ആദ്യം സഹായം വേണ്ടവര്‍ ചുറ്റുമുണ്ടോ എന്നു നോക്കൂ; മുഖ്യമന്ത്രിയുടെയും പ്രധാനമന്ത്രിയുടെയും സഹായനിധിയിലേക്ക് സംഭാവന നല്‍കുന്നത് പിന്നീടാവാമെന്നും ശ്രീശാന്ത്

കൊവിഡ് പ്രതിരോധത്തിനായി സാമ്പത്തിക സഹായവുമായി നിരവധി പ്രമുഖര്‍ രംഗത്തെത്തിയിരുന്നു. ഐപിഎല്ലില്‍ വിവിധ ടീമുകളുടെ താരങ്ങളായ പാറ്റ് കമ്മിന്‍സ്, ശിഖര്‍ ധവാന്‍, ശ്രീവത്സ് ഗോസ്വാമി, മുന്‍ ഓസ്ട്രേലിയന്‍ താരം ബ്രറ്റ് ലീ എന്നിവരെല്ലാം സഹായവുമായെത്തിയിരുന്നു. എന്നാല്‍ കേരള ക്രിക്കറ്റ് താരം എസ് ശ്രീശാന്തിന് ഇക്കാര്യത്തില്‍ വേറിട്ട അഭിപ്രായമാണുള്ളത്.

ചുറ്റുമുള്ള സാമ്പത്തിക ബുദ്ധിമുട്ട്് അനുഭവിക്കുന്നവരെ സഹായിച്ചതിനു ശേഷം ഫണ്ടുകളിലേക്ക് സംഭാവന നല്‍കുന്നതിനെക്കുറിച്ച് ആലോചിച്ചാല്‍ പോരേ എന്നാണ് ശ്രീശാന്ത് പറയുന്നത്. ഇന്‍സ്റ്റഗ്രാമിലാണ് ശ്രീശാന്ത് തന്റെ ആശയം പങ്കുവെച്ചത്. അദ്ദേഹം പറയുന്നതിങ്ങനെ… ”മുഖ്യമന്ത്രിയുടേയും പ്രധാനമന്ത്രിയുടേയും ഫണ്ടുകളിലേക്ക് സംഭാവന നല്‍കുന്നതിന് മുമ്പ് നിങ്ങളുടെ ചുറ്റുപാടൊന്ന് പരിശോധിക്കുക.

നിങ്ങളുടെ ബന്ധുക്കളോ സുഹൃത്തുക്കളോ ജോലിക്കാരോ കൊവിഡ് മഹാമാരിക്കിടയില്‍ ദുര്‍ബലരായി പോയവരുണ്ടാകാം. ആദ്യം അവരെ കരുത്തരാക്കുക. കാരണം പ്രധാനമന്ത്രിക്കോ മുഖ്യമന്ത്രിക്കോ അവരിലേക്ക് എത്താനാകില്ല. നിങ്ങള്‍ക്ക് മാത്രമേ കഴിയൂ.” ശ്രീശാന്ത് വ്യക്തമാക്കി.