സുരേഷ് ഗോപിയുടെ അറുപതാം പിറന്നാൾ നാളെ;ആഘോഷങ്ങൾക്ക് മാറ്റ് കൂട്ടി സുരേഷ് ഗോപിയുടെ 250-ാമത് ചിത്രത്തിന്റെ മോഷൻ പോസ്റ്റർ നാളെ പുറത്ത് വിടുന്നു !!

സുരേഷ് ഗോപിയുടെ 250-ാമത് ചിത്രത്തിന്റെ നിർമാണം നിർവഹിക്കുന്നത് ടോമിച്ചൻ മുളകുപ്പാടമാണെന്ന വാർത്ത കഴിഞ്ഞ ദിവസം പ്രേക്ഷകരെ ആവേശം കൊള്ളിച്ചുകൊണ്ട് പുറത്ത് വന്നിരുന്നു. പുലിമുരുകൻ, രാമലീല തുടങ്ങിയ ചിത്രങ്ങൾ മലയാളികൾക്ക് സമ്മാനിച്ചിട്ടുള്ള ടോമിച്ചൻ മുളകുപ്പാടത്തിന്റെ ഉടമസ്ഥതയിലുള്ള മുളകുപ്പാടം ഫിലിംസിൽ നിന്നും മറ്റൊരു മികച്ച ചിത്രം പ്രേക്ഷകർ പ്രതീക്ഷിക്കുന്നുണ്ട്.

നാളെ സുരേഷ് ഗോപി തന്റെ അറുപതാം പിറന്നാൾ ആഘോഷിക്കുകയാണ്. ആഘോഷങ്ങൾക്ക് മാറ്റ് കൂട്ടുവാനായി ഈ ചിത്രത്തിന്റെ മോഷൻ പോസ്റ്റർ പുറത്ത് വിടാൻ ഒരുങ്ങുകയാണ് അനിയറ പ്രവർത്തകർ. നിർമാതാവ് ടോമിച്ചൻ മുളകുപ്പാടം തന്നെയാണ് ഈ വാർത്ത പുറത്ത് വിട്ടത്. നാളെ വൈകിട്ട് 6 മണിക്ക് പോസ്റ്റർ പുറത്ത് വരും.

ചിത്രത്തിന് വേണ്ടി സംഗീതം ഒരുക്കുന്നത് അർജുൻ റെഡ്ഢി, കബീർ സിംഗ്, ദുൽഖർ സൽമാൻ നായകനായ കണ്ണും കണ്ണും കൊള്ളയടിത്താൽ തുടങ്ങിയ ചിത്രങ്ങൾക്ക് പശ്ചാത്തലസംഗീതം ഒരുക്കിയ ഹർഷവർദ്ധൻ രാമേശ്വർ ആണ്. അജയ് ദേവ്ഗൺ ചിത്രം തൻഹാജിയിൽ ഒരു ഗാനവും ആലപിച്ചിട്ടുണ്ട് ഹർഷവർദ്ധൻ .നവാഗതനായ മാത്യൂസ് തോമസ് സംവിധാനം നിർവഹിക്കുന്ന ചിത്രം കുടുംബപ്രേക്ഷകർക്കും യുവാക്കൾക്കും ഒരേപോലെ ഇഷ്ടപ്പെടുന്ന ചിത്രമായിരിക്കുമെന്നാണ് അറിയുവാൻ കഴിയുന്നത്. ചിത്രത്തിൽ ജോജു ജോസഫ്, മുകേഷ് എന്നിങ്ങനെ വമ്പൻ താരനിര തന്നെ അണിനിരക്കുമെന്നാണ് റിപ്പോർട്ട്. നായികയെ ഇതുവരെ തീരുമാനിച്ചിട്ടില്ലാത്ത ചിത്രത്തിലേക്ക് നായിക ബോളിവുഡിൽ നിന്നുമായിരിക്കും എന്നാണ് സൂചന. സുരേഷ് ഗോപിയുടെ എക്കാലത്തേയും വമ്പൻ ഹിറ്റുകളിലൊന്നായ ലേലം പോലെയൊരു ചിത്രമായിരിക്കുമിതെന്നും അണിയറ പ്രവർത്തകരിൽ നിന്നും അറിയുന്നു.

വമ്പൻ മുതൽമുടക്കിൽ ഒരുങ്ങുന്ന ചിത്രത്തിന്റെ സംവിധായകൻ മാത്യൂസ് തോമസ് ജോണി ആന്റണി, രഞ്ജിത് ശങ്കർ, അമൽ നീരദ്, ഖാലിദ് റഹ്മാൻ എന്നിവരുടെ ഒപ്പം സഹസംവിധായകനായി പ്രവർത്തിച്ചിട്ടുണ്ട്. വരത്തൻ, ഉണ്ട, കെട്ട്യോളാണ് എന്റെ മാലാഖ, പ്രേതം 2 തുടങ്ങിയ ചിത്രങ്ങളുടെ ഭാഗമായി മാത്യൂസ് തോമസ് പ്രവർത്തിച്ചിട്ടുണ്ട്.