ഒരുപാട് പേരോട് മമ്മൂക്ക എനിക്ക് വേണ്ടി ചാൻസ് ചോദിച്ചു;വിഗ് വരെ ഒരിക്കൽ വെച്ചുതന്നു… മനസ്സ് തുറന്ന് കലാഭവൻ ഷാജോൺ

മമ്മൂട്ടി എന്ന വ്യക്തി
സഹപ്രവർത്തകർക്കും സിനിമയിൽ സജീവമല്ലാത്ത മിമിക്രി താരങ്ങൾക്കും കൊടുക്കുന്ന പ്രോത്സാഹനങ്ങൾ മിമിക്രി താരവും നടനുമായ കലാഭവൻ ഷാജോൺ ഇപ്പോൾ പങ്കുവയ്ക്കുകയാണ്. കൈരളി ടിവിയുടെ സ്റ്റാർ റാഗിംഗ് എന്ന പരിപാടിയിലാണ് സിനിമയിൽ സജീവമായിരുന്ന കാലത്ത് മമ്മൂട്ടി ചെയ്ത് തന്ന ഉപകാരങ്ങളെ പറ്റി അദ്ദേഹം പറയുന്നത്. മലയാള സിനിമയിൽ ചെറിയ വേഷങ്ങൾ ചെയ്തുകൊണ്ടിരുന്ന അവസരത്തിലാണ് ഷാജോൺ മമ്മൂട്ടിയെ പരിചയപ്പെട്ടത്. പിന്നീട് അങ്ങോട്ട് വളരെ നല്ല സൗഹൃദം ആയിരുന്നു എന്നും അത് തനിക്ക് കൂടുതൽ ഗുണം ചെയ്തു എന്നും അദ്ദേഹം പറയുന്നു. “നീ സിനിമയിൽ വരുമ്പോൾ വിഗ് വെക്കുന്നു അതാണ് നിന്നെ ഒന്നും കണ്ടാൽ മനസിലാകാത്തത് ” എന്ന് മമ്മൂട്ടി സ്വതസിദ്ധ ശൈലിയിൽ ആദ്യകാഴ്ചയിൽ കലാഭവൻ ഷാജോണിനോട് പറഞ്ഞു.

അത്രമേൽ സജീവമല്ലായിരുന്ന തനിക്കുവേണ്ടി നിരവധി ആളുകളുടെ അടുത്ത് മമ്മൂട്ടി ചാൻസ് ചോദിച്ചിട്ടുണ്ട് എന്നും സിനിമ മേഖലയിലെ പല പ്രമുഖർക്കും തന്നെ പരിചയപ്പെടുത്തി കൊടുത്തിട്ടുണ്ട് എന്നും അദ്ദേഹം കൂട്ടിച്ചേർക്കുന്നു. . ‘പട്ടണത്തിൽ ഭൂതം’ ‘അണ്ണൻ തമ്പി’ തുടങ്ങിയ ചിത്രങ്ങളിൽ ചെറിയ വേഷങ്ങളിൽ മമ്മൂട്ടിയോടൊപ്പം അഭിനയിക്കാൻ സാധിച്ച ഷാജോണിന് പിന്നീട് മമ്മൂട്ടിക്കൊപ്പം മുഴുനീള കഥാപാത്രമായി അഭിനയിക്കാൻ അവസരം കിട്ടിയത് താപ്പാന എന്ന ചിത്രത്തിലായിരുന്നു. താപ്പാനയിൽ വിഗ്ഗ് വെച്ച അഭിനയിക്കാൻ ആയിരുന്നു കലാഭവൻ ഷാജോണിന് ആഗ്രഹമെങ്കിലും ചിത്രത്തിന്റെ സംവിധായകൻ അത് അനുവദിച്ചില്ല. ഇത് മനസ്സിലാക്കിയ മമ്മൂട്ടി ഷൂട്ടിംഗ് നിർത്തി വച്ച് മേക്കപ്പ്മാന്റെ സഹായത്തോടെ ആ വിഗ്ഗ് ഷാജോണിന് വെച്ച് കൊടുക്കുകയും ആ ഹെയർ സ്റ്റൈൽ ചിത്രം തീരുന്നത് വരെ തുടരാൻ നിർദ്ദേശം നൽകുകയും ചെയ്തു.