‘ഒരാൾ എന്നെ കയറിപ്പിടിച്ചു. എവിടെ എന്നു പറയാൻ അറപ്പ് തോന്നും’; സിനിമ പ്രമോഷൻ പരിപാടിക്ക് എത്തിയ യുവനടിക്ക് എതിരെ കോഴിക്കോട് ലൈംഗിക അതിക്രമം

സിനിമ പ്രമോഷൻ പരിപാടിക്കായി കോഴിക്കോട് ഹൈലൈറ്റ് മാളിൽ എത്തിയ യുവനടിമാർക്ക് നേരെ ലൈംഗിക അതിക്രമം. സാമൂഹ്യമാധ്യമങ്ങളിൽ നടി തന്നെയാണ് ഇക്കാര്യം പങ്കുവെച്ചത്. സാറ്റർഡേ നൈറ്റ് എന്ന സിനിമയുടെ പ്രമോഷൻ പരിപാടിക്ക് എത്തിയത് ആയിരുന്നു നടി. മാളിൽ തടിച്ചു കൂടിയവരിൽ ഒരാൾ മോശമായി പെരുമാറിയെന്നും സഹപ്രവർത്തകയ്ക്കും സമാനമായ അനുഭവമുണ്ടായെന്നും താരം പങ്കുവെച്ച കുറിപ്പിൽ പറയുന്നു. സിനിമയുടെ പ്രമോഷന്റെ ഭാഗമായി പല സ്ഥലങ്ങളിലും പോയിട്ടുണ്ടെന്നും എന്നാൽ ഇത്തരത്തിൽ ഒരു അനുഭവം ആദ്യമായിട്ടാണെന്നും താരം കുറിച്ചു.

നടി പങ്കുവെച്ച കുറിപ്പ് ഇങ്ങനെ, ‘ഇന്ന് എന്റെ പുതിയ ചിത്രമായ സാറ്റർഡേ നൈറ്റിന്റെ ഭാഗമായി കോഴിക്കോട് ഹൈലൈറ്റ് മാളിൽ വെച്ച് നടന്ന പ്രമോഷന് വന്നപ്പോൾ എനിക്ക് ഉണ്ടായത് മരവിപ്പിക്കുന്ന ഒരു അനുഭവം ആണ്. ഞാൻ ഒത്തിരി ഇഷ്ടപ്പെടുന്ന ഒരു സ്ഥലം ആണ് കോഴിക്കോട്. പക്ഷേ, പ്രോഗ്രാം കഴിഞ്ഞു പോകുന്നതിനിടയിൽ ആൾക്കൂട്ടത്തിൽ അവിടെ നിന്നൊരാൾ എന്നെ കയറിപ്പിടിച്ചു. എവിടെ എന്ന് പറയാൻ എനിക്ക് അറപ്പ് തോന്നുന്നു. ഇത്രയ്ക്ക് ഫ്രസ്ട്രേറ്റഡ് ആയിട്ടുള്ളവർ ആണോ നമ്മുടെ ചുറ്റുമുള്ളവർ. പ്രമോഷന്റെ ഭാഗമായി ഞങ്ങൾ ടീം മുഴുവൻ പലയിടങ്ങളിൽ പോയി. അവിടെയൊന്നും ഉണ്ടാകാത്ത ഒരു വൃത്തികെട്ട അനുഭവം ആയിരുന്നു ഇന്ന് ഉണ്ടായത്. എന്റെ കൂടെ ഉണ്ടായ മറ്റൊരു സഹപ്രവർത്തകയ്ക്കും ഇതേ അനുഭവം ഉണ്ടായി. അവർ അതിനു പ്രതികരിച്ചു. പക്ഷേ, എനിക്ക് അതിന് ഒട്ടും പറ്റാത്ത ഒരു സാഹചര്യം ആയി പോയി. ഒരു നിമിഷം ഞാൻ മരവിച്ചു പോയി. ആ മരവിപ്പിൽ നിന്നുകൊണ്ടു തന്നെ ചോദിക്കുകയാണ്, തീർന്നോ നിന്റെയൊക്കെ അസുഖം’.

അതേസമയം, ലൈംഗിക അതിക്രമത്തിന് ഇരയായ ഒപ്പമുണ്ടായിരുന്ന യുവനടി തന്നെ കൈയേറ്റം ചെയ്യാൻ ശ്രമിച്ച ആളുടെ മുഖത്തടിച്ചു. ഉടനെ സഹപ്രവർത്തകർ ഇവരെ സ്ഥലത്ത് നിന്ന് മാറ്റി. വൈകുന്നേരം ഏഴു മണിയോടെയാണ് താരങ്ങൾ ഹൈലൈറ്റ് മാളിൽ എത്തിയത്. കവാടത്തിൽ വൻ പൊലീസ് സുരക്ഷയും ഏർപ്പെടുത്തിയിരുന്നു. ഒമ്പതുമണിയോടെ പ്രമോഷൻ പരിപാടി അവസാനിപ്പിച്ച് മടങ്ങിപോകുന്നതിനിടെ ആയിരുന്നു സംഭവം.ജനങ്ങൾ തടിച്ചു കൂടിയ സാഹചര്യത്തിൽ മാളിന്റെ പിൻവശത്തെ ലിഫ്റ്റ് വഴി ഇറങ്ങാൻ പൊലീസ് നിർദ്ദേശിച്ചിരുന്നു. ഇതുവഴി പോകുന്നതിനിടയിൽ വരാന്തയിൽ നിന്നാണ് കൈയേറ്റം ഉണ്ടായത്.