മോഹന്‍ലാലിന് പകരം ജഗപതി ബാബു; ‘സലാര്‍’ പോസ്റ്റര്‍ പുറത്ത്

‘കെജിഎഫ്’ സംവിധായകന്‍ പ്രശാന്ത് നീല്‍ പ്രഭാസിനെ നായകനാക്കി ഒരുക്കുന്ന ആക്ഷന്‍ ത്രില്ലര്‍ ചിത്രം ‘സലാറി’ല്‍ മോഹന്‍ലാലിന് പകരം ജഗപതി ബാബു. ശ്രുതി ഹാസനാണ് സലാറില്‍ പ്രഭാസിന്റെ നായികയാവുന്നത്. പ്രഭാസിനൊപ്പം ആദ്യമായാണ് ശ്രുതി അഭിനയിക്കുന്നത്. മധു ഗുരുസ്വാമിയാണ് ചിത്രത്തില്‍ വില്ലന്‍ വേഷത്തില്‍ എത്തുന്നത്. ഹൈദരാബാദ് രാമ നായിഡു സ്റ്റുഡിയോസിലായിരുനനു ചിത്രത്തിന്റെ ഷൂട്ടിങ്ങൊക്കെ നടന്നിരുന്നത്.

 

രാജമന്നാര്‍ എന്ന കഥാപാത്രമായി അതിഗംഭീര ലുക്കിലാണ് ജഗപതി ബാബു പ്രത്യക്ഷപ്പെടുന്നത്. നേരത്തെ സൂപ്പര്‍താരം മോഹന്‍ലാലിനെ ഈ കഥാപാത്രത്തിലേയ്ക്ക് അണിയറ പ്രവര്‍ത്തകര്‍ സമീപിച്ചിരുന്നു. ചിത്രത്തിന്റെ റിലീസ് 2022 ഏപ്രില്‍ 14നാണെന്ന് നേരത്തേ തന്നെ പ്രഖ്യാപിച്ചിരുന്നതാണ്. ആഗോളതലത്തില്‍ തീയേറ്ററുകളിലായാണ് ചിത്രം റിലീസ് ചെയ്യുന്നത്. കെജിഎഫ് നിര്‍മ്മാതാക്കളായ ഹൊംബാളെ ഫിലിംസ് ആണ് സലാറും നിര്‍മ്മിക്കുന്നത്. ഹൊംബാളെ ഫിലിംസ് തന്നെ നിര്‍മ്മിക്കുന്ന കെജിഎഫ് 2ന്റെ റിലീസ് തീയതി കഴിഞ്ഞ ദിവസം പ്രഖ്യാപിച്ചിരുന്നു. 2022 ഏപ്രില്‍ 14നാണ് കെജിഎഫ് 2 തീയേറ്ററുകളിലെത്തുക.

 

കെജിഎഫ് ചാപ്റ്റര്‍ 1-ന്റെ തകര്‍പ്പന്‍ വിജയത്തിന് ശേഷം ഹിറ്റ്മേക്കര്‍ നിര്‍മാതാക്കളായ ഹോംബാലെ ഫിലിംസിന്റെ മൂന്നാമത്തെ ബഹുഭാഷ ചിത്രമാണ് സലാര്‍. കെജിഎഫ് സംവിധായകനായ പ്രശാന്ത് നീല്‍ ആണ് ഈ ചിത്രം ഒരുക്കുന്നത്. തിരക്കഥയും പ്രശാന്ത് തന്നെ. ഛായാഗ്രഹണം ഭുവന്‍ ഗൗഡ. സംഗീതം രവി ബസ്രുര്‍.