ചില കാരണങ്ങള്‍ കൊണ്ട് ആ വേഷം ചെയ്യാന്‍ പറ്റിയില്ല; രവി പത്മനാഭന്റെ വേഷം ചെയ്യേണ്ടിയിരുന്നത് ഈ താരം

ഗിരീഷ് എ.ഡി ആദ്യമായി സംവിധാനം ചെയ്ത തണ്ണീര്‍മത്തന്‍ ദിനങ്ങള്‍ 2019ലെ സൂപ്പര്‍ഹിറ്റ് ചിത്രങ്ങളിലൊന്നായിരുന്നു. കുട്ടികള്‍ കേന്ദ്ര കഥാപാത്രങ്ങളായ ഈ ചിത്രത്തിലെ മറ്റൊരു ഹിറ്റ് കഥാപാത്രത്തെ അവതരിപ്പിച്ചത് വിനീത് ശ്രീനിവാസന്‍ ആണ്. വിനീത് ശ്രീനിവാസന്‍, മാത്യു തോമസ് അനശ്വര രാജന്‍ എന്നിവര്‍ പ്രധാന കഥാപാത്രങ്ങളായി എത്തിയ ഈ ചിത്രം വമ്പന്‍ ബോക്‌സ് ഓഫീസ് വിജയമാണ് നേടിയെടുത്തത്.

രവി പത്മനാഭന്‍ എന്ന അധ്യാപകന്റെ വേഷമാണ് വിനീത് ശ്രീനിവാസന്‍ അവതരിപ്പിച്ചത്. ഏറെ പ്രത്യേകതകള്‍ നിറഞ്ഞ, വളരെ രസകരമായ ഈ വേഷം വിനീത് ഭംഗിയായി അവതരിപ്പിക്കുകയും ഈ കഥാപാത്രം അദ്ദേഹത്തിന്റെ അഭിനയ ജീവിതത്തിലെ തന്നെ ഏറ്റവും മികച്ച വേഷങ്ങളില്‍ ഒന്നായി മാറുകയും ചെയ്തു. അതേ സമയം ഈ വേഷം അവതരിപ്പിക്കാന്‍ ചിത്രത്തിന്റെ അണിയറ പ്രവര്‍ത്തകര്‍ ആദ്യം സമീപിച്ചത് സണ്ണി വെയ്‌നെ ആയിരുന്നു.

എന്നാല്‍ പല കാരണങ്ങള്‍ കൊണ്ട് സണ്ണിക്ക് അന്ന് ആ വേഷം ചെയ്യാന്‍ സാധിച്ചില്ല. താന്‍ വിട്ടുകളഞ്ഞ ആ കഥാപാത്രത്തെ വിനീത് ശ്രീനിവാസന്‍ ഗംഭീരമാക്കി കയ്യടി നേടിയപ്പോള്‍ വലിയ അസൂയ തോന്നിയെന്നാണ് സണ്ണി വെയ്ന്‍ പറയുന്നത്. വിനീതിന്റെ അസാധ്യ അഭിനയം ആ സിനിമയുടെ മികവ് കൂട്ടി എന്നും നല്ല രസമുള്ള കഥാപാത്രമായിരുന്നല്ലോ അതെന്നോര്‍ക്കുമ്പോള്‍, അത് വിട്ടു കളഞ്ഞതില്‍ ഇപ്പോഴും പശ്ചാത്താപമുണ്ട് എന്നും സണ്ണി വെയ്ന്‍ പറയുന്നു. വനിതാ മാഗസിന് നല്‍കിയ അഭിമുഖത്തിലാണ് സണ്ണി വെയ്ന്‍ ഈ കാര്യം വെളിപ്പെടുത്തിയത്.