എല്ലാവരും തന്റെ മകനെ കുറ്റപ്പെടുത്തുമ്പോൾ ഷെയ്‌ന്റെ അമ്മക്കും ചിലത് പറയാനുണ്ട്..!

ഓരോ റോൾ കൊണ്ടും തന്റെയുള്ളിലെ അഭിനേതാവിനെ മികച്ചതാക്കി കൊണ്ടിരിക്കുന്ന ഷെയ്ൻ നിഗം ഇന്ന് വിവാദങ്ങളുടെ ആഴക്കടലിലാണ്. ഇപ്പോൾ എല്ലാ വിരലുകളും ചൂണ്ടുന്നത് ഈ യുവ നായകനിലേക്ക് തന്നെയാണ്. ഷൂട്ടിങ് സെറ്റില്‍ നിന്ന് ഇറങ്ങിപ്പോയി, കരാര്‍ ലംഘിച്ചു, വിലക്കു നേരിടേണ്ടി വരും എന്നൊക്കെ വാര്‍ത്തകള്‍ വരുമ്പോള്‍ ഷെയിന്‍ നിഗമിന്റെ ഉമ്മ സുനില പ്രതികരിക്കുന്നു.മനോരമ ന്യൂസിന് നൽകിയ അഭിമുഖത്തിലാണ് ഷെയ്‌നിന്റെ അമ്മ പ്രതികരിച്ചത്.

ഷെയ്നിനെ കുറ്റം പറയുന്നവര്‍ ആരും എന്താണ് അവന്റെ കുടുംബത്തോട് ഇതിന്റെ നിജസ്ഥിതി എന്തെന്ന് അന്വേഷിക്കാത്തത്? സോഷ്യല്‍മീഡിയയിലും മാധ്യമങ്ങളിലും വരുന്ന വാര്‍ത്തകളില്‍ ഒരിടത്തും വീട്ടുകാര്‍ക്ക് എന്താണ് പറയാനുള്ളത് എന്ന് പറഞ്ഞിട്ടുണ്ടോ? ആരും ഒരു കോണില്‍ നിന്നും ചോദിച്ചില്ല. വെയിലിന്റെ സംവിധായകന്‍ ശരത് ഒരു ദിവസം രാവിലെ ഒൻപത് മണിക്ക് എന്നെ വിളിച്ച് പറയുകയാണ് ഷെയ്ന്‍ സെറ്റില്‍ നിന്ന് ഇറങ്ങിപ്പോയി എന്ന്. ഞാന്‍ അപ്പോള്‍ തന്നെ മകനെ വിളിച്ചു. അപ്പോഴാണ് അവന്‍ പറയുന്നത്, ‘രാത്രി രണ്ടര വരെ ഷൂട്ട് ഉണ്ടായിരുന്നു ഇപ്പോള്‍ ഉറക്കത്തില്‍ നിന്ന് എഴുന്നേറ്റാണ് ഫോണ്‍ എടുത്തതെന്ന്. ഇനി അടുത്ത സമയം ഉച്ചക്ക് പന്ത്രണ്ട് മണി ആണെന്ന്’. ഞാന്‍ ഇത് ശരത്തിനോട് പറഞ്ഞ് അല്‍പം വാക്കു തര്‍ക്കം ഉണ്ടായി.

ഷെയ്ന്‍ ഇതുവരെ അഭിനയിച്ച ചിത്രങ്ങളിലെ സംവിധായകരോട് നിങ്ങള്‍ ചോദിക്കണം ഇതുപോലെ എന്തെങ്കിലും ഒരു സംഭവം അവന്റെ ഭാഗത്തു നിന്ന് ഉണ്ടായിട്ടുണ്ടോ എന്ന്. ഇഷ്ഖിന്റെ പ്രവര്‍ത്തകര്‍ പറഞ്ഞല്ലോ ഞങ്ങളോടൊന്നും ഇങ്ങനെയില്ല എന്ന്. ഇനി അഭിനയിക്കേണ്ട ഖുര്‍ബാനി സിനിമയുടെ ഷൂട്ടിങ് ഇപ്പോള്‍ വേണമെങ്കിലും ആരംഭിക്കാന്‍ അവര്‍ തയ്യാറാണ്. ഇടവേള വന്നില്ലേ ഇപ്പോള്‍. ആ സമയത്ത് ചെയ്യാമെന്നാണ് അവര്‍ പറയുന്നത്.