സണ്ണി വെയ്ൻ ചിത്രം അപ്പൻ എത്തുന്നു; ഷൂട്ടിംഗ് പൂർത്തിയാക്കി അണിയറ പ്രവർത്തകർ..!

മലയാളത്തിലെ പ്രശസ്ത യുവ താരം സണ്ണി വെയ്ൻ നായകനായി എത്തുന്ന പുതിയ ചിത്രമാണ് അപ്പൻ. ഈ ചിത്രത്തിന്റെ ഷൂട്ടിംഗ് ഇപ്പോൾ പൂർത്തിയായിരിക്കുകയാണ് എന്ന വിവരമാണ് പുറത്തു വരുന്നത്. തൊടുപുഴയിൽ ആയിരുന്നു ഇതിന്റെ അവസാന ഘട്ട ചിത്രീകരണം നടന്നത്.സണ്ണി വെയ്ൻ, അലൻസിയർ എന്നിവർ പ്രധാന കഥാപാത്രങ്ങളായി എത്തുന്ന ഈ ചിത്രത്തിന്റെ ടൈറ്റിൽ പോസ്റ്റർ കുറച്ചു നാൾ മുൻപ് മലയാളത്തിലെ യുവ താരം ദുൽഖർ സൽമാൻ തന്റെ ഫേസ്ബുക്ക് പേജിലൂടെ പങ്കു വെച്ചിരുന്നു. ജയസൂര്യക്ക് മികച്ച നടനുള്ള സംസ്ഥാന പുരസ്‌കാരം നേടിക്കൊടുത്ത “വെള്ളം” എന്ന പ്രജേഷ് സെൻ ചിത്രത്തിന്റെ നിർമ്മാതാക്കളായ ജോസ് കുട്ടി മഠത്തിൽ, രഞ്ജിത്ത് മണബ്രക്കാട്ട് എന്നിവർ ചേർന്ന് ടൈനി ഹാൻഡ്‌സ് പ്രൊഡക്ഷൻസിന്റെ ബാനറിൽ നിർമ്മിക്കുന്ന ചിത്രമാണ് അപ്പൻ.

ഇവർക്കൊപ്പം സണ്ണി വെയിനിന്റെ ഹോം പ്രൊഡക്ഷൻ ബാനർ ആയ സണ്ണിവെയിൻ പ്രൊഡക്ഷൻസ് ഇതിന്റെ നിർമ്മാണ പങ്കാളിയുമാണ്. നിവിൻ പോളി നായകനായ പടവെട്ടു എന്ന ചിത്രവും സണ്ണി വെയ്ൻ പ്രൊഡക്ഷൻസിന്റെ ബാനറിൽ ഒരുങ്ങുന്ന ചിത്രമാണ്. അപ്പൻ എന്ന ചിത്രം കഥ രചിച്ചു സംവിധാനം ചെയ്യുന്നത് മജു ആണ്. സണ്ണി വെയ്ൻ, അലെൻസിയർ എന്നിവർക്കൊപ്പം അനന്യ, ഗ്രേസ് ആന്റണി, പോളി വത്സൻ, രാധിക രാധാകൃഷ്ണൻ, അനിൽ കെ ശിവറാം, വിജിലേഷ്, ഉണ്ണി രാജ, അഷ്റഫ്, ദ്രുപദ് കൃഷ്ണ എന്നിവരും ഈ ചിത്രത്തിൽ പ്രധാന വേഷങ്ങൾ അവതരിപ്പിക്കുന്നുണ്ട്.

കുടുംബ പശ്ചാത്തലത്തിലുള്ള കഥയാണ് ഈ ചിത്രം പറയുന്നത് എന്നാണ് ഇപ്പോൾ വരുന്ന റിപ്പോർട്ടുകൾ നമ്മളോട് പറയുന്നത്. ചിത്രത്തിന്റെ തിരക്കഥ രചിച്ചിരിക്കുന്നത് ആർ.ജയകുമാറും സംവിധായകൻ മജുവും ചേർന്നാണ്. പപ്പു, വിനോദ് ഇല്ലമ്പള്ളി എന്നിവർ ചേർന്ന് ഛായാഗ്രഹണം നിർവഹിച്ച ഈ ചിത്രത്തിന്റെ എഡിറ്റർ കിരൺ ദാസ് ആണ്. ഡോൺ വിൻസെന്റ് ആണ് ഈ സിനിമയ്ക്കു വേണ്ടി സംഗീത സംവിധാനം നിർവഹിച്ചിരിക്കുന്നതു. കുറുപ്പ്, കുറ്റവും ശിക്ഷയും, വൃത്തം, ചെത്തി മന്ദാരം തുളസി, പാപ്പൻ, അടിത്തട്ട്, വരാൽ, ത്രയം എന്നിവയെല്ലാം ഇനി വരാനുള്ള സണ്ണി വെയ്ൻ ചിത്രങ്ങളാണ്.