നിർമാണരംഗത്തേക്കുള്ള സണ്ണി വെയ്‌ന്റെ ആദ്യ ചുവടുവെപ്പ് നാടകത്തിലൂടെ

അഭിനയരംഗത്തും അണിയറരംഗത്തുമുള്ളവർ നിർമ്മാണരംഗത്തേക്ക് കൂടി കടന്നുവരുന്ന കാഴ്‌ചയാണ്‌ ഇപ്പോൾ കാണുന്നത്. അതിലെ ഏറ്റവും പുതിയ ആളാണ് സണ്ണി വെയ്ൻ. ഇന്നലെയാണ് തന്റെ നിർമ്മാണരംഗത്തേക്കുള്ള വരവ് അദ്ദേഹം വ്യക്തമാക്കിയത്. സണ്ണി വെയ്ൻ പ്രൊഡക്ഷൻസ് എന്ന് പേരിട്ടിരിക്കുന്ന കമ്പനിയുടെ ആദ്യത്തെ സംരംഭം ‘മൊമെന്റ് ജസ്റ്റ് ബിഫോര്‍ ഡെത്ത്’ എന്ന ഒരു നാടകമാണ്. ലിജു കൃഷ്ണ സംവിധാനം നിര്‍വഹിക്കുന്ന നാടകത്തിന്റെ സംഗീതം ബിജിബാലിന്റേതാണ്. സാഗാ എന്റര്‍ടെയ്ന്‍മെന്റ്‌സുമായി സഹകരിച്ചാണ് സണ്ണി വെയ്‌ന്റെ നാടക നിര്‍മ്മാണം. സ്‌കൂള്‍ ഓഫ് ഡ്രാമയിലെ പൂര്‍വ്വ വിദ്യാര്‍ത്ഥിയാണ് ലിജു കൃഷ്ണ. പ്രാദേശിക ചരിത്രത്തിന്റെ കെട്ടുപാടുകളെ കുറിച്ചും അവരുടെ ഭാഷയും അന്യവത്കരണവുമാണ് നാടകത്തിന്റെ പ്രമേയം. 75 മിനിറ്റാണ് നാടകത്തിന്റെ ദൈര്‍ഘ്യം. ജൂണ്‍ 10ന് വൈകിട്ട് 7ന് തൃപ്പൂണിത്തുറ ജെടി പാക്കില്‍ പ്രത്യേകം ക്ഷണിക്കപ്പെട്ട അതിഥികള്‍ക്കായി പ്രദര്‍ശനം ഒരുക്കിയിട്ടുണ്ട്.

മൊമെന്റ് ജസ്റ്റ് ബിഫോര്‍ ഡെത്ത് വൃദ്ധന്റെ മരണത്തിനും ജീവിതത്തിനും ഇടയിലുളള ഓര്‍മ്മകളിലൂടെയാണ് പുരോഗമിക്കുന്നത്. മുത്തപ്പന്റെ കടുത്ത ഭക്തനായ ചെത്തുതൊഴിലാളിയുടെ മകനാണ് അയാള്‍. ഇളംകളളിന്റെ മണവും അയാളുടെ ഓര്‍മ്മകളില്‍ നിറയുന്നു. സ്നേഹ വൈരാഗ്യ സംഘട്ടനങ്ങളും ജീവിതയാഥാര്‍ത്ഥ്യങ്ങളും മരണത്തിന്റെ സുനിശ്ചിതത്വവും അയാളുടെ മാനസിക വ്യവഹാരങ്ങളിലൂടെ നാടകത്തില്‍ അവതരിപ്പിക്കപ്പെടുന്നു. മരണത്തിലേക്കുളള യാത്രയാണ് ഓരോ ജീവിതവുമെന്ന് നാടകം ഓര്‍മ്മിപ്പിക്കുന്നു.

കലാരംഗത്തുളളവരെ നാടകത്തിലേയ്ക്ക് തിരിച്ചുകൊണ്ടുവരാന്‍ തന്നാലാകുംവിധം പ്രവര്‍ത്തിക്കുവാനാണ് താന്‍ നിര്‍മ്മാണ രംഗത്തേയ്ക്ക് വന്നതെന്ന് അദ്ദേഹം പറഞ്ഞു. സിനിമയും നാടകവും തമ്മിലുളള അകലം കുറക്കുവാനുളള എളിയ ശ്രമമാണ് ഇതിലൂടെ താന്‍ നടത്തുന്നതെന്നും സണ്ണി വെയ്ന്‍ പറഞ്ഞു. തന്നിലൂടെ രണ്ടു തലങ്ങളിലൂടെയുളളവരെ ഏകോപിപ്പിക്കുവാനുളള ശ്രമം കൂടിയാണിതെന്നും അദ്ദേഹം കൂട്ടിച്ചേര്‍ത്തു. നടന്‍ സിദ്ധിഖാണ് സണ്ണി വെയ്ന്‍ പ്രൊഡക്ഷന്‍സിന്റെ ലോഗോയും ആദ്യ നിര്‍മ്മാണ സംരംഭമായ മൊമെന്റ ജസ്റ്റ് ബിഫോര്‍ ഡെത്ത് ‘ നാടകത്തിന്റെ പോസ്റ്ററും പുറത്തിറക്കിയത്.