‘ചതിക്കുന്നവര്‍ ഒരിക്കലും അഭിവൃദ്ധി പ്രാപിക്കില്ല’, സിദ്ധാര്‍ഥിന്റെ ട്വീറ്റ് സാമന്തയെക്കുറിച്ചോ?

ആരാധകരെ ഞെട്ടിച്ച് ഇക്കഴിഞ്ഞ ദിവസമാണ് തെലുങ്ക് നടന്‍ നാഗ ചൈതന്യയും തെന്നിന്ത്യന്‍ താരസുന്ദരി സാമന്ത തങ്ങളുടെ വേര്‍പിരിയല്‍ ഔദ്യോഗികമായി അറിയിച്ചത്. സോഷ്യല്‍ മീഡിയ അക്കൗണ്ടുകളിലൂടെയാണ് തങ്ങള്‍ ഭാര്യാഭര്‍ത്താക്കന്മാരായി തുടരുന്നതില്‍ നിന്ന് പിന്മാറുകയാണെന്ന് അറിയിച്ചത്.

ഈ വാര്‍ത്ത ആരാധകരെ ഏറെ വിഷമത്തിലാക്കിയിരുന്നു. പലരും അവരുടെ ദുഖം സോഷ്യല്‍ മീഡിയയിലൂടെ പങ്കു വെച്ചിരുന്നു. എന്നാല്‍ ഇതിനിടയില്‍ പക്ഷേ ഏറ്റവും ശ്രദ്ധ നേടിയത് തമിഴ് നടന്‍ സിദ്ധാര്‍ഥിന്റെ ട്വീറ്റാണ്. സാമന്തയെ ലക്ഷ്യം വച്ചുള്ള ട്വീറ്റ് ആണോ എന്നാണ് ആരാധകര്‍ സംശയിക്കുന്നത്. ഇരുവരും തമ്മില്‍ വര്‍ഷങ്ങള്‍ക്ക് മുമ്പ് പ്രണയത്തിലായിരുന്നു. ‘സ്‌കൂളില്‍ പഠിക്കുമ്പോള്‍ ടീച്ചര്‍ എന്നെ ഏറ്റവും ആദ്യം പഠിപ്പിച്ച പാഠങ്ങളില്‍ ഒന്ന്, ”വഞ്ചകര്‍ ഒരിക്കലും അഭിവൃദ്ധി പ്രാപിക്കില്ല”, നിങ്ങളെയോ?’, ഇതായിരുന്നു സിദ്ധാര്‍ഥ് ട്വിറ്ററില്‍ കുറിച്ചത്. ഇത് സാമന്തയുടെയും നാഗചൈതന്യയുടെയും വേര്‍പിരിയിലുമായി ബന്ധപെട്ടതാണെന്നാണ് ചിലര്‍ അഭിപ്രായപ്പെടുന്നത്.

സിദ്ധാര്‍ഥ് പണ്ടൊരു സ്റ്റേജ് പരിപാടിയില്‍ മുന്‍നിരയില്‍ സാമന്ത ഇരിക്കുമ്പോള്‍ പാടിയ ഒരു പ്രണയഗാനത്തിന്റെ വീഡിയോ മറുപടിയായി കമന്റ് ചെയ്തിട്ടുണ്ട്. എന്നാല്‍ കൂടുതല്‍ പേരും സിദ്ധാര്‍ഥിനെ വിമര്‍ശിച്ചാണ് മറുപടി കൊടുത്തിരിക്കുന്നത്. ഇത്രയും മോശം വ്യക്തിയായിരുന്നെന്ന് വിചാരിച്ചിരുന്നില്ല, ജീവിതം തകര്‍ന്ന് നില്‍ക്കുന്ന ഒരാളെ വേദനിപ്പിക്കാന്‍ എങ്ങനെ മനസ്സ് വന്നു എന്നൊക്കെയാണ്കൂടുതല്‍ പേരും ചോദിക്കുന്നത്. ഇത്തരം ബാലിശമായ ട്വീറ്റ് ഒരിക്കലും പ്രതീക്ഷിച്ചിരുന്നില്ല, വര്‍ഷങ്ങള്‍ക്ക് മുമ്പ് അവസാനിച്ച ഒരു ബന്ധത്തെ ചൊല്ലി ഇപ്പോള്‍ ഇങ്ങനെയൊരു പ്രതികരണം വളരെ മോശമായി പോയെന്ന് ഒരാള്‍ പറഞ്ഞു. എന്തായാലും സിദ്ധാര്‍ഥ് ഇതുവരെ ആ ട്വീറ്റ് ഡിലീറ്റ് ചെയ്തിട്ടില്ല. എന്ത് അര്‍ത്ഥത്തിലാണ് സിദ്ധാര്‍ഥ് ഇങ്ങനെയൊരു പോസ്റ്റ് ഇട്ടതെന്ന് താരം തന്നെ വ്യക്തമാക്കണമെന്നാണ് പലരും ആവശ്യപ്പെടുന്നത്.