“വെല്ലുവിളി നിറഞ്ഞ റോളുകൾ ഒന്നും തന്നെ ഞാൻ ഇതുവരെ ചെയ്‌തിട്ടില്ല” ശ്വേതാ മേനോൻ

കരുത്തുറ്റ കഥാപാത്രങ്ങൾ കൊണ്ട് സമ്പന്നമാണ് നടി ശ്വേതാ മേനോന്റെ കരിയർ. യഥാർത്ഥ ജീവിതത്തിലും ഉറച്ച തീരുമാനങ്ങൾ എടുക്കുന്നതിലും ശ്വേതാ ഏറെ മുന്നിലാണ്. കഥാപാത്രങ്ങളെ തിരഞ്ഞെടുക്കുന്നതിനെ കുറിച്ച് തുറന്ന് പറഞ്ഞിരിക്കുകയാണ് താരം ഇപ്പോൾ. അതോടൊപ്പം തന്നെ വെല്ലുവിളി നിറഞ്ഞ ഒരു റോളും താൻ ഇതുവരെ ചെയ്‌തിട്ടില്ല എന്നും പറഞ്ഞിരിക്കുകയാണ് ശ്വേതാ മേനോൻ.

എല്ലാ മാസവും ഞാൻ തിരക്കഥകൾ കേൾക്കാറുണ്ട്. പലപ്പോഴും പല കഥാപാത്രങ്ങൾക്കും ഞാൻ അനുയോജ്യയാണോ അതോ എന്നെ ആ റോളിൽ അവർ ശരിക്കും കണ്ടിട്ടുണ്ടോ എന്നൊക്കെ ഞാൻ അത്ഭുതപ്പെടാറുണ്ട്. എനിക്കിഷ്ടപ്പെട്ടാൽ ഞാൻ ഓക്കെ പറയും. സ്പെഷ്യൽ കഥാപാത്രങ്ങൾക്ക് പിന്നാലെ ഞാൻ പോകാറില്ല. റിസ്‌ക് എടുക്കാൻ തയ്യാറാണെങ്കിലും നമ്മുടെ സേഫ് സോണിന് പുറത്ത് നിൽക്കുന്ന കഥാപാത്രങ്ങൾ ചെയ്യാൻ ഞാൻ അധികം ശ്രമിക്കാറില്ല.

സത്യം പറഞ്ഞാൽ ഒരു കഥാപാത്രത്തെ പോലും വ്യത്യസ്ഥമാണ് എന്ന കാരണത്തിൽ ഞാൻ ഏറ്റെടുത്തിട്ടില്ല. എന്തുകൊണ്ട് എനിക്ക് ശ്രമിച്ചുകൂടാ എന്ന എന്റെ കാഴ്ചപ്പാടിന്റെ ഭാഗമായിട്ടാണ് ഈ റോളുകൾ എന്നിലേക്ക് എത്തിയത്. ഒരു സിനിമയുടെ പോലും ക്രെഡിറ്റ് എനിക്ക് വേണ്ട. എല്ലാം സംവിധായകർ പറഞ്ഞ പോലെ ഞാൻ പ്രവർത്തിച്ചതാണ്. ഇന്ന് വരെ എനിക്ക് വെല്ലുവിളി ഉയർത്തുന്ന ഒരു കഥാപാത്രം പോലും ഞാൻ അഭിനയിച്ചിട്ടില്ല എന്നാണ് ഞാൻ വിശ്വസിക്കുന്നത്.