‘ജയിലർ ഹിറ്റായപ്പോൾ രജനി സാറിന് ബിഎംഡബ്ല്യൂ കിട്ടിയതറിഞ്ഞ് സോഫിയ ചേച്ചിയെ കാണാൻ ചെന്ന റോബർട്ടും ഡോണിയും സേവ്യറും’ – ആർ ഡി എക്സ് ഹിറ്റായതിന് പിന്നാലെ രസകരമായ കുറിപ്പുമായി പെപ്പെ

ഓണത്തിന് ദിവസങ്ങൾക്ക് മുമ്പേ തിയറ്ററുകളിൽ എത്തി ഓണനാളുകൾ തിയറ്ററുകൾ പൂ‍രപ്പറമ്പുകളാക്കി മാറ്റിയ സിനിമ ആയിരുന്നു ആർ ഡി എക്സ്. നവാഗതനായ നഹാസ് ഹിദായത്ത് ആണ് ചിത്രം സംവിധാനം ചെയ്തത്. റിലീസ് ആയ ദിവസം മുതൽ മിക്കയിടങ്ങളിലും രാത്രികളിൽ ചിത്രം നിരവധി അധികഷോകൾ കളിച്ചു. ഓഗസ്റ്റ് 25ന് തിയറ്ററുകളിൽ റിലീസ് ചെയ്ത ചിത്രം സോഫിയ പോളിന്റെ ഉടമസ്ഥതയിലുള്ള വീക്കെൻഡ് ബ്ലോക്ക്ബസ്റ്റേഴ്സിന്റെ ബാനറിലാണ് എത്തിയത്. വലിയ പ്രമോഷനുകളൊന്നും ഇല്ലാതെ വന്ന ചിത്രം തിയറ്ററുകളിൽ വമ്പൻ വിജയമാണ് സ്വന്തമാക്കിയത്. ചിത്രം ഹിറ്റ് ആയതിന് പിന്നാലെ ചിത്രത്തിലെ റോബർട്ട്, ഡോണി, സേവ്യർ എന്നീ കഥാപാത്രങ്ങളെ അവതരിപ്പിച്ച ഷെയിൻ നിഗം, ആന്റണി വർഗീസ്, നീരജ് മാധവ് എന്നിവർ നിർമാതാവ് സോഫിയ പോളിനെ കാണാൻ എത്തിയിരുന്നു.

സോഫിയ പോളിനെ കണ്ടതിനു ശേഷം ആന്റണി വർഗീസ് സോഷ്യൽ മീഡിയയിൽ പങ്കുവെച്ച കുറിപ്പ് ആണ് ഇപ്പോൾ വൈറലായിരിക്കുന്നത്. ജയിലർ സിനിമ ഹിറ്റ് ആയപ്പോൾ രജനി സാറിനു ബി എം ഡബ്ല്യു കിട്ടിയതറിഞ്ഞ് സോഫിയ ചേച്ചിയെ കാണാൻ ചെന്ന റോബർട്ടും ഡോണിയും സേവിയും എന്ന് തുടങ്ങുന്ന കുറിപ്പ് നിമിഷനേരം കൊണ്ട് വൈറലായി മാറി. രസകരമായ പോസ്റ്റിൽ താൻ വീട്ടിലെ മതില് പൊളിച്ച് ഗേറ്റ് വലുതാക്കാൻ പോകുകയാണെന്നും സംവിധായകൻ നഹാസ് പോർഷെ ഓടിക്കാൻ പഠിക്കുകയാണെന്നും ആന്റണി കുറിക്കുന്നു. ആന്റണി വർഗീസ് കുറിച്ചത് ഇങ്ങനെ, ‘ജയ്‌ലർ സിനിമ ഹിറ്റ്‌ ആയപ്പോൾ രജനി സർ നു BMW കിട്ടിയതറിഞ്ഞു സോഫിയ ചേച്ചിയെ കാണാൻ ചെന്ന റോബർട്ടും ഡോണിയും സേവിയും 😜😁. കാറിനെ പറ്റി മിണ്ടാൻ പോലും സമയം തരാതെ വയറുനിറയെ ഫുഡും തന്ന്, എന്തേലും പറയാൻ തുടങ്ങിയാൽ അപ്പോൾ തന്നെ സോഫിയ ചേച്ചി കപ്പ എടുത്ത് തരും 😁😜…. ഇന്നലെ പറയാൻ പറ്റിയില്ല അതോണ്ട് ഇപ്പോ പറയാ ഞാൻ വീട്ടിലെ മതിൽ പൊളിച്ചു ഗേറ്റ് വലുതാക്കാൻ തുടങ്ങാണട്ടോ 😁😁… പിന്നെ നഹാസ് പോർഷ ഓടിക്കാൻ പഠിച്ചു തുടങ്ങിയെന്ന കേൾക്കുന്നെ’.

സോഫിയ പോളിന്റെ ഉടമസ്ഥതയിലുള്ള വീക്കെൻഡ് ബ്ലോക്ക്ബസ്റ്റേഴ്സിന്റെ ബാനറിലാണ് R D X (റോബർട്ട് ഡോണി സേവ്യർ) എത്തിയത്. ചിത്രത്തിന്റെ സംവിധാനം നിർവഹിച്ചത് നവാഗതനായ നഹാസ് ഹിദായത്താണ്. ആദർശ് സുകുമാരൻ, ഷബാസ് റഷീദ് എന്നിവരുടേതാണ് തിരക്കഥ. കെ ജി എഫ്, വിക്രം, ബീസ്റ്റ് തുടങ്ങിയ ചിത്രങ്ങൾക്ക് സംഘട്ടനം ഒരുക്കിയ അൻബ് അറിവാണ് ഈ ചിത്രത്തിന്റെ ആക്ഷൻ രംഗങ്ങൾ കൈകാര്യം ചെയ്തത്. ബാബു ആന്റണി, ലാൽ, ഐമ റോസ്മി സെബാസ്റ്റ്യൻ, മഹിമ നമ്പ്യാർ, മാല പാർവതി, ബൈജു തുടങ്ങിയവരും ചിത്രത്തിൽ അഭിനയിക്കുന്നുണ്ട്. എഡിറ്റർ – ചമൻ ചാക്കോ, ഛായാഗ്രഹണം – അലക്‌സ് ജെ പുളിക്കൽ, സംഗീതസംവിധാനം – സാം സി എസ്, വരികൾ -മനു മൻജിത്, കോസ്റ്റ്യൂംസ് – ധന്യ ബാലകൃഷ്ണൻ, മേക്കപ്പ് – റോണക്‌സ് സേവ്യർ, ആർട്ട് ഡയറക്ടർ – ജോസഫ് നെല്ലിക്കൽ, ഫിനാൻസ് കൺട്രോളർ – സൈബൺ സി സൈമൺ, പ്രൊഡക്ഷൻ കൺട്രോളർ – ജാവേദ് ചെമ്പ്, വീക്കെൻഡ് ബ്ലോക്ക്ബസ്റ്റർ പ്രൊഡക്ഷൻ മാനേജർ – റോജി പി കുര്യൻ, ഡിജിറ്റൽ മാർക്കറ്റിംഗ് – അനൂപ് സുന്ദരൻ, പി ആർ ഒ – ശബരി.