‘നേതാവ് കുയ്യാലി വക’; സത്യത്തിൽ പടവെട്ടിലെ ഫലകങ്ങൾ കെ റെയിൽ കുറ്റികൾ തന്നെയല്ലേ?

നിവിൻ പോളി നായകനായ പടവെട്ട് തീയറ്ററുകളിൽ വിജയകരമായി പ്രദർശനം തുടരുകയാണ്. മലയാള സിനിമയിൽ അധികം കൈ വെച്ചിട്ടില്ലാത്ത ഒരു പ്രമേയം തന്നെയാണ് ചിത്രത്തിൻ്റെ നട്ടെല്ല്. സാധാരണക്കാരായ കൃഷിക്കാരുടെ സംഘർഷങ്ങളും പോരാട്ടങ്ങളും അതിജീവനവും വ്യക്തമായി അവതരിപ്പിക്കുന്നതിനോടൊപ്പം സാധാരണക്കാരനെ പറ്റിക്കുന്ന രാഷ്ട്രീയ കളികളുടെ പൊയ്മുഖങ്ങളെ വലിച്ചുകീറുന്നുമുണ്ട് ചിത്രത്തിൽ. രവി എന്ന കഥാപാത്രത്തെയാണ് നിവിൻ പോളി ചിത്രത്തിൽ അവതരിപ്പിച്ചിരിക്കുന്നത്. പല തലങ്ങളിൽ നിറഞ്ഞു നിൽക്കുന്ന ചിത്രത്തിൽ സിംബോളിക്കായി പലതും പറഞ്ഞു വെക്കുന്നുണ്ട്.

മാലൂരിൽ രവിയുടെ കോറോത്ത് വീട്ടു മുറ്റത്തും പോക്കൻ ചേട്ടന്റെ ഉൾപ്പടെയുള്ള കർഷകരുടെ പണിയിടങ്ങളിലും നേതാവ് കുയ്യാലി വക എന്ന് എഴുതി കുയ്യാലി തന്നെ ഉറപ്പിക്കുന്ന ഫലകങ്ങൾ നമ്മൾ കാണുന്നുണ്ട്. കെ റെയിൽ എന്ന പേരിൽ കേരളത്തിൽ പലരുടെയും മണ്ണിൽ ഉറപ്പിച്ച മഞ്ഞ കുറ്റികൾ തന്നെയല്ലേ കുയ്യലിയുടെ ഫലകങ്ങളും..? മറ്റുള്ളവരുടെ പദ്ധതിയുടെ ഭാഗമാക്കി നമ്മളെ മാറ്റുകയല്ലേ അവിടെയും നടക്കുന്നത്.

സത്യത്തിൽ അതാണ് പടവെട്ടിന്റെ യഥാർത്ഥ രാഷ്ട്രീയം എന്ന് തന്നെ ഉറപ്പിച്ച് പറയുവാൻ സാധിക്കും. വികസനത്തിൻ്റെ പേരിൽ, മാറ്റങ്ങളുടെ പേരിൽ നശിപ്പിക്കപ്പെടുന്നത് നാടിനെ തന്നെയാണെന്ന് തിരിച്ചറിയുന്ന സാധാരണക്കാരൻ ഇവിടെ സംഘർഷങ്ങളിൽ വീഴുകയും പോരാട്ടത്തിനായി ഉണരുകയും അതിജീവിക്കുകയും ചെയ്യും. അപ്പോൾ പല രാഷ്ട്രീയ കള്ളകളികളും വെളിച്ചത്തിൽ എത്തുകയും ചെയ്യും.