‘എന്റെ പ്രണയം’ ഗോപി സുന്ദറിന് ഒരായിരം പിറന്നാൾ ആശംസകൾ നേർന്ന് അമൃത; ചേർത്തു പിടിച്ച് ഗോപി

സംഗീത സംവിധായകൻ ഗോപി സുന്ദറിന് പിറന്നാൾ ആശംസകൾ നേർന്ന് ഗായിക അമൃത സുരേഷ്. ഇരുവരും ഒരുമിച്ചുള്ള ചിത്രം സോഷ്യൽ മീഡിയയിൽ പങ്കുവെച്ചാണ് അമൃത സുരേഷ് ആശംസകൾ നേർന്നത്. ‘ഒരായിരം പിറന്നാൾ ആശംസകൾ.’ എന്ന് കുറിച്ചാണ് അമൃതയുടെ ആശംസ. ജീവിതത്തിലെ വിഷമഘട്ടങ്ങൾ പിന്നിട്ട് പുതിയ ജീവിതത്തിലേക്ക് പ്രവേശിക്കുകയാണെന്ന് ഇരുവരും കഴിഞ്ഞദിവസം സോഷ്യൽ മീഡിയയിലൂടെ വ്യക്തമാക്കിയിരുന്നു. ഇതിനു പിന്നാലെയാണ് ഗോപി സുന്ദറിന് പ്രണയത്തിൽ പൊതിഞ്ഞ പിറന്നാൾ ആശംസകളുമായി അമൃത സുരേഷ് എത്തിയിരിക്കുന്നത്.

അമൃതയുടെ സഹോദരി അഭിരാമി സുരേഷും ഗോപി സുന്ദറിന് പിറന്നാൾ ആശംസകളുമായി എത്തി. ‘സോഷ്യൽ മീഡിയ ജീവിതത്തിന് അപ്പുറവും, നുണകൾ ഒരു സത്യം മറഞ്ഞു കിടക്കുന്നു, നമ്മൾ ആളുകൾ – നമ്മളെല്ലാം സാധാരണ മനുഷ്യർ ജീവിക്കുന്നു, സ്നേഹിക്കുന്നു, പോരാടുന്നു, അതിജീവിക്കുന്നു, വിജയിക്കുന്നു അങ്ങനെ. ഒന്നും സ്ഥിരമല്ലാത്ത ഒന്നും പ്രവചിക്കാൻ കഴിയാത്ത ഈ റോളർ കോസ്റ്റർ ജീവിതയാത്രയിൽ ഞാൻ ഒരു സഹോദരനെ കണ്ടെത്തി. മാന്ത്രികസംഗീതം തീർക്കുന്ന, എന്റെ സഹോദരിയെ പുഞ്ചിരിക്കുന്നവളാക്കുന്ന, എന്നെ അവന്റെ മൂത്തമകൾ എന്നു വിളിക്കുന്ന തന്റെ ജീവിതത്തിലെ ഓരോ വ്യക്തിയെക്കുറിച്ചും അത്രയേറെ സ്നേഹത്തോടും ബഹുമാനത്തോടും സംസാരിക്കുന്ന ഗോപി സുന്ദർ. എന്റെ താത്വികമായ ആമുഖത്തിന് ശേഷം ഞാൻ ഒരു നിമിഷം ആശംസകൾ നേരാൻ എടുക്കുന്നു സഹോദരാ. സന്തോഷകരമായ പിറന്നാൾ നിനക്ക് നേരുന്ന സഹോദരാ. നിങ്ങളുടെ മനോഹരമായ കലയും ഹൃദയവും കൊണ്ട് നിങ്ങൾ അത്ഭുതങ്ങൾ സൃഷ്ടിക്കട്ടെ. നക്ഷത്രങ്ങളെ എണ്ണുന്നു, അനുഗ്രഹങ്ങളെ എണ്ണുന്നു, നിനക്ക് വേണ്ടി പ്രാർത്ഥിക്കുന്നു.’ അഭിരാമി സുരേഷ് ഗോപി സുന്ദറിന് ആശംസകൾ നേർന്ന് കുറിച്ചത് ഇങ്ങനെ.

കഴിഞ്ഞദിവസം ആയിരുന്നു പ്രണയത്തിലാണെന്ന സൂചന നൽകിക്കൊണ്ടുള്ള ചിത്രങ്ങൾ ഇരുവരും പങ്കുവെച്ചത്. മുണ്ടും ഷർട്ടും ധരിച്ച് നെറ്റിയിൽ കുറി തൊട്ട് നിൽക്കുന്ന ഗോപി സുന്ദറിനെ കെട്ടിപ്പിടിച്ച് നിൽക്കുന്ന അമൃത സുരേഷ് ആയിരുന്നു ചിത്രത്തിൽ. ‘പിന്നിട്ട കാതങ്ങൾ മനസ്സിൽ കുറിച്ച് അനുഭവങ്ങളുടെ കനൽവരമ്പു കടന്ന് കാലവും കാറ്റും പുതിയ വഴികളിലേക്ക്’ എന്ന അടിക്കുറിപ്പോടെ ആയിരുന്നു ചിത്രങ്ങൾ പങ്കുവെച്ചത്. ഇൻസ്റ്റഗ്രാമിൽ ഗോപി സുന്ദറാണ് അമൃതയെയും ടാഗ് ചെയ്ത് ചിത്രം പങ്കുവെച്ചത്.