ആർ ജെ ശാലിനിയുടെ ‘പൂച്ചക്കുരു’ തിരശ്ശീലയിൽ ഒരു സിനിമ തെളിഞ്ഞുവരുന്നതു പോലെയെന്ന് സത്യൻ അന്തിക്കാട്, അസാധാരണ തലത്തിലേക്ക് ഉയർന്ന നോവലെന്ന് ബെന്യാമിൻ

സഹസംവിധായികയായ ആർ ജെ ശാലിനിയുടെ ആദ്യനോവലായ പൂച്ചക്കുരു കഴിഞ്ഞദിവസമാണ് വിപണിയിൽ എത്തിയത്. നടൻ മമ്മൂട്ടി ആയിരുന്നു നോവലിന്റെ കവർ സോഷ്യൽ മീഡിയയിലൂടെ ഔദ്യോഗികമായി പ്രകാശനം ചെയ്തത്. സംവിധായകനായ സത്യൻ അന്തിക്കാട്, എഴുത്തുകാരൻ ബെന്യാമിൻ എന്നിവരാണ് ചിത്രത്തിന് അവതാരിക കുറിച്ചത്.

തിരശ്ശീലയിൽ സിനിമ തെളിഞ്ഞുവരുന്നതുപോലെയാണ് നിർമല ഓപ്പോളിന്റെ സംഘർഷഭരിതമായ ജീവിതം ശാലിനി അവതരിപ്പിക്കുന്നത് എന്ന് സത്യൻ അന്തിക്കാട് കുറിച്ചു. എഴുത്തിന് ഒരു ദൃശ്യഭാഷയുണ്ടെന്നും ഒരൊറ്റ വരികൊണ്ട് ഒരു ആശയം പൂർണമായി മനസിൽ പതിപ്പിക്കാൻ ശാലിനിക്ക് കഴിഞ്ഞിട്ടുണ്ടെന്നും സത്യൻ അന്തിക്കാട് കുറിച്ചു.

ഒരിക്കലും ശമിക്കാത്ത ബാല്യകാലത്തിലേക്കും അമ്മവീട്ടിലേക്കുമുള്ള യാത്രകളിലേക്കും ഓർമകളിലേക്കുമാണ് ഈ നോവൽ നമ്മെ കൂട്ടിക്കൊണ്ടു പോകുന്നതെന്ന് ബെന്യാമിൻ കുറിച്ചു. ണ്ണഞ്ചിപ്പിക്കുന്ന നഗരക്കാഴ്ചകളിൽ നിന്നിറങ്ങി ഇത്തിരി ഗ്രാമീണ സൗന്ദര്യത്തിലേക്കുള്ള യാത്രയാണത്. പതിഞ്ഞ താളത്തിൽ തുടങ്ങി ഉഗ്രസ്ഫോടനത്തിൽ അവസാനിക്കുന്ന ഒരു നല്ല നോവൽ സമ്മാനിച്ച ശാലിനിക്കു നന്ദിയെന്നും ബെന്യാമിൻ കുറിച്ചു. ഒരു നോവൽ സാധാരണ മട്ടിൽ അവസാനിക്കും എന്ന് കരുതുമ്പോൾ അതിന് പെട്ടെന്ന് അസാധാരണമായ ഒരു തലം വരുന്നു. പിന്നെ അതുവരെ നാം കണ്ട കഥാപാത്രങ്ങളെയെല്ലാം വീണ്ടും വീണ്ടും പിന്നോട്ട് ചെന്ന് നോക്കാനും അവരുടെ ഗൂഡമായ സ്വഭാവസവിശേഷത കണ്ടു ഞെട്ടാനും തുടങ്ങുകയാണെന്നും ബെന്യാമിൻ പൂച്ചക്കുരു എന്ന നോവലിക്കുറിച്ച് കുറിച്ചു.