മമ്മൂട്ടിയുമായുള്ള പ്രൊജക്ട് ഉപേക്ഷിച്ചതിനുള്ള കാരണമിതാണ്: സത്യന്‍ അന്തിക്കാട്

മമ്മൂട്ടിയുമായുള്ള പ്രൊജക്ട് ഒഴിവാക്കിയെന്ന വാര്‍ത്തയോട് പ്രതികരിച്ച് സത്യന്‍ അന്തിക്കാട്. പ്രൊജക്ട് പൂര്‍ണമായി ഒഴിവാക്കിയിട്ടില്ലെന്നും തത്കാലത്തേക്ക് മാറ്റിവെച്ചിരിക്കുന്നതാണെന്നും തീരുമാനം താനും മമ്മൂട്ടിയും ഒരുമിച്ചെടുത്തതാണെന്നും സത്യന്‍ അന്തിക്കാട് പറഞ്ഞു. സത്യന്‍ അന്തിക്കാടും ഒന്നിക്കുന്നുവെന്ന വാര്‍ത്ത ഏറെ ആവേശത്തോട് കൂടിയായിരുന്നു ആരാധകര്‍ സ്വീകരിച്ചത്. പക്ഷേ കോവിഡ് കാലത്ത് ആ പ്രൊജക്ട് ഒഴിവാക്കിയതായും വാര്‍ത്ത വന്നിരുന്നു.

‘ഏപ്രില്‍ പത്തിന് തുടങ്ങാമെന്ന് കരുതിയ പ്രൊജക്ടിനിടയിലാണ് കോവിഡ് എത്തിയത്. ഇക്ബാല്‍ കുറ്റിപ്പുറം ആണ് തിരക്കഥ. ഓണത്തിന് റിലീസ് ചെയ്യാമെന്നായിരുന്നു അന്ന് മനസിലുണ്ടായിരുന്നത്. മമ്മൂട്ടിയെ വെച്ചായിരുന്നു പടം മനസില്‍ കണ്ടത്. എന്നാല്‍ കരുതിയിരുന്ന റിലീസ് ടൈം മാറി. നമ്മളെപ്പോഴും സിനിമ പ്ലാന്‍ ചെയ്യുക അന്നത്തെ ഓഡിയന്‍സിന്റെ മൈന്റ് സെറ്റ് കൂടി പരിഗണിച്ചാണല്ലോ. അത് പൂര്‍ണമായും മാറിയിരിക്കുന്നു. അതുകൊണ്ട് തത്കാലം ആ പ്രൊജക്ട് മാറ്റിവെച്ചിരിക്കുകയാണ്- സത്യന്‍ അന്തിക്കാട് പറയുന്നു.

ഇപ്പോള്‍ മറ്റൊരു പ്രൊജക്ടിന്റെ ആലോചനയിലാണെന്നും ഏപ്രിലിന് ശേഷം മാത്രമേ ഷൂട്ടിങ് ആരംഭിക്കൂ എന്നും സത്യന്‍ അന്തിക്കാട് പറഞ്ഞു