ഓരോ ഫ്രയിമും മാസ്റ്റർപീസ്; പ്രതാപത്തോടെ ആർആർആർ ടീസർ, രാജമൗലി ചിത്രത്തിന്റെ റിലീസ് ജനുവരി ഏഴിന്

സംവിധായകൻ എസ് എസ് രാജമൗലിയുടെ പുതിയ ചിത്രം ‘ആർ ആർ ആർ’ ടീസർ പുറത്തിറക്കി. ചിത്രം 2022 ജനുവരി ഏഴിന് ലോകവ്യാപകമായി റിലീസ് ചെയ്യും. ചിത്രം എന്താണെന്നുള്ളതിന്റെ ഒരു മിന്നലാട്ടമാണ് ടീസർ. ടീസറിലെ ഓരോ ഫ്രയിമും അതിഗംഭീരമാണ്. പ്രതീക്ഷകൾക്കും മുകളിലാണ് ചിത്രമെന്നാണ് യുട്യൂബിൽ ടീസർ കണ്ടവരുടെ പ്രതികരണം. എൻ ടി ആർ, രാം ചരൺ, അജയ് ദേവ്ഗൺ, ആലിയ ഭട്ട്, ഒലിവിയ മോറിസ്, സമുദ്രകനി, ആലിസൺ ഡൂഡി, റെയ് സ്റ്റീവൻസൺ എന്നിവർ അണിനിരക്കുന്ന ചിത്രത്തിന്റെ രചനയും സംവിധാനവും എസ് എസ് രാജമൗലിയാണ്. ചിത്രത്തിന്റെ കഥ വി വിജയേന്ദ്ര പ്രസാദ് ആണ്.

നേരത്തെ ചിത്രം ഒക്ടോബർ പതിനേഴിന് റിലീസ് ചെയ്യുമെന്ന് ആയിരുന്നു അണിയറ പ്രവർത്തകർ അറിയിച്ചിരുന്നത്. എന്നാൽ, പിന്നീട് അത് മാറ്റി വെയ്ക്കുകയായിരുന്നു. പുതിയ റിലീസ് തീയതി ഉടനെ അറിയിക്കുമെന്നും അണിയറപ്രവർത്തകർ വ്യക്തമാക്കിയിരുന്നു. ഇപ്പോൾ ചിത്രം അടുത്ത വർഷമേ എത്തുകയുള്ളൂവെന്ന് ആരാധകരെ അറിയിച്ചിരിക്കുകയാണ് അണിയറപ്രവർത്തകർ.

ജൂനിയര്‍ എന്‍ ടി ആറും രാം ചരണുമാണ് ചിത്രത്തില്‍ പ്രധാനവേഷങ്ങളില്‍ എത്തുന്നത്. ജൂനിയര്‍ എന്‍ ടി ആര്‍ കൊമരു ഭീം ആയും രാം ചരണ്‍ അല്ലൂരി സീതരാമ രാജുവായിട്ടുമാണ് ചിത്രത്തിൽ എത്തുന്നത്‍. ചരിത്രവും ഫിക്ഷനും കോർത്തിണക്കിയാണ് ചിത്രമൊരുക്കുന്നത്. ബോളിവുഡ് താരം ആലിയ ഭട്ട് ചിത്രത്തിൽ നായിക. സീത എന്ന കഥാപാത്രത്തെയാണ് ആലിയ അവതരിപ്പിക്കുന്നത്. രുധിരം, രൗദ്രം, രണം എന്നാണ് ആര്‍.ആര്‍.ആര്‍ എന്ന പേര് കൊണ്ട് ഉദ്ദേശിക്കുന്നത്. സ്വാതന്ത്ര്യ സമരകാലത്തെ ഒരു സാങ്കല്‍പ്പിക കഥയാണ് ആര്‍.ആര്‍.ആര്‍ പറയുന്നത്. 450 കോടിയിലധികമാണ് ചിത്രത്തിന്റെ മുതല്‍മുടക്ക്. ഇരുപതു മിനിറ്റു നീളുന്ന ക്ലൈമാക്സ് രംഗങ്ങളാണ് ചിത്രത്തിനായി രാജമൗലി ഒരുക്കുന്നത്.