ദേശാന്തരങ്ങളില്ലാത്ത വികാരം | സുവർണപുരുഷൻ റിവ്യൂ

മോഹൻലാൽ അല്ലെങ്കിൽ ലാലേട്ടൻ… അത് ഒരു വികാരമാണ്. അതിനുമപ്പുറം മോഹൻലാൽ മലയാളികുടുംബങ്ങളിലെ ഒരു അംഗമാണ്. ഒരു ഏട്ടനായും അനുജനായും മകനായും സുഹൃത്തായുമെല്ലാം ഓരോ കുടുംബങ്ങളിലും ലാലേട്ടന്റെ സാന്നിധ്യം മലയാളികൾക്കുണ്ട്. അഭിനയത്തിന്റെ പല തലങ്ങളിലായി വിസ്മയങ്ങൾ തീർക്കുന്ന ലാലേട്ടന് ഉള്ള ഒരു സമ്പൂർണ സമർപ്പണമാണ് ‘സുവർണപുരുഷൻ’. പുണെ ഫിലിം ഇൻസ്റ്റിറ്റ്യൂട്ടിന്റെ സംഭാവനയായ സുനിൽ പൂവേലിയാണ് ഈ ചിത്രത്തിന്റെ കഥയും സംവിധാനവും നിർവഹിച്ചിരിക്കുന്നത്. ഒരു പുതുമുഖത്തിന്റേതായ സങ്കോചങ്ങൾക്ക് യാതൊരിടവും നൽകാതെ പ്രേക്ഷകനെ തുടക്കം മുതൽ ഒടുക്കം വരെ ചിത്രത്തിൽ മുഴുകി ഇരിക്കത്തക്ക വിധം ഒരു അവതരണമാണ് സംവിധായകന്റെ ഭാഗത്ത് നിന്നും ഉണ്ടായിരിക്കുന്നത്. ഇനിയും കൂടുതൽ ചിത്രങ്ങൾ ഈ സംവിധായകനിൽ നിന്നും മലയാളിപ്രേക്ഷകർക്ക് ലഭിക്കാവാനുണ്ട് എന്നത് സ്പഷ്ടം.

ഇരിങ്ങാലക്കുടയിലെ “മേരിമാതാ” എന്ന തിയ്യേറ്ററിന്റെ ഉടമസ്ഥ മേരിക്കുഞ്ഞ് മോഹൻലാൽ എന്ന നടന്റെ ഒരു കടുത്ത ആരാധിക കൂടിയാണ്. റപ്പായിച്ചേട്ടനാണ് ആ തിയ്യേറ്ററിലെ പ്രൊജക്റ്റ് ഓപ്പറേറ്റർ. അയാളും ഒരു കടുത്ത മോഹൻലാൽ ആരാധകനാണ്. മലയാളസിനിമയിൽ തന്നെ റെക്കോർഡുകൾ പലതും കടപുഴക്കിയ പുലിമുരുകൻ റിലീസാവുന്ന ദിവസമാണ് റപ്പായിച്ചേട്ടൻ സർവ്വീസിൽ നിന്നും സ്വയം പെൻഷൻ പറ്റാൻ തീരുമാനിക്കുന്നത്. അതിന് ശേഷം റപ്പായിച്ചേട്ടന്റെ ജീവിതത്തിലും നാട്ടിലും സംഭവിക്കുന്ന അത്യന്തം രസകരമായ സംഭവങ്ങളുടെ ആവിഷ്ക്കാരമാണ് ഈ ചിത്രം. മോഹൻലാൽ തന്നെ നായകനായ ദേവാസുരത്തിലെയും രാവണപ്രഭുവിലെയും വാര്യർ എന്ന കഥാപാത്രത്തിനൊപ്പം ചേർത്തുവെക്കാവുന്ന ഇന്നസെന്റിന്റെ ഒരു കഥാപാത്രമാണ് സുവർണപുരുഷനിലെ റപ്പായിച്ചേട്ടൻ. തനിക്ക് ലഭിച്ച ആ മനോഹരകഥാപാത്രത്തെ അതിന്റെ എല്ലാ പൂർണതയിലും സുന്ദരമായൊരു സൃഷ്ടിയാക്കി തീർക്കാൻ ഇന്നസെന്റിന് കഴിഞ്ഞിട്ടുണ്ട്. അതോടൊപ്പം തന്നെ ശക്തമായ ഒരു കഥാപാത്രമാണ് ലെനയുടെ മേരികുഞ്ഞ്. ലാലേട്ടനോടുള്ള മലയാളികളുടെ ആരാധനക്ക് ആൺ – പെൺ വ്യത്യസമില്ലെന്ന ആ സത്യവും കൂടി പ്രേക്ഷകരെ ഓർമിപ്പിക്കുവാൻ മേരിക്കുഞ്ഞിനായി.

മോഹൻലാലിന്റെ മലയാളസിനിമയിലേക്കുള്ള അരങ്ങേറ്റം കുറിച്ച “മഞ്ഞിൽ വിരിഞ്ഞ പൂക്കൾ” റിലീസായ ദിവസം തൊട്ട് ”ലാലേട്ടൻ ഒരു സൂപ്പർ സ്റ്റാറാകും” എന്ന് പറഞ്ഞു നടക്കുന്ന കുമാരേട്ടനാണ് ആ തിയ്യേറ്ററിലെ കാൻറീൻ നടത്തുന്നത്. കലിംഗ ശശിയുടെ മറ്റൊരു സുന്ദരകഥാപാത്രം. ആ പ്രവചനം സത്യമായതാണ് പിന്നീട് ചരിത്രമായതും എന്നത് സത്യം. ശിവജി ഗുരുവായൂരിന്റെ കോമ്പാറ പോളിയും പി ആർ ബിജോയുടെ വില്ലൻവേഷം കീരിക്കാടനുമെല്ലാം സിനിമയുടെ കഥാഗതിയെ ആഴത്തിൽ തന്നെ സ്പർശിച്ചു.റപ്പായിച്ചേട്ടന്റെ ശിഷ്യൻ ഈനാശുവായെത്തുന്ന ശ്രീജിത്ത് രവി, വെങ്കിടിയെന്ന അന്ധകഥാപാത്രത്തെ മനോഹരമാക്കിയ മനു എന്നിവരെല്ലാം മികച്ചു നിന്നു.

പുലിമുരുകൻ എന്ന് തന്നെയല്ല ഓരോ ലാലേട്ടൻ ചിത്രങ്ങളുടെയും റിലീസ് ദിനം ആരാധകരുടെ ആഘോഷത്തിന്റെയും ആവേശത്തിന്റെയും ദിനങ്ങളാണ്. അങ്ങനെയൊരു ദിവസത്തെ അതിന്റെ അഴകോടുകൂടി തന്നെ സ്‌ക്രീനിൽ പ്രതിഫലിപ്പിക്കുക അത്ര എളുപ്പമുള്ള കാര്യമല്ല. സംവിധായകൻ സുനിൽ പൂവേലി തന്റെ അച്ചടക്കമാർന്ന എഴുത്തിലൂടെ അത് സാധ്യമാക്കി എടുത്തു. ഷിജു എം ഭാസ്കറുടെ ക്യാമറയും നിഖിൽ പ്രഭയുടെ സംഗീതവും വിഷ്ണു വേണുഗോപാലിന്റെ എഡിറ്റിംഗ് കൂടിയായപ്പോൾ പ്രേക്ഷകർക്ക് ഒരു നല്ല ദൃശ്യവിരുന്ന് പകരാൻ സുവർണപുരുഷൻ ടീമിനായി. ആരാധകർക്ക് ആഘോഷമാക്കാനും കുടുംബപ്രേക്ഷകർക്ക് ആസ്വദിക്കാനും തക്ക ഒരു നല്ല എന്റർടൈനറാണ് സുവർണപുരുഷൻ. ജീവൻ തുടിക്കുന്ന ഒരു ചിത്രം.