ആദ്യം സഹായം ചോദിച്ചത് പൃഥ്വിരാജ്, പിന്നീടുള്ള മൂന്ന് മാസം വിശ്രമമില്ലാത്തത്;കോവിഡ് കാലത്തെ പ്രവർത്തനങ്ങൾ വിലയിരുത്തി സുരേഷ് ഗോപി

മലയാള സിനിമയിലെ ആക്ഷൻ സൂപ്പർ സ്റ്റാർ ആണ് സുരേഷ് ഗോപി. ഒരു ഇടവേളയ്ക്കു ശേഷം വീണ്ടും സിനിമയിൽ സജീവമാവുകയാണ് അദ്ദേഹം. സുരേഷ് ഗോപിയുടെ പിറന്നാൾദിനം കഴിഞ്ഞദിവസം മലയാളികൾ കൊണ്ടാടി. അന്ന് തന്നെ താരത്തിന്റെ രണ്ട് പുതിയ ചിത്രങ്ങളുടെ ടീസറും മോഷൻ പോസ്റ്ററുകളും പുറത്തുവന്നിരുന്നു. എന്നാൽ രാജ്യസഭാ എം പി കൂടിയായ സുരേഷ് ഗോപി പറയുന്നത്, കോവിഡ് വ്യാപനത്തിന്റെ ഫലമായി ഒട്ടേറെപ്പേരുടെ സഹയാഭ്യര്ഥന വിവിധ രാജ്യങ്ങളിൽ നിന്ന് വരാൻ തുടങ്ങിയതോടെ, ഉറക്കം പോലും കുറഞ്ഞെന്നും അതുകൊണ്ട് ഇത്തവണ പിറന്നാൾ പോലും ആഘോഷിക്കാൻ പറ്റിയില്ല എന്നുമാണ്.

സുരേഷ് ഗോപിയുടെ വാക്കുകൾ:

വന്ദേഭാരത് മിഷനുമായി ബന്ധപ്പെട്ട് കേരളത്തിലെ വലിയ വിഭാഗം ആളുകള്‍, അതില്‍ തിരഞ്ഞെടുക്കപ്പെട്ടവര്‍ ആയാലും അല്ലാത്തവരായാലും മന്ത്രിമാരായാലും ഒക്കെ നോര്‍ക്ക, കൊവിഡ് വാര്‍ റും വഴി പലവിധ ആവശ്യങ്ങളുമായി വിളിച്ചിരുന്നു. ജോർദാനിൽ കുടുങ്ങിയ നടൻ പൃഥ്വിരാജ് ആണ് എന്നെ ആദ്യം വിളിച്ചത്. അതിനു ശേഷം മൂന്നരമാസമായി ഉറക്കമില്ലാത്ത രാത്രികൾ ആണ്. കഴിഞ്ഞ ദിവസവും ഫിലിപ്പീന്‍സില്‍ നിന്നും വരാനുളള മൂന്ന് മെഡിക്കല്‍ വിദ്യാര്‍ത്ഥികളുടെ ആവശ്യത്തിന് കോളുകള്‍ വന്നിരുന്നു.

ലോകത്തിന്റെ ഒരു ഭാഗത്ത് പകലാകുന്ന, അവിടുത്തെ പീക്ക് ടൈമിലാണ് കോളുകള്‍ വരുന്നത്. അമേരിക്ക, ഓസ്ട്രേലിയ എന്നിവിടങ്ങളില്‍ നിന്ന് പല സമയത്താണ് കോളുകള്‍ വരുന്നത്. അത്തരം കോളുകള്‍ വരുന്നതെല്ലാം ഒരു ഐഡന്റിറ്റി ലോസ് ഉണ്ടാക്കുന്ന തരത്തില്‍ എന്റെ മാനസിക ഘടന റീ സ്ട്രക്ച്ചര്‍ ചെയ്തു. അതിന്റെ ഭാഗമായി ഇത്തവണത്തെ പിറന്നാള്‍ ദിവസം എനിക്ക് ആഘോഷിക്കാന്‍ പറ്റിയില്ല. കുടുംബത്തോടൊപ്പം വൈകുന്നേരം ഒരു കേക്ക് മുറിക്കൽ മാത്രമാണ് ഉണ്ടായത്. ആഘോഷത്തിനുള്ള ഒരു മാനസികാവസ്ഥ ഉണ്ടാവാത്തത് കൊണ്ടാണ് അന്ന് ഞാൻ ചാനലുകളിൽ വരാതിരുന്നത്.