ഇനി ലക്ഷ്യം ബോളിവുഡ്; സിതാരാമം ഹിന്ദി വേര്‍ഷന്റെ റിലീസ് ഡേറ്റ് പുറത്ത്

പാൻ ഇന്ത്യൻ താരം ദുൽഖർ സൽമാൻ നായകനായി എത്തിയ ചിത്രം ‘സിതാരാമം’ തിയറ്ററുകളിൽ മികച്ച പ്രതികരണവുമായി മുന്നേറുകയാണ്. തെലുങ്കിൽ ദുൽഖറിന്റെ രണ്ടാമത്തെ ചിത്രമായിരുന്നു ‘സിതാരാമം’. തെലുങ്കിന് ഒപ്പം തമിഴ്, മലയാളം ഭാഷകളിൽ കൂടി ചിത്രം റിലീസ് ചെയ്തിരുന്നു. ഇപ്പോൾ ഹിന്ദിയിലേക്കും എത്തുകയാണ് സിതാരാമം. ഓഗസ്റ്റ് 19നാണ് ചിത്രത്തിന്റെ ഹിന്ദി വേർഷൻ റിലീസ് ചെയ്യുന്നത്. ഹനു രാഘവപുടിയാണ് ചിത്രം സംവിധാനം ചെയ്തിരിക്കുന്നത്. 60കളില്‍ നടക്കുന്ന പ്രണയകഥയാണ് സിതാരാമം പറയുന്നത്.

ഓഗസ്റ്റ് അഞ്ചിന് ആയിരുന്നു ചിത്രത്തിന്റെ റിലീസ്. ഹിന്ദി ‘സിതാരാമം’ ഓഗസ്റ്റ് 19ന് റിലീസ് ചെയ്യുമെന്ന് 123 തെലുങ്ക് റിപ്പോര്‍ട്ട് ചെയ്യുന്നു. അതേസമയം പ്രദര്‍ശനാനുമതി ലഭിച്ചതോടെ ‘സിതാരാമം’ യു എ ഇയില്‍ വ്യാഴാഴ്ച റിലീസ് ചെയ്തു. മൃണാള്‍ താക്കൂറും രശ്മിക മന്ദാനയും നായികമാരായ ചിത്രത്തില്‍ സുമന്ദ്, പ്രകാശ് രാജ്, ഗൗതം വാസുദേവ മേനോന്‍, ഭൂമിക എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിച്ചത്. നാനി, സായ് ധരം തേജ് എന്നിവർ ചിത്രത്തെ പ്രശംസിച്ച് രംഗത്തെത്തിയിരുന്നു.

അതേസമയം, ചിത്രത്തിലെ റാം എന്ന കഥാപാത്രം ദുല്‍ഖറിനു വേണ്ടി എഴുതപ്പെട്ടതായിരുന്നെന്നും മറ്റൊരു നടനെയും ആലോചിച്ചില്ലെന്നും ഹനു രാഘവപുടി പറഞ്ഞിരുന്നു. സീതാമഹാലക്ഷ്മിയായി മൃണാള്‍ താക്കൂര്‍ അഭിനയിച്ചപ്പോള്‍ ചിത്രത്തില്‍ അഫ്രീന്‍ എന്ന കഥാപാത്രത്തെയാണ് രശ്മിക മന്ദാന അവതരിപ്പിച്ചത്. റിലീസ് ദിനത്തില്‍ ഇന്ത്യയില്‍ നിന്നു മാത്രം 5.25 കോടി നേടിയ ചിത്രം യു എസ് ഉള്‍പ്പെടെയുള്ള വിദേശ മാര്‍ക്കറ്റുകളിലും മികച്ച പ്രതികരണമാണ് നേടിയത്.