‘ഭീഷ്മപർവം’ സഹരചയിതാവ് സംവിധായകൻ ആകുന്നു; തിരക്കഥ ഒരുക്കുന്നത് നായാട്ടിന്റെ തിരക്കഥാകൃത്ത്

ആരാധകർ കാത്തിരിക്കുന്ന മമ്മൂട്ടി ചിത്രമാണ് ഭീഷ്മ പർവം. മാർച്ച് മൂന്നിനാണ് ചിത്രം റിലീസ് ചെയ്യുന്നത്. ബിഗ് ബി എന്ന ചിത്രത്തിനു ശേഷം മമ്മൂട്ടിയെ നായകനാക്കി അമൽ നീരദ് സംവിധാനം ചെയ്യുന്ന ചിത്രമാണിത്. പതിനാലു വർഷങ്ങൾക്ക് ശേഷം അമൽ നീരദും മമ്മൂട്ടിയും വീണ്ടും ഒരുമിക്കുന്നു എന്ന പ്രത്യേകതയും ഈ ചിത്രത്തിനുണ്ട്. മാർച്ച് മൂന്നിന് റിലീസ് ചെയ്യുന്ന ചിത്രത്തിന്റെ ടിക്കറ്റ് റിസർവേഷൻ ആരംഭിച്ചു. മിക്ക തിയറ്ററുകളിലും ആദ്യദിവസത്തെ ഷോ നിറഞ്ഞുകഴിഞ്ഞു.

ഇതിനിടയിൽ ഭീഷ്മപർവ്വം സിനിമയുടെ സഹരചയിതാവ് രവിശങ്കർ സംവിധായകനാകുന്നു എന്ന വാർത്തയാണ് പുറത്തുവരുന്നത്. ജയസൂര്യയാണ് നായകൻ. റൈറ്റർ എന്ന് പേരിട്ടിരിക്കുന്ന ചിത്രത്തിന്റെ തിരക്കഥ ഷാഹി കബീർ ആണ്. ജോസഫ്, നായാട്ട് എന്നീ ചിത്രങ്ങളിലൂടെ ശ്രദ്ധ നേടിയ രചയിതാവ് ആണ് ഷാഹി കബീർ. ചിത്രം ഔദ്യോഗികമായി പ്രഖ്യാപിച്ചു. ടൈറ്റിൽ പോസ്റ്റർ ഉൾപ്പെടെയാണ് പ്രഖ്യാപനം.

യുലിൻ പ്രൊഡക്ഷൻസിന്റെ ബാനറിൽ അഖിൽ, ആഷിഖ് എന്നിവർ ചേര്‍ന്നാണ് ചിത്രത്തിന്‍റെ നിർമാണം. ലൂക്ക, കുറുപ്പ് തുടങ്ങിയ ചിത്രങ്ങളുടെ ഛായാഗ്രഹണം നിര്‍വ്വഹിച്ച നിമിഷ് രവിയാണ് ക്യാമറാമാന്‍. സംഗീതം – യാക്സൻ, നേഹ, എഡിറ്റിംഗ് – കിരൺ ദാസ്, പ്രൊഡക്ഷൻ കൺട്രോളർ – പ്രവീൺ ബി മേനോൻ. ഗാന രചന – അൻവർ അലി, പ്രൊഡക്ഷൻ ഡിസൈനർ – ദിലീപ് നാഥ്, മേക്കപ്പ് – റോണക്സ് സേവ്യർ, വസ്ത്രാലങ്കാരം – സമീറ സനീഷ്, അസോസിയേറ്റ് ഡയറക്ടർ – ഷെലി ശ്രീസ്, സൗണ്ട് ഡിസൈൻ – രംഗനാഥ് രവി, പരസ്യകല – യെല്ലോ ടൂത്ത്. ചിത്രീകരണം കോഴിക്കോടും പരിസരപ്രദേശങ്ങളിലുമായി ഉടന്‍ ആരംഭിക്കും.