നിവിൻ പോളിയുടെ വില്ലൻ..! 11 കിലോ തൂക്കം കൂട്ടിയതിനെ കുറിച്ച് സുദേവ് നായർ

നിവിൻ പോളിയെ നായകനാക്കി രാജീവ് രവി ഒരുക്കുന്ന തുറമുഖം ജൂൺ മൂന്നിന് തീയറ്ററുകളിൽ പ്രദർശനത്തിന് എത്തുവാൻ ഒരുങ്ങുകയാണ്. കൊച്ചിയിൽ 1962 വരെ നില നിന്നിരുന്ന ചാപ്പ തൊഴിൽ വിഭജന സമ്പ്രദായവും ഇത് അവസാനിപ്പിക്കാന്‍ തൊഴിലാളികള്‍ നടത്തിയ സമരവുമാണ് ചിത്രത്തിന്റെ പ്രധാന പ്രമേയം. നിവിനെ കൂടാതെ ഇന്ദ്രജിത്ത് സുകുമാരൻ, ജോജു ജോർജ് എന്നിങ്ങനെ വമ്പൻ താരനിര തന്നെ ചിത്രത്തിൽ അണി നിരക്കുന്നുണ്ട്. പുതിയ കൊച്ചി തുറമുഖം നിർമിക്കുന്ന കാലഘട്ടമായ 1920കളിലാണ് കഥ തുടങ്ങുന്നത്. നാടിന്റെ നാനാഭാഗത്ത് നിന്നും ജോലി തേടി നിരവധി പേർ ലേബർ കോൺട്രാക്ടർമാരുടെ ഓഫീസുകൾക്ക് മുന്നിൽ തടിച്ചു കൂടുന്നു. കോൺട്രാക്ടർമാരും ശിങ്കിടികളും എറിയുന്ന മെറ്റൽ ടോക്കണുകൾക്ക് വേണ്ടി, ഒരു നേരത്തെ അന്നത്തിനു വക കിട്ടാനുള്ള തൊഴിലിനു വേണ്ടി തൊഴിലാളികൾ പരസ്പരം പൊരുതുന്ന ഒരു കാലം.

പിന്നീട് 1940-കളിലേക്കും 50കളിലേക്കും നീങ്ങുന്ന കഥയിൽ ഏറെ വളർന്ന കൊച്ചി തുറമുഖം കരാറുകാരും മുതലാളിമാരും അവരുടെ ഭാഗം ചേരുന്ന യൂണിയൻ നേതാക്കളും അടങ്ങുന്ന ഒരു മാഫിയയുടെ വിളനിലമാകുന്നു. തൊഴിലാളികൾ പണിയെടുക്കാനും മാന്യമായി ജീവിക്കാനുമുള്ള അവകാശത്തിനു വേണ്ടി പോരാടേണ്ടി വരുന്ന കാലം. ഈ കലുഷിതമായ കാലഘട്ടത്തിലൂടെ കടന്നുപോകുന്ന ഒരു കുടുബത്തിന്റെയും ഒരു നാടിന്റെയും അതിജീവനത്തിന്റെ കഥയാണ് തുറമുഖം. നന്മക്കും തിന്മക്കും ഇടയിൽ, ദുരന്തത്തിനും വീരോചിതമായ ചെറുത്തുനിൽപിനും ഇടയിൽ, പ്രത്യാശക്കും നിരാശക്കും ഇടയിൽ ഉലയുന്ന രണ്ടു തലമുറകളുടെ കഥ.

സംവിധായകന്‍ രാജീവ് രവി തന്നെയാണ് ചിത്രത്തിന്റെ ഛായാഗ്രഹണവും. ചിത്രം രചിച്ചിരിക്കുന്നത് ഗോപന്‍ ചിദംബരനാണ്. ഗോപന്‍ ചിദംബരന്റെ അച്ഛന്‍ കെ എം ചിദംബരന്‍ രചിച്ച ഇതേ പേരിലുള്ള നാടകത്തെ അടിസ്ഥാനമാക്കിയാണ് സിനിമ ഒരുക്കിയിരിക്കുന്നത് എന്നാണ് റിപ്പോര്‍ട്ടുകള്‍. നിവിന്‍ പോളിക്കു പുറമെ ഇന്ദ്രജിത് സുകുമാരന്‍, ജോജു ജോര്‍ജ്, അര്‍ജുന്‍ അശോകന്‍, മണികണ്ഠന്‍ ആചാരി, സുദേവ് നായര്‍, നിമിഷാ സജയന്‍, പൂര്‍ണ്ണിമ ഇന്ദ്രജിത് തുടങ്ങിയവരും ചിത്രത്തിൽ അഭിനയിച്ചിട്ടുണ്ട്. എഡിറ്റിംഗ് – ബി അജിത് കുമാർ.

ഇപ്പോഴിതാ ചിത്രത്തിന് വേണ്ടി പതിനൊന്ന് കിലോഗ്രാം ഭാരം കൂട്ടിയതും കഠിനദ്ധ്വാനം വഴി അത് കുറച്ചതിനെ കുറിച്ചുമുള്ള അനുഭവം പങ്ക് വെച്ചിരിക്കുകയാണ് നടൻ സുദേവ് നായർ. ചിത്രത്തിൽ ഒരു നെഗറ്റീവ് കഥാപാത്രമാണ് സുദേവ് കൈകാര്യം ചെയ്യുന്നത്. 2014ൽ മില്യൺ ഡോളർ ആം എന്ന ഹോളിവുഡ് ചിത്രത്തിലൂടെ അഭിനയരംഗത്തേക്ക് കടന്ന് വന്ന സുദേവ് തന്റെ ആദ്യ മലയാള ചലച്ചിത്രമായ മൈ ലൈഫ് പാർട്ണറിലൂടെ മികച്ച നടനുള്ള കേരള സംസ്ഥാന ചലച്ചിത്ര അവാർഡ് കരസ്ഥമാക്കിയിരുന്നു.

അനാർക്കലി, എസ്ര, അബ്രഹാമിന്റെ സന്തതികൾ, കായംകുളം കൊച്ചുണ്ണി, മിഖായേൽ, മാമാങ്കം, ഭീഷ്മപർവ്വം, സിബിഐ 5 എന്നിവയാണ് സുദേവ് അഭിനയിച്ച മറ്റു പ്രധാന മലയാള ചിത്രങ്ങൾ. ഗുലാബ് ഗ്യാങ്, ഇന്ത്യാസ് മോസ്റ്റ് വാണ്ടഡ് തുടങ്ങിയ ഹിന്ദി ചിത്രങ്ങളിലും ഓൾഡ് മങ്ക് എന്ന കന്നഡ ചിത്രത്തിലും താരം അഭിനയിച്ചിട്ടുണ്ട്. പത്തൊൻപതാം നൂറ്റാണ്ട്, കടുവ, തുറമുഖം, കൊത്ത്, ഖേഡ, വഴക്ക്, മോൺസ്റ്റർ എന്നിവയാണ് സുദേവന്റെ പുതിയ ചിത്രങ്ങൾ.