷകരുടെ മുൻധാരണകൾ എല്ലാം തിരുത്തി എഴുതിയ താരമാണ് സായിപല്ലവി. ഇപ്പോൾ താരം പുതിയ ഒരു നേട്ടം കൂടി കൈവരിച്ചിരിക്കുകയാണ്. ഫോർബ്സ് മാസികയുടെ 30 അണ്ടർ 30 ൽ ഇടം പിടിച്ചു എന്ന വാർത്ത താരം തന്നെയാണ് ട്വിറ്ററിലൂടെ പങ്കുവെച്ചത്. എല്ലാവർഷം ഫോർബ്സ് മാസിക മൂപ്പത് വയസ്സിൽ താഴെയുളള, സമൂഹത്തിൽ ഏതെങ്കിലും രീതിയിൽ സ്വന്തം മികവ് തെളിയിച്ച ആളുകളെ ഉൾപ്പെടുത്തി 30 അണ്ടർ 30 പട്ടിക തയ്യാറാക്കാറുണ്ട്.

സൗത്തിന്ത്യൻ സിനിമയിൽ നിന്ന് സായ് പല്ലവി മാത്രമാണ് ഇക്കുറി ഫോർബിൽ ഇടം പിടിച്ചിരിക്കുന്നത്. അഭിനയത്തെ കുറിച്ച് യാതൊന്നും അറിയാതെയാണ് താൻ വെള്ളിത്തിരയിലേക്ക് എത്തിയത് എന്നും നിരവധി പ്രതിസന്ധികൾ ഉണ്ടായപ്പോൾ ജനങ്ങൾ ഏറ്റെടുത്തു എന്ന ആത്മവിശ്വാസമാണ് തന്നെ മുന്നോട്ടു നയിച്ചതെന്നും സായിപല്ലവി പറയുന്നു. ഇന്ന് താനും തന്റെ പാതയും ഏതെങ്കിലും സ്ത്രീകൾക്ക് ആത്മവിശ്വാസമായി എന്നറിയുന്നതിൽ സന്തോഷമുണ്ടെന്നും താരം പങ്കുവെക്കുന്നുണ്ട്. സമൂഹത്തിൽ സ്വാധീനിക്കാനുളള ശക്തി അൽപമെങ്കിലും എനിയ്ക്ക് ഉണ്ടെങ്കിൽ അതിനെ വേണ്ടവിധത്തിൽ ശരിയായി ഉപയോഗപ്പെടുത്താൻ താൻ ആഗ്രിക്കുന്നുണ്ടെന്നും സായ് ട്വിറ്ററിൽ കുറിച്ചു.