ഫഹദിനെ സത്യൻ അന്തിക്കാട് ‘മലയാളി’യാക്കി; പിന്നെ മാറ്റി…!

സത്യൻ അന്തിക്കാട് ചിത്രങ്ങൾ എന്നും പ്രേക്ഷകർക്ക് സ്വന്തം കുടുംബത്തിലും ചുറ്റുവട്ടത്തും സുഹൃത്തുക്കൾക്കുമിടയിൽ നടക്കുന്ന ജീവൻ തുടിക്കുന്ന യഥാർത്ഥ സംഭവങ്ങൾ തന്നെയാണ്. ഏച്ചുകെട്ടിയതോ ദ്വയാർത്ഥമുള്ള പ്രയോഗങ്ങളോ കൂടാതെ പൂർണമായും കുടുംബസമേതം ചിരിക്കാവുന്ന ശുദ്ധനർമത്തിന്റെയും ആക്ഷേപഹാസ്യത്തിന്റെയും വിളനിലങ്ങളാണ് അദ്ദേഹത്തിന്റെ സിനിമകൾ. ഒരു ഇടവേളക്ക് ശേഷം സത്യൻ അന്തിക്കാടും ശ്രീനിവാസനും ഒരുമിക്കുന്ന ചിത്രത്തിൽ ഫഹദ് ഫാസിലാണ് നായകൻ. പതിവിൽ നിന്നും വിപരീതമായി ആദ്യമേ തന്നേ ചിത്രത്തിന്റെ പേര് തീരുമാനിച്ചെങ്കിലും അത് മാറ്റിയിരിക്കുകയാണ്. സംവിധായകന്റെ ഫേസ്ബുക്ക് കുറിപ്പിലൂടെ “കുറേ വർഷങ്ങൾക്ക് മുൻപ് തട്ടാൻ ഭാസ്കരന്റേയും സ്നേഹലതയുടേയും കഥയിലേക്ക് എന്നെ ആദ്യം ആകർഷിച്ചത് ‘പൊന്മുട്ടയിടുന്ന തട്ടാൻ’ എന്ന പേരായിരുന്നു. രഘുനാഥ് പാലേരിയുടെ സങ്കല്പത്തിൽ ആ ‘തട്ടാൻ’ ഈശ്വരനാണ്. ‘പൊന്മുട്ട’ പ്രഭാത സൂര്യനും. അതിലെ കാവ്യഭംഗി മനസ്സിലാക്കാതെ തെറ്റിദ്ധരിച്ച് ചിലർ എതിർപ്പുമായി വന്നപ്പോൾ വിവാദത്തിനൊന്നും നിൽക്കാതെ ഞങ്ങൾ ‘തട്ടാനെ’ ‘താറാവാക്കി’ മാറ്റി.

ഇപ്പോൾ, പുതിയ സിനിമയുടെ ആലോചനയുമായി ഇരിക്കുമ്പോൾ ശ്രീനിവാസൻ ഒരു കഥ പറഞ്ഞു. പി. ആർ. ആകാശ് എന്ന പ്രകാശന്റെ കഥ. ഇന്നത്തെ മലയാളിയുടെ പൊതു സ്വഭാവത്തെ മുൻനിർത്തിയുള്ള കഥയായതുകൊണ്ട് ‘മലയാളി’ എന്ന് പേരിട്ടാലോയെന്ന് തോന്നി. കേട്ടവർക്കെല്ലാം അതിഷ്ടമായി. ഫിലിം ചേംബറിന്റെ അനുവാദവും കിട്ടി. അങ്ങനെയാണ് “വൈകി പേരിടുന്ന പതിവു രീതി മാറ്റുന്നു” എന്ന മുഖവുരയോടെ പേര് അനൗൺസ് ചെയ്യുന്നത്. “ദൈവത്തെ ചിരിപ്പിക്കാൻ നമ്മുടെ ഭാവി പരിപാടികൾ പറഞ്ഞാൽ മതി” എന്ന് കേട്ടിട്ടുണ്ട്. അക്ഷരം പ്രതി സത്യം. ദൈവം ചിരിച്ചു. ‘മലയാളി’ എന്ന പേരിൽ മുൻപൊരു സിനിമ ഉണ്ടായിരുന്നുവെന്ന് ഞങ്ങൾ ഓർത്തിട്ടില്ലായിരുന്നു.

ആ സിനിമയുടെ നിർമ്മാതാവടക്കം പലരും പറഞ്ഞു – “സാരമില്ല, ഒരു സിനിമയുടെ പേരിൽ തന്നെ പിന്നീട് സിനിമകൾ ഉണ്ടായിട്ടുണ്ടല്ലോ”. എങ്കിലും ഞങ്ങൾ ആ പേര് മാറ്റുകയാണ്. മലയാളിത്തമുള്ള മറ്റൊരു പേരിനു വേണ്ടി നമുക്ക് കാത്തിരിക്കാം. അല്ലെങ്കിലും പേരിലല്ലല്ലോ, പ്രമേയത്തിലല്ലേ കാര്യം.”